Ebreu 8 - Biblia Tetun Dili

Ita nia nai-lulik boot Jesus lori promesa foun

¹ Buat nebee ohin ita koalia nee, importante liu mak nee: Agora ita iha ona Nai-Lulik Boot nebee diak liu, Nia tuur hela iha Nai Maromak nia sorin kuana iha lalehan hodi kaer ukun.

² I Nia halao Nia serbisu hanesan nai-lulik boot iha tenda orasaun nebee Nai Maromak rasik mak harii, laos ema mak harii, nebee santu.

³ Nai-lulik boot hotu-hotu tenki hasae oferta ho sakrifisiu ba Nai Maromak. Nee mak Jesus mos tenki hasae buat ruma hanesan sakrifisiu.

⁴ Se karik Jesus agora iha mundu, entaun Nia sei la sai nai-lulik, tanba iha tiha ona nai-lulik para foo oferta ho sakrifisiu ba Nai Maromak tuir lei Moisés nian.

⁵ Nai-lulik sira nee halao sira nia serbisu iha tenda orasaun, maibee tenda orasaun ida iha mundu nee hanesan lalatak ka kopia deit. Tenda orasaun loloos mak iha lalehan. Tanba nee, bainhira Maromak haruka Moisés halo tenda orasaun, Nia foo hanoin dehan, “Kuidadu didiak atu halo tenda orasaun nee tuir loloos modelu nebee Hau hatudu ona ba o iha foho leten.”

⁶ Maibee serbisu nebee Jesus simu aas liu fali nai-lulik hotu-hotu iha mundu nee. I Maromak nia aliansa nebee Jesus nudar mediador lori mai ita mos diak liu fali Maromak nia aliansa ba ita nia bei-ala sira.

⁷ Se karik aliansa primeiru nee bele halo ita dame malu ho Nai Maromak, entaun Maromak la presiza halo tan aliansa segundu. Maibee,

⁸ tanba Maromak hatene katak povu la moris tuir Nia hakarak, entaun presiza halo aliansa segundu. Nee mak Nia dehan, “Rona mai! Hau, Nai Maromak, mak hatete: Iha tempu oin mai Hau sei halo aliansa foun ho povu Israel no povu Judá.

⁹ Aliansa nee la hanesan ho aliansa nebee uluk Hau halo ho sira nia bei-ala sira. Tempu nebaa Hau kaer sira nia liman hodi lori sira sai hosi rai Ejitu. Maibee sira la halo tuir sira nia aliansa ho Hau. Nee mak Hau husik tiha sira.

¹⁰ Agora Hau, Nai Maromak, foo sai katak, aliansa nebee Hau sei halo ho povu Israel mak nee: Hau sei tau Hau nia lei iha sira nia neon, i sei hakerek Hau nia ukun fuan iha sira nia fuan-laran. Hau sei sai sira nia Nai Maromak, i sira sei sai Hau nia povu.

¹¹ Sira sei la presiza tan hanorin sira nia maluk ka sira nia maun-alin atu konhese Nai Maromak, tanba sira hotu-hotu, hosi kiik too boot, sei konhese Hau.

¹² Hau sei hamoos sira nia sala hotu, i sei la hanoin tan sira nia hahalok aat sira.”

¹³ Bainhira Maromak koalia kona ba Nia aliansa foun, nee dehan katak, Nia aliansa tuan la vale ona. I buat nebee tuan i la vale ona, la kleur tan sei lakon.