Ebreu 2 - Biblia Tetun Dili

Kaer metin lia loos kona ba salvasaun

¹ Tanba nee, ita tenki kaer metin liu tan lia loos nebee ita rona tiha ona, para ita la bele husik ita nia fiar.

² Uluk anju sira hatoo Maromak nia lia menon ba ita nia bei-ala sira. Buat nebee anju sira hatoo nee loos, i see mak kontra, nia simu kastigu tuir nia hahalok.

³ Saa tan salvasaun nebee mak Nai Jesus foo. Salvasaun nee boot teb-tebes, i see mak la interese, nia sei la sees hosi Maromak nia kastigu. Tanba salvasaun nee Nai Jesus rasik mak foo sai uluk, i ema sira nebee rona hatudu mai ita katak Nia liafuan nee loos.

⁴ Nai Maromak mos halo milagre ho sinal oi-oin nebee halo ema admira. I Nia foo Nia Espiritu ba ema hodi foo kbiit oi-oin ba sira, tuir Nia hakarak. Nia halo buat sira nee hotu para hatudu mai ita katak Jesus nia liafuan nee loos duni.

Nai Jesus sai ema hodi salva ita

⁵ Ita koalia kona ba mundu foun nebee sei mai. Mundu foun nee laos foo ba anju sira mak ukun.

⁶ Iha Livru Sagradu hakerek, “Nai Maromak, ami ema kriatura nee see, too Ita Boot interese ami? Ami nee ema nia oan deit, nebee la merese Ita Boot tau matan mai ami.

⁷ Ita Boot halo ema kiik liu ituan anju sira, Ita Boot foo pozisaun aas ba ami i foti aas ami nia naran.

⁸ Ita Boot halo buat hotu-hotu hakruuk iha ami nia ain okos.” Tuir liafuan nee, Maromak foti ita ema para ukun buat hotu-hotu. Nee dehan katak, buat hotu-hotu tenki hakruuk ba ita ema. Maski nunee, agora ita seidauk haree buat sira nee iha ita nia moris.

⁹ Maibee iha Ida mak bele ukun buat hotu-hotu, Nia nee mak Jesus. Nia sai ema mai iha mundu nee ho pozisaun kiik liu anju sira. Nudar ema, Nia hetan terus too mate iha kruz. Nia halo nunee hodi hatudu Nai Maromak nia grasa ba ema. Depois Nai Maromak foti aas Nia, para Nia ukun buat hotu nebee Maromak halo ona.

¹⁰ Nai Maromak halo lalehan ho rai ho buat hotu-hotu nebee iha, nee tanba Nia. Nia mak desidi katak Jesus tenki terus, i liu hosi Nia terus nee, Maromak dehan Nia bele loke dalan ba ita ema hodi simu salvasaun. Maromak nia desizaun diak teb-tebes, nunee lori ema barak hamutuk ho Nia ba iha naroman nabilan nian.

¹¹ Bainhira Jesus hamoos ema ida nia sala, ema nee sai Maromak nia oan. Nunee Jesus ho ema sira nebee Nia halo moos ona nee, hotu-hotu nia Aman ida deit. Nee mak Jesus la moe bolu ita dehan, imi nee Hau nia alin.

¹² Nia dehan ba Nai Maromak, “Hau sei foo sai ba Hau nia alin sira kona ba Ita Boot nia diak. Hau sei hananu hahii Ita Boot iha sira nia leet.”

¹³ Jesus mos dehan, “Hau laran metin nafatin ba Nai Maromak.” Nia dehan tan, “Hau mak nee, Hau hamutuk ho Maromak nia oan sira nebee mak Nai Maromak foo ona mai Hau.”

¹⁴ Maromak nia oan sira nee iha isin ho raan. Nunee Jesus rasik mos sai ema hanesan ita ema kriatura para Nia bele mate, i liu hosi Nia mate, Nia bele manaan diabu, ida nebee mak ukun mate.

¹⁵ Liu hosi nee mos, ema sira nebee tauk mate too sira sai atan ba mate agora Jesus hasai ona sira nee hosi sira nia tauk mate.

¹⁶ Jesus laos tulun anju sira, maibee Nia tulun ita ema nebee mai hosi Abraão nia jerasaun.

¹⁷ Tanba nee, Jesus tenki sai hanesan loloos Nia alin sira, para Nia bele sai nai-lulik boot ida nebee hadomi ho komprende teb-tebes ita hodi serbii Nai Maromak ho laran tomak. Nia foo Nia aan hanesan sakrifisiu para Maromak bele hamoos ita ema nia sala.

¹⁸ Nia rasik terus bainhira hetan tentasaun. Tanba nee Nia bele tulun ita bainhira ita mos hetan tentasaun.