Ebreu 7 - Biblia Tetun Dili

Melkizedek boot liu nai-lulik sira hosi Levi nia jerasaun

¹ Melkizedek nee liurai sidade Salém, i nia mos nai-lulik hodi serbii Nai Maromak Aas Liu. Iha loron ida, Abraão baa halo funu hasoru liurai nain haat, i nia mak manaan. Bainhira Abraão iha dalan atu fila fali ba uma, liurai Melkizedek hasoru nia hodi foo bensaun ba nia.

² Tuir mai, buat hotu-hotu nebee Abraão hadau hosi nia inimigu sira, nia foo porsentu sanulu ba Melkizedek. Ida nee mak dizimu. Naran Melkizedek nee signifika “liurai nebee moris loos.” I liurai Salém signifika “liurai nebee lori dame.”

³ La iha ema ida hatene kona ba Melkizedek nia inan-aman ho nia bei-ala sira, la iha ema ida mak hatene kona ba nia loron moris no nia loron mate. Nia hanesan Maromak nia Oan, tanba nia nai-lulik too tinan ba tinan.

⁴ Hanoin took! Melkizedek nee ema boot duni, too ita nia bei-ala Abraão foo dizimu ba nia hosi sasaan hotu nebee nia hadau iha funu laran.

⁵ Liu tiha tinan barak, lei Moisés nian foo sai katak, Levi nia jerasaun mak bele sai nai-lulik, i nai-lulik sira nee mak iha direitu atu simu dizimu hosi povu. Afinal nai-lulik sira nee ho ema sira seluk maun-alin, tanba sira hotu mesak Abraão nia jerasaun.

⁶ Maibee Melkizedek nee laos mai hosi Levi nia jerasaun. Maski nunee Abraão foo dizimu ba nia. Melkizedek mos foo bensaun ba Abraão. Afinal Abraão nee uluk simu tiha ona Nai Maromak nia promesa.

⁷ Ita hotu hatene katak, ema nebee foo bensaun nee, boot liu ema nebee simu.

⁸ Nai-lulik sira hosi Levi nia jerasaun simu dizimu, maibee too ikus sira mate. Melkizedek mos simu dizimu hanesan, maibee tuir Livru Sagradu nia moris nafatin.

⁹ Ita bele dehan katak, bainhira Abraão foo dizimu ba Melkizedek, Levi mos foo nia parte.

¹⁰ Tanba maski nia seidauk moris iha momentu nebaa, maibee bele konsidera katak, nia bei-ala Abraão foo mos Levi nia parte.

Nai Jesus sai nai-lulik hanesan Melkizedek

¹¹ Tuir lei Moisés nian, nai-lulik sira tenki mai hosi Levi nia jerasaun. Nai-lulik boot primeiru mak Arão. Nai-lulik sira hosi Levi nia jerasaun nee la iha kbiit atu halao buat hotu tuir Maromak nia hakarak. Nee mak ita presiza tan nai-lulik ida oin seluk, nai-lulik ida nebee hanesan Melkizedek, i laos hanesan Arão.

¹² Se troka sistema nai-lulik nian nunee, entaun lei relijiaun mos tenki troka.

^13-14 Nai-lulik ida oin seluk nebee ita temi nee mak ita nia Nai Jesus. Ita hotu hatene katak, Jesus hosi Judá nia jerasaun, laos hosi Levi nian. Ema hosi Judá nia jerasaun nee nunka serbii iha altar nudar nai-lulik, i Moisés mos nunka dehan sira bele sai nai-lulik.

¹⁵ Entaun bainhira Nai Jesus sai nai-lulik hanesan Melkizedek, nee hatudu momoos katak lei relijiaun muda tiha ona.

¹⁶ Nai Jesus sai nai-lulik, laos bazeia ba lei Moisés nian nebee dehan tenki Levi nia jerasaun mak bele sai nai-lulik. Maibee Nia sai nai-lulik tanba Nia iha kbiit atu moris tinan ba tinan.

¹⁷ Iha Livru Sagradu hakerek kona ba Nia nunee: “O sai nai-lulik tinan ba tinan, O hanesan nai-lulik Melkizedek uluk.”

¹⁸ Ho nunee Maromak kansela tiha lei relijiaun ida tuan, tanba lei nee fraku i la iha kbiit atu tulun ema,

¹⁹ tanba la bele halo ema moris loos. Maibee agora ita hetan ona esperansa boot liu, atu nunee ita bele hakbesik ba Nai Maromak.

Nai Jesus boot liu nai-lulik sira hosi Levi nia jerasaun

^20-21 Uluk, bainhira Maromak foti Levi nia jerasaun para sai nai-lulik, Nia la halo juramentu ho sira. Maibee bainhira Maromak foti Jesus sai nai-lulik, Nia jura dehan, “Hau, Nai Maromak, jura tiha ona, i sei la muda Hau nia promesa: O sai nai-lulik tinan ba tinan.”

²² Tanba Maromak jura nunee, Jesus halo ita nia laran metin katak Maromak sei kumpri duni Nia promesa ida nebee forsa liu nee.

²³ Iha tan diferensa ida. Nai-lulik sira seluk barak, tanba sira mate husik hela sira nia serbisu, i nunee troka fali nai-lulik foun.

²⁴ Maibee Jesus moris tinan ba tinan, nunee la iha ema ida atu troka Nia.

²⁵ Tanba nee Jesus iha kbiit hodi salva see deit mak baa iha Maromak liu hosi Nia. Nia bele salva sira agora i too tinan ba tinan, tanba Nia moris nafatin hodi harohan ba Nai Maromak atu tulun sira.

²⁶ Jesus nee Nai-Lulik Boot nebee mak diak liu. Ita presiza teb-tebes nai-lulik ida hanesan nee, tanba Nia ema ida nebee santu, la iha sala, buat aat ida mos la iha. Maromak haketak ona Nia hosi ema sala nain sira hodi foti Nia ba iha fatin aas liu iha lalehan.

²⁷ Nai-lulik sira seluk tenki oho animal loro-loron halo sakrifisiu. Sira hasae uluk sakrifisiu atu hamoos sira nia sala rasik, hotu tiha mak foin hasae fali sakrifisiu hodi hamoos povu nia sala. Maibee Jesus entrega Nia Aan hodi sai sakrifisiu dala ida deit. Nee too ona para Maromak hamoos ema hotu-hotu nia sala too tinan ba tinan.

²⁸ Ema nebee sai nai-lulik boot tuir Moisés nia lei, sira ema nebee iha frakeza. Maibee ikus mai, Maromak jura hodi foti Nia Oan sai Nai-Lulik Boot, i Nia Oan nee perfeitu too tinan ba tinan.