Ebreu 13 - Biblia Tetun Dili

Ita tenki dame ho ema seluk

¹ Hadomi nafatin imi nia maluk sarani hanesan maun-alin.

² Keta haluha hatudu laran diak hodi simu bainaka iha imi nia uma. Tanba ema balu simu tiha bainaka, sira hanoin dehan ema baibain, afinal bainaka nebee sira simu nee anju.

³ Hanoin ba ema dadur sira, hanesan imi mos dadur hamutuk ho sira. I hanoin mos ema sira nebee hetan terus tanba ema halo aat sira, hanesan imi rasik mak hetan terus nee.

⁴ Ema hotu-hotu tenki respeita kazamentu. Feen-laen tenki foo laran ba malu. Tanba see mak iha relasaun seksual ho ema nebee laos nia feen ka laen, Nai Maromak sei kastigu nia.

⁵ La bele kaan teen ba osan, maibee tenki kontenti ho buat nebee mak imi iha. Tanba Nai Maromak rasik dehan nunee: “Hau sei la haluha imi, Hau sei la husik imi mesak.”

⁶ Tanba nee ita laran metin hodi dehan, “Nai Maromak sempre tulun hau. Nunee hau sei la tauk. See mak bele halo aat mai hau?”

La bele fila fali ba regra relijiaun antigu, maibee fiar deit ba Jesus Kristu

⁷ La bele haluha imi nia lider sira nebee foo sai ona Nai Maromak nia liafuan ba imi. Hanoin didiak no haree ba sira nia moris. Halo tuir sira nia ezemplu diak nebee sira halo iha sira nia moris loro-loron, i halo tuir sira nia fiar.

⁸ Tanba Jesus Kristu nunka muda; hori uluk, ohin loron no too tinan ba tinan nafatin.

⁹ Nunee se ema ruma hanorin buat falsu oi-oin, keta halo tuir hodi sees hosi dalan loos. Atu hametin imi nia laran, imi tenki depende ba Maromak nia grasa. La bele depende fali ba regra kona ba haan-hemu, tanba regra sira nee la iha folin mai ita.

¹⁰ Uluk liu, iha Nai Maromak nia uma kreda nia liur, iha altar ida hodi halo sakrifisiu. Nai-lulik nia xefi nebee serbii iha nebaa, iha direitu hodi haan naan restu iha meza nee. Maibee agora ita iha fali meza seluk, nunee xefi relijiaun uluk la iha ona direitu haan iha nebaa.

¹¹ Tuir sistema uluk, nai-lulik nia xefi tinan-tinan oho animal lori nia raan baa oferese iha Fatin nebee Santu Liu, atu Maromak hamoos povu nia sala. Depois animal nee nia isin lori sai hosi povu nia hela fatin hodi baa sunu iha liur.

¹² Nunee mos ho Jesus. Nia terus too mate laos iha sidade laran, maibee iha liur, para hodi Nia raan nee Nia hamoos povu nia sala.

¹³ Tanba Jesus mate iha liur, mai ita mos sai hosi sistema uluk nian hodi baa hamutuk ho Nia iha liur nebaa. I kuandu ema hatete aat ita hanesan mos sira hatete aat Nia, ita tenki simu.

¹⁴ Tanba iha mundu nee, la iha sidade ida nebee permanente ba ita hodi hela. Maibee ita hein atu aban-bainrua bele hela iha sidade ida nebee permanente.

¹⁵ Tanba nee, mai ita hahii bebeik Nai Maromak i sempre foti aas Nia naran liu hosi Jesus. Ida nee sai hanesan ita nia sakrifisiu ba Nai Maromak, tanba ita foo sai katak Maromak mak ita nia Nai.

¹⁶ La bele haluha halo diak ba ema seluk, i se sira presiza buat ruma, ajuda sira. Tanba hahalok nee mos hanesan sakrifisiu nebee ita foo ba Nai Maromak hodi halo haksolok Nia laran.

¹⁷ Imi tenki rona no halo tuir imi nia lideransa. Tanba sira tau matan ba imi loron-kalan, i aban-bainrua sira sei hataan ba Nai Maromak kona ba sira nia serbisu nee. Se imi rona duni sira, maka sira sei halao sira nia serbisu ho laran haksolok. Se lae, sira nia laran tristi, i nee la diak ba imi.

Liafuan ikus hosi hakerek nain

¹⁸ Halo orasaun mai ami nafatin. Ami laran metin katak ami nia laran moos, i ami sempre hakarak atu halo buat nebee loos.

¹⁹ Hau husu liu-liu atu imi harohan para hau bele fila lalais ba imi.

²⁰ Nai Maromak mak dame nain. Nia mak halo moris fali Nai Jesus hosi mate. Liu hosi Jesus nia mate nee, Maromak halo metin Nia aliansa ho ita ema, i Nia aliansa nee vale nafatin too tinan ba tinan. Liu hosi Nia mate mos Jesus agora sai ona Bibi Atan diak liu hodi tau matan ba Nia bibi sira. Nunee hau harohan atu

²¹ Maromak foo saida deit mak imi presiza atu imi bele halo tuir Nia hakarak. Hau mos harohan atu Nia serbisu nafatin iha ita hotu nia laran liu hosi Jesus Kristu nia tulun, para ita sai ema nebee mak halo haksolok Nia laran. Mai ita foti aas Nia naran too tinan ba tinan nafatin. Amen.

Saloom

²² Maun-alin sira, hau hakerek surat ida nee para hametin imi nia laran. Hau husu para imi simu didiak surat nee, tanba la naruk ida.

²³ Hau hakarak foo hatene ba imi katak ita nia maluk Timóteo sai tiha ona hosi komarka. Se nia too mai iha tempu badak, entaun hau sei lori nia baa vizita imi.

²⁴ Hatoo hau nia kumprimentus ba imi nia lider sira hotu, ho mos ba Nai Maromak nia ema sira hotu-hotu. Maluk sira hosi Itália mos foo kumprimentus ba imi.

²⁵ Nai Maromak nia grasa hamutuk ho imi hotu.