Ebreu 5 - Biblia Tetun Dili

¹ Bainhira Maromak hili ema ida atu sai nai-lulik boot, Nia sempre hili ema ida hosi povu nia leet hodi foti nia sai povu nia reprezentante iha Maromak nia oin. Nai-lulik boot nia serbisu mak hasae povu nia oferta ba Maromak i oho animal nebee povu lori hanesan sakrifisiu para hamoos sira nia sala.

² Se ema ruma la hatene dalan nebee loos, i lao sees hosi dalan nee, nai-lulik boot iha pasiensia ho ema nee, tanba nia rasik mos ema nebee frakeza.

³ Nia rasik mos monu ba sala, nunee nia tenki oho animal hodi halo sakrifisiu, laos deit ba ema seluk nia sala, maibee ba nia sala rasik mos.

⁴ La iha ema ida bele foti nia aan rasik sai nai-lulik boot, maibee Nai Maromak mak foti nia, hanesan uluk Nia foti Arão.

⁵ Kristu mos nunee. Nia laos foti Nia Aan rasik sai nai-lulik boot, maibee Nai Maromak mak foti Nia para kaer kargu boot nee. Maromak dehan, “O Hau nia Oan. Iha loron ida nee Hau deklara sai katak Hau nee O nia Aman.”

⁶ Iha fatin seluk Maromak mos dehan, “O sai nai-lulik too tinan ba tinan, O hanesan nai-lulik Melkizedek uluk.”

⁷ Bainhira Jesus sei moris iha mundu nee nudar ema, Nia harohan ho tanis hakilar ba Nai Maromak, tanba Nai Maromak mak bele salva Nia hosi mate. I Nai Maromak rona Nia orasaun, tanba Jesus haraik aan hodi hakruuk ba Maromak.

⁸ Jesus nee Nai Maromak nia Oan. Maski nunee Nia hetan terus nudar ema para moris tuir Maromak nia hakarak.

⁹ Nee mak Nia serve atu sai salvador hodi salva ema nebee halo tuir Nia hakarak para sira bele hetan moris rohan-laek.

¹⁰ I Nai Maromak foti Nia para sai nai-lulik boot hanesan Melkizedek uluk.

Keta fila kotuk ba Jesus Kristu

¹¹ Sei iha buat barak mak hau hakarak koalia kona ba Kristu ho Melkizedek, maibee hau atu esplika ba imi susar, tanba imi ulun fatuk toos.

¹² Tuir loloos, imi sai ona mestri hodi hanorin ema seluk. Maibee buat baziku hosi Maromak nia liafuan mos, imi seidauk hatene, imi presiza nafatin ema seluk atu hanorin imi. Imi hanesan bebee nebee sei susu deit, i seidauk bele haan hahaan toos.

¹³ Ema nebee sei susu, nia hanesan labarik kiik-oan, nia seidauk hatene hanorin kona ba lia loos.

¹⁴ Maibee hahaan toos ita foo deit ba ema nebee boot ona, nee dehan katak ema nebee hatoman aan tetu buat hotu-hotu too hatene loloos ona saida mak diak, saida mak aat.