Ebreu 9 - Biblia Tetun Dili

Ita nia sakrifisiu la bele hamoos ita nia laran

¹ Bainhira Maromak halo Nia aliansa ida uluk ho ita nia bei-ala sira, Nia foo ho regra sira kona ba oinsaa atu adora Nia, i oinsaa atu harii fatin ida para adora Nia.

² Entaun sira harii tenda orasaun, fahe ba kuartu rua. Kuartu ida iha oin naran Fatin Santu. Iha kuartu nee iha ahi-oan riin ida ho meza ida para tau paun hodi oferese ba Nai Maromak.

³ Iha tan kuartu ida iha kotuk naran Fatin nebee Santu Liu. Kuartu nee taka ho kortina boot.

⁴ Iha Fatin nebee Santu Liu nee iha altar osan mean hodi sunu ai been morin. Iha mos kaixoti aliansa nian, nia liur-laran taka tomak ho osan mean. Iha kaixoti nee nia laran iha sanan osan mean. Sanan nee paun manaa mak iha laran. Iha kaixoti laran nee iha mos Arão nia ai tonka nebee uluk dikin fali ona, ho mos fatuk belar rua. Iha fatuk nee hakerek Nai Maromak nia ukun fuan.

⁵ Iha kaixoti nia leten, iha estatua rua hanesan anju nebee iha liras. Anju rua nee hatudu Maromak Kbiit Nain nia prezensa. Sira nia liras nakloke hela hodi taka kaixoti nia matan. Iha fatin nee mak Nai Maromak hamoos ema nia sala. Maibee agora laos tempu atu koalia klean liu kona ba buat sira nee.

⁶ Buat sira nee hotu tau tuir nia fatin. Depois nai-lulik sira loro-loron tama ba iha kuartu oin hodi halao sira nia knaar.

⁷ Maibee so nai-lulik boot deit mak bele tama ba iha Fatin nebee Santu Liu, i nia so bele tama tinan ida dala ida. Bainhira nia tama, nia tenki lori animal nia raan hodi oferese ba Maromak, para husu perdaun ba nia sala rasik ho mos ba povu sira nia sala nebee sira rasik halo tanba sira la hatene.

⁸ Ho buat sira nee, Maromak nia Espiritu Santu hatudu mai ita katak, durante tenda orasaun nee sei iha, dalan seidauk nakloke ba ita ema atu bele tama ba Fatin nebee Santu Liu.

⁹ Buat sira nee foo hanoin mai ita nebee moris agora katak, oferta ho sakrifisiu nebee ema foo ba Maromak la bele halo kamaan sira nia laran, tanba sira hanoin nafatin sira nia sala.

¹⁰ Tanba regra kona ba oferta ho sakrifisiu so koalia kona ba isin lolon nian deit, hanesan haan-hemu ho serimonia hamoos aan. Maski nunee maibee regra sira nee lao nafatin too Nai Maromak hatuun Nia aliansa foun.

Kristu mak sai sakrifisiu perfeitu

¹¹ Maibee agora, Kristu mai tiha ona. Kristu nee mak Ema nebee Maromak promete ona hori uluk kedas atu haruka mai. Nia sai nai-lulik boot hodi halo buat diak mai ita. Nia tama ba iha Tenda orasaun ida nebee aas liu ho diak liu, hodi halao nia knaar hanesan nai-lulik boot. Tenda orasaun nee laos hosi mundu nee.

¹² Nai-lulik boot sira seluk tama ba iha Fatin nebee Santu Liu tinan ida dala ida, lori bibi nia raan ka karau nia raan. Maibee Kristu tama dala ida deit, lori Nia raan rasik. Ho Nia raan nee Nia selu kotu tiha ona ita nia sala too tinan ba tinan.

¹³ Tuir lei Moisés nian, ema nebee halo sala la bele tama iha uma kreda hodi adora Nai Maromak. Maibee se nai-lulik hisik ema nebee halo sala ho bibi nia raan ka karau nia raan, ka akudesan hosi karau inan tunu, ema nee konsidera moos fali.

¹⁴ Se animal nia raan bele halo ema moos fali, saa tan Kristu nia raan! Tanba ho Espiritu nebee rohan-laek nia tulun, Kristu foo Nia Aan ba Maromak nudar sakrifisiu ida ke santu. Nee mak Nia raan hamoos ita nia hanoin para ita livre hosi hahalok nebee mak lori ita ba mate, atu nunee ita bele adora Maromak nebee Moris.

¹⁵ Tanba nee mak Kristu sai mediador para lori aliansa foun mai ita ema. Nunee ema nebee Maromak bolu sai Nia povu bele simu bensaun hotu-hotu nebee Nia promete tiha ona atu foo, too tinan ba tinan. Ema nebee uluk moris iha aliansa tuan nia okos mos sei simu buat sira nee hotu, tanba Kristu mate ona hodi hasai sira hosi sala nebee mak sira halo iha tempu nebaa.

¹⁶ Hau foo ezemplu ida: Se ema ruma halo surat deklarasaun ida hodi promete, see mak atu hetan nia rikusoin bainhira nia mate, entaun tenki hatudu katak ema nee mate tiha ona foin bele fahe nia rikusoin nee.

¹⁷ Tanba bainhira ema nee sei moris, akordu nebee nia hakerek iha surat nee seidauk vale. Nia mate tiha mak foin vale.

¹⁸ Nunee mos bainhira Maromak halo Nia aliansa tuan ho ita nia bei-ala sira. Tenki ho raan hodi hatudu katak animal mate mak foin Nia aliansa nee vale.

¹⁹ Iha tempu nebaa Maromak foo Nia aliansa ho Nia lei dala ida liu hosi Moisés. Depois Moisés halibur povu Israel hotu hodi foo sai ba sira Maromak nia lei tomak. Nia foo sai tiha hotu, nia oho karau ho bibi hodi hasai nia raan, i kahur raan nee ho bee. Nia kesi bibi fulun mean iha ai hisop nia sanak, depois habokon ho raan nee hodi hisik ba livru nebee hakerek Maromak nia lei, i hisik mos ba povu.

²⁰ Nia hisik raan nee hodi dehan, “Raan nee hanesan sinal katak Nai Maromak halo ona Nia aliansa ho imi i haruka imi halo tuir Nia lei nee hotu.”

²¹ Moisés mos hisik raan nee ba tenda orasaun ho mos ba sasaan hotu-hotu iha tenda laran nebee sira uza hodi adora Nai Maromak.

²² Tanba tuir Maromak nia lei, kuaze buat hotu-hotu tenki hamoos ho raan. Se raan la fakar sai la iha perdaun ba sala.

²³ Sasaan sira nee hotu kopia deit tuir buat nebee mak iha lalehan. Atu hamoos buat sira nee para bele uza hodi adora Nai Maromak, tenki oho animal halo sakrifisiu. Maibee buat lalehan nian presiza sakrifisiu nebee diak liu tan.

²⁴ Kristu la tama ba Fatin Santu nebee ema mak halo, ida nebee kopia tuir deit lalehan nian, maibee Nia tama liu ba lalehan. I agora Nia iha hela Nai Maromak nia prezensa hodi husu tulun mai ita.

²⁵ Tinan-tinan, nai-lulik boot sira iha mundu tama ba iha Fatin nebee Santu Liu, lori animal nia raan, laos sira nia raan rasik. Maibee Kristu tama ba Fatin nebee Santu Liu, lori Nia raan rasik. Nia la presiza foo Nia Aan ba mate fila-fila.

²⁶ Tanba se karik Nia tenki foo Nia Aan fila-fila, nee dehan katak Nia terus hela deit komesa Nai Maromak halo mundu nee. Maibee laos nunee. Agora tempu ikus ona, Nia foo Nia Aan hanesan sakrifisiu dala ida deit hodi halakon ita nia sala.

²⁷ Nudar ema, ita hotu-hotu tenki mate dala ida deit, depois Nai Maromak tesi ita nia lia.

²⁸ Kristu mos mate dala ida deit, hanesan sakrifisiu hodi hamoos ema barak nia sala. I Nia sei fila fali mai, laos atu kasu ita ema nia sala tan, maibee atu salva ema sira nebee mak hein hela Nia ho laran metin.