Ebreu 3 - Biblia Tetun Dili

Nai Jesus boot liu Moisés

¹ Maun-alin sira, Maromak hili ona imi atu moris ho laran moos, i hili mos imi atu tama iha lalehan. Imi tenki hanoin klean kona ba Jesus. Ita rekonhese ona katak Nia mak Ida nebee Nai Maromak haruka, i Nia mak ita nia nai-lulik boot.

² Bainhira Nai Maromak haruka Jesus mai, Jesus halo tuir loloos Nai Maromak nia hakarak, hanesan mos Moisés uluk halo tuir Nai Maromak nia hakarak hodi serbii Nai Maromak nia povu hotu.

³ Maibee Jesus mak merese simu respeitu liu fali Moisés. Ita bele kompara ho ema nebee halo uma, ema seluk gaba liu ema nee duke sira gaba uma nebee nia halo.

⁴ Uma ida-idak, ema mak halo, maibee buat hotu-hotu nebee iha, Nai Maromak mak halo.

⁵ Moisés halo tuir Maromak nia hakarak hodi serbii Maromak nia povu nudar atan ida iha Maromak nia uma laran. I nia koalia kona ba buat nebee mak Nai Maromak atu foo sai aban-bainrua.

⁶ Maibee Jesus Kristu halo tuir Maromak nia hakarak hodi toma konta Maromak nia uma laran nudar Maromak nia Oan rasik. Ita nee mak halo parte iha Maromak nia familia iha Nia uma laran, naran katak ita kaer metin ita nia fiar i laran metin nafatin ba promesa nebee Maromak foo ona mai ita.

La bele ulun toos kontra Nai Maromak

⁷ Tanba nee mak imi tenki halo tuir buat nebee Espiritu Santu dehan, “Iha loron ida nee, se imi rona Nai Maromak nia liafuan,

⁸ la bele ulun toos hanesan imi nia bei-ala sira uluk kontra Nai Maromak hodi koko Nia iha rai fuik maran”.

⁹ Maromak dehan, Durante tinan haat-nulu nia laran, sira haree Hau nia milagre, maibee sira koko Hau nafatin.

¹⁰ Tanba nee mak Hau hirus sira hodi dehan, ‘Ema sira nee sempre fila kotuk mai Hau, i lakohi rona Hau nia liafuan.’

¹¹ Hau hirus too Hau jura dehan, ‘Ema sira nee sei la tama iha Hau nia fatin deskansa.’ ”

¹² Nunee maun-alin sira, matan moris neon nain! Kuidadu para imi la halo sala iha imi nia laran i la fiar metin ba Nia too fila kotuk ba Maromak nebee Moris.

¹³ Maibee foo hanoin ba malu loro-loron, para imi la bele monu ba sala hodi tuir fali lia bosok i nunee sai ulun toos kontra Maromak. Agora mak tempu atu foo hanoin ba malu, tanba agora sei tama hela iha tempu nebee Espiritu Santu bolu ꞌohin loronꞌ.

¹⁴ Ita sai ona laran ida ho Jesus Kristu, naran katak ita kaer metin nafatin ita nia fiar hosi huun too rohan.

¹⁵ Hanesan ohin hatete tiha ona: “Iha loron ida nee, se imi rona Nai Maromak nia liafuan, la bele ulun toos hanesan imi nia bei-ala sira uluk kontra Nai Maromak.”

¹⁶ See mak rona Nai Maromak nia liafuan maibee kontra fali nee? Sira nee mak ita nia bei-ala sira nebee Moisés rasik foin lori sai hosi rai Ejitu iha tempu nebaa.

¹⁷ Durante tinan haat-nulu nia laran Nai Maromak hirus see? Nia hirus ita nia bei-ala sira tanba sira halo sala, too sira mos mate i sira nia ruin namkari naklekar iha rai fuik maran.

¹⁸ Momentu nebaa Maromak jura dehan, “Ema sira nee sei la tama iha Hau nia fatin deskansa.” Nia koalia kona ba see? Nia koalia kona ba ema sira nebee mak lakohi halo tuir Nia.

¹⁹ Nunee ita hatene ona katak, sira la tama iha fatin deskansa nee, tanba sira lakohi fiar ba Nai Maromak.