Ebreu 4 - Biblia Tetun Dili

See mak fiar Nai Maromak sei hetan deskansa hamutuk ho Nia

¹ Maromak promete ona atu Nia povu bele tama ba iha Nia fatin deskansa, i Nia promesa nee sei vale nafatin. Maibee kuidadu! Keta halo be imi balu la tama iha nebaa.

² Tanba ema foo sai tiha ona Nai Maromak nia Novidade Diak ba imi, hanesan mos uluk ema foo sai ba ita nia bei-ala sira. Maibee liafuan nebee sira rona nee la iha folin ba sira, tanba sira la fiar.

³ Ita nebee fiar Maromak nia liafuan bele tama iha fatin deskansa nee. Maibee kona ba ema nebee la fiar, Nai Maromak hatete, “Hau hirus too Hau jura dehan, ‘Ema sira nee sei la tama iha Hau nia fatin deskansa.’ ” Nai Maromak jura nunee, afinal uluk kedas Nia prepara tiha ona fatin deskansa nee bainhira Nia remata halo lalehan ho rai.

⁴ Iha Livru Sagradu hakerek nunee kona ba deskansa nee: “Too iha loron dahitu, bainhira Nai Maromak nia serbisu hotu ona, Nia mos deskansa.”

⁵ Maibee iha liafuan ohin nee, Nai Maromak bandu dehan, “Ema sira nee sei la tama iha Hau nia fatin deskansa.”

⁶ Nee dehan katak, ema nebee uluk rona Maromak nia Novidade Diak maibee la halo tuir, sira la tama ba fatin deskansa nee. Maibee sei iha ema seluk mak bele tama.

⁷ Tanba nee mak liu tiha tinan barak nia laran, Maromak foo sai dehan Nia hili fali tempu seluk para ema bele tama iha Nia fatin deskansa. Tempu nee mak ꞌloron ohinꞌ. Maromak foo sai kona ba tempu nee liu hosi liurai David, hanesan hau foin temi dadauk nee: “Iha loron nee, se imi rona Nai Maromak nia liafuan, la bele ulun toos.”

⁸ Uluk bainhira Josué lori ita nia bei-ala sira tama ba rai nebee Maromak promete ba sira, Josué la lori sira tama ba iha fatin deskansa loloos iha nebaa. Nee mak Maromak koalia fali kona ba tempu seluk.

⁹ Nunee ita hatene katak Maromak prepara ona tempu seluk para Nia povu deskansa, hanesan Nia mos deskansa iha loron hitu.

¹⁰ Ema nebee tama ona hodi deskansa hamutuk ho Nai Maromak, nia para ona hosi nia serbisu, hanesan mos Maromak deskansa bainhira Nia halo remata lalehan ho rai ho buat hotu-hottu iha laran.

¹¹ Tanba nee, mai ita hakaas aan nafatin hodi tama ba iha deskansa nee. Keta halo be iha balu monu tanba halo tuir fali ita nia bei-ala sira nebee lakohi rona Nai Maromak.

¹² Tanba Nai Maromak nia liafuan nee moris i makaas teb-tebes. Nia liafuan nee kroat liu fali surik ida nebee oin-kotuk kroat hotu. Nia bele sona borus too ita nia laran, bele sona borus too haketak ita nia ruin ho uat hotu. Nia liafuan nee iha kbiit tama liu ba ita nia fuan ho laran hodi tetu ita nia hanoin ho ita nia hakarak hotu.

¹³ Iha lalehan ho rai la iha buat ida mak bele subar hosi Nai Maromak. Ba Nia, buat hotu-hotu nakloke, Nia haree borus. Too loron ida ita tenki hataan iha Maromak nia oin kona ba buat hotu-hotu nebee ita halo.

Jesus nudar nai-lulik boot

¹⁴ Nee duni ita tenki kaer metin ita nia fiar. Tanba ita iha nai-lulik boot ida. Nia tama tiha ona too iha Nai Maromak nia futar oin. Nia mak Jesus, Maromak nia Oan.

¹⁵ Ita nia nai-lulik boot nee komprende liu ita, Nia hatene katak ita ema nee fraku. Nia hatene tulun ita tanba uluk Nia rasik hasoru tentasaun hotu-hotu hanesan mos ita. Maski nunee, Nia nunka monu ba sala.

¹⁶ Entaun mai ita brani hakbesik aan ba Nai Maromak. Nia mak ukun buat hotu-hotu, i Nia sempre hatudu Nia grasa mai ita. Se ita hakbesik aan ba Nia, Nia sei hatudu domin mai ita hodi tulun ita iha tempu susar nia laran.