Ebreu 6 - Biblia Tetun Dili

¹ Tanba nee ita tenki lao ba oin hodi aprende buat nebee klean liu. La bele aprende fila-fila lisaun primeiru kona ba Kristu. Tuir loos imi la presiza tan ona buat baziku nebee hanorin ita para husik ita nia sala nebee lori ita ba mate, i hanorin ita atu fiar ba Maromak.

² Imi la presiza tan hanorin kona ba batizmu, kona ba tau liman ba ema para Maromak foo bensaun, hanorin kona ba Maromak sei halo moris fali ema mate, ho hanorin kona ba aban-bainrua Maromak sei tesi ema hotu-hotu nia lia hodi desidi see mak bele hetan moris rohan-laek i see mak hetan kastigu rohan laek.

³ Maibee mai ita muda ba hanorin nebee klean liu, naran katak Maromak autoriza.

⁴ Tanba ema nebee fiar ona ba Kristu, se karik too ikus sira fila kotuk ba Nia, entaun ita atu lori sira husik fali sira nia sala, la bele ona. Tanba sira hetan ona naroman hosi Nai Maromak, sira koko ona bensaun lalehan nian, i sira simu ona Espiritu Santu.

⁵ Sira hatene hosi sira nia esperiensia moris katak Nai Maromak nia liafuan furak teb-tebes. Nai Maromak nia kbiit nebee mak Nia sei hatudu iha tempu ikus mos, sira senti tiha ona.

⁶ Se karik too ikus sira fila kotuk ba Kristu, entaun ita atu halo sira husik sira nia sala hodi fila fali ba Maromak, la bele ona. Tanba sira hanesan prega fila fali Nai Maromak nia Oan iha krus, i halo ema hatete aat Nia iha ema barak nia oin. Sira nia hahalok nee mos lori terus ba sira nia aan rasik.

⁷ Ita bele kompara ema ho rai. Bainhira rai simu bebeik udan been, i depois foo rezultadu diak ba toos nain, Maromak mos foo bensaun ba rai nee.

⁸ Maibee se rai nee nia rezultadu mak ai tarak no duut tarak deit, entaun la iha folin. Maromak sei foo malisan ba rai nee, too ikus sunu motuk tiha.

⁹ Maluk doben sira, maski hau koalia ba imi nunee, maibee hau fiar metin katak imi laos ema nebee fila kotuk ba Kristu, imi sei halo buat nebee diak tanba Maromak salva tiha ona imi.

¹⁰ Nai Maromak nee sempre halo buat nebee loos. Nia sei la haluha imi nia kolen ho imi nia domin ba Nia, tanba hori uluk too agora, imi tulun Maromak nia povu, nee hatudu katak imi mos hadomi Maromak.

¹¹ Ami hakarak atu imi ida-idak hatudu nafatin imi nia domin nee too rohan, atu nunee imi bele laran metin katak, imi sei hetan buat nebee mak Nai Maromak promete tiha ona atu foo ba imi.

¹² Ami lakohi atu imi sai baruk-teen. Maibee imi tenki halo tuir ema sira nebee mak uluk fiar metin ba Nai Maromak hodi hein nafatin ho pasiensia too sira hetan buat nebee mak Maromak promete tiha ona atu foo ba sira.

Maromak nia promesa sei la muda

¹³ Uluk bainhira Maromak promete ba Abraão, Nia halo mos juramentu para hametin Nia promesa nee. La iha ida mak boot liu Maromak. Tanba nee Nia la jura hodi naran seluk, maibee jura hodi Nia naran rasik.

¹⁴ Nia jura dehan, “Hau, Nai Maromak, sei foo bensaun ba o, i Hau sei halo o nia jerasaun sai barak teb-tebes.”

¹⁵ Entaun Abraão hein ho pasiensia, i too ikus hetan duni buat nebee mak Maromak promete ba nia.

¹⁶ Bainhira ema jura, nia temi ida nebee boot liu nia, para ema hatene katak nia sei halo tuir duni buat nebee nia promete ona, i nunee ema la presiza diskuti tan.

¹⁷ Nunee mos ho Nai Maromak. Nia hakarak para ema nebee simu Nia promesa nee, hatene momoos katak buat nebee Nia promete ona sei la muda. Tanba nee, Nia hametin Nia promesa ho juramentu.

¹⁸ Nia promesa ho Nia juramentu nee sei la muda, tanba Maromak nunka bosok. Nunee Nia halo juramentu nee para ita nebee buka mahon ona iha Nia bele laran metin ba Nia promesa nee.

¹⁹ Nunee ita nia laran hakmatek i la nakdoko tan. Tanba ita tama tiha ona iha Maromak nia prezensa, hanesan nai-lulik boot sira tama liu hosi kortina nebee haketak Fatin Lulik no Fatin nebee Lulik Liu.

²⁰ Jesus mak loke dalan ba ita atu tama iha nebaa, tanba Nia tama uluk ona hodi harohan ba ita. Nia sai ona ita nia nai-lulik boot too tinan ba tinan, hanesan Melkizedek uluk.