Efezu 1 - Biblia Tetun Dili

Paulo hahuu nia surat

¹ Surat nee hosi hau, Paulo. Maromak rasik mak foti hau sai Nai Kristu Jesus nia apostolu. Hau hakerek surat nee ba imi, Maromak nia povu santu, iha sidade Efezu. Imi laran ida ho Kristu Jesus i fiar metin nafatin ba Nia.

² Hau harohan ba ita nia Aman Maromak ho Nai Jesus Kristu, para hatudu Sira nia grasa ba imi, i foo paz ho hakmatek ba imi.

Nai Maromak hatudu Nia grasa liu hosi Jesus Kristu

³ Mai ita hahii Nai Maromak! Nia mak ita nia Nai Jesus Kristu nia Aman. Nia foo ona bensaun espiritual bar-barak hosi lalehan mai ita, tanba ita laran ida ona ho Kristu.

⁴ Molok Nai Maromak halo mundu, Nia hili tiha ona ita sai Kristu nia ema no Nia hadomi ita. Nia hakarak atu ita moris santu no laran moos iha Nia futar oin, i la iha sala.

⁵ Nee mak Nia desidi ona hori uluk kedas atu foti ita sai Nia oan. I Jesus Kristu mak halo Nia desizaun nee sai realidade. Nee hotu tuir Maromak nia hakarak rasik, i halo Nia laran haksolok.

⁶ Mai ita hahii Nia! Tanba Nia hatudu ona Nia laran diak teb-tebes mai ita, liu hosi Nia Oan doben.

⁷ Kristu nia raan fakar too mate tanba ita. Liu hosi Nia Oan nia mate, Maromak selu kotu ita nia tusan. Nunee ita livre ona. Ho ida nee Maromak hatudu Nia grasa res-resin mai ita.

⁸ Tanba Nia hadomi teb-tebes ita, Nia mos loke ita nia neon para ita bele komprende didiak Nia hakarak.

⁹ Uluk Nai Maromak seidauk foo hatene Nia hakarak hotu ba ema. Maibee agora, Nia hatudu ona Nia planu mai ita. Nia desidi ona hori uluk atu Jesus Kristu halao planu nee.

¹⁰ Nia planu mak nee: bainhira too ona nia tempu, Maromak sei halo buat hotu-hotu iha lalehan ho iha rai hamutuk ida deit, i Kristu mak sei ukun hotu-hotu.

¹¹ Maromak halao buat hotu-hotu tuir Nia hakarak. Hori uluk kedas Nia hili ona ita sai Nia ema hodi sai neon ida laran ida ho Kristu.

¹² Nia halo nunee atu ami ema Judeu nebee fiar uluk ba Kristu, bele foti aas Nai Maromak nia naran. Nunee ema hotu-hotu foo onra no gloria deit ba Nia!

¹³ Imi nebee laos ema Judeu mos rona ona Kristu nia Novidade Diak, hodi fiar ba Nia. Novidade nee loos, i lori salvasaun ba imi. Bainhira imi fiar ba Kristu, Maromak foo Nia Espiritu Santu ba imi, tuir Nia promesa uluk. Espiritu Santu nee hanesan sinal ida katak, imi Kristu nia ema.

¹⁴ Tanba Maromak foo ona Nia Espiritu Santu mai ita, mak ita laran metin katak, Nia sei foo tan buat hotu-hotu nebee Nia promete ona, i sei hasai Nia povu hosi sira nia sala hotu. Foti aas Nai Maromak nia naran. Nunee ema hotu-hotu foo onra no gloria deit ba Nia!

Paulo halo orasaun ba sarani sira iha Efezu

¹⁵ Maun-alin sira, hau rona dehan, imi fiar metin ba Nai Jesus i hadomi Maromak nia povu santu hotu. Bainhira hau rona nunee,

¹⁶ hau sempre foo agradese ba Nai Maromak tanba imi, i sempre temi imi nia naran bainhira hau halo orasaun

¹⁷ ba Maromak. Nia mak ita nia Nai Jesus Kristu nia Aman Maromak. Nia mak ita nia Aman, i Nia boot teb-tebes. Hau husu atu Nia haraik Nia Espiritu ba imi, para loke imi nia neon i hatudu Maromak ba imi para imi bele konhese Nia diak liu tan.

¹⁸ Hau husu ba Maromak atu foo naroman ba imi para imi bele komprende buat hotu-hotu nebee Maromak promete ona atu foo. Imi hein ho laran metin atu simu buat sira nee, tanba Nia bolu ona imi sai Nia ema. Hau mos harohan atu imi komprende katak, bensaun nebee Maromak promete ona atu foo ba Nia povu santu nee makaas teb-tebes.

¹⁹ Hau harohan atu imi bele hatene Maromak nia kbiit. Nia kbiit nee makaas teb-tebes, boot liu hotu-hotu. Hodi kbiit nee mak Nia tulun ita nebee fiar ba Nia. Hodi kbiit nee mos

²⁰ Nia halo Kristu moris fila fali hosi mate, i foti Nia ba tuur iha Nai Maromak nia sorin loos iha lalehan.

²¹ Kristu boot liu buat hotu-hotu iha lalehan ho rai. Nia boot liu ukun nain sira, autoridade sira, ho poder sira hotu. Nia naran aas liu see-see deit mak kaer ukun, laos deit ba sira nebee ukun agora, maibee mos ba sira nebee sei ukun iha tuir mai.

²² Nai Maromak halo buat hotu-hotu hakruuk ba Kristu, i foti Kristu sai Ulun ba igreja hodi ukun buat hotu-hotu, atu nunee Nia bele tulun ema sira nebee fiar ba Nia.

²³ Kristu mak Ulun, i ita sarani sira hanesan Nia isin lolon. Ita simu ita nia moris tomak hosi Kristu, nunee mos Kristu foo moris ba buat hotu-hotu iha lalehan ho rai.