Ebreu 12 - Biblia Tetun Dili

Hakaas aan hodi tuir Jesus nia ezemplu

¹ Entaun, oinsaa ho ita agora? Ita hanesan ema nebee halai taru. Ita nia bei-ala sira sai ona sasin kona ba fiar, i agora sira haleu hela ita hodi asisti. Tanba nee mai ita soe tiha naha todan nebee halo ita halai la bele, liu-liu ita nia sala nebee kesi metin ita. Mai ita hakaas aan halai nafatin too rohan tuir dalan nebee Maromak hatudu ona ba ita.

² Ita tenki hateke deit ba Jesus, tanba ita nia fiar mai hosi Nia, i Nia mak halo ita nia fiar sai metin too rohan. Bainhira Jesus terus iha krus, Nia aguenta ho pasiensia i la interese katak mate iha krus nee moe boot ida, tanba Nia hatene katak, Maromak sei halo Nia laran haksolok. I sai nunee duni. Agora Jesus tuur hela iha Nai Maromak nia sorin kuana.

³ Hanoin didiak kona ba Jesus. Bainhira ema aat sira kontra makaas Nia, Nia aguenta nafatin. Hanoin nafatin Nia ezemplu nee, para imi la bele lakon esperansa no dezanima.

Maromak foo disiplina ba ita, hanesan aman foo disiplina ba nia oan

⁴ Imi luta ona hasoru buat aat, maibee seidauk luta too imi nia raan fakar.

⁵ Keta halo be imi haluha ona Maromak nia liafuan domin nebee bolu imi nee Nia oan. Nia dehan nunee: “Hau nia oan, bainhira Nai Maromak foo disiplina ba imi, la bele hanoin katak buat nee la iha folin ba imi, la bele lakon esperansa bainhira Nia kastigu imi.

⁶ Tanba Nai Maromak foo disiplina ba ema nebee Nia hadomi, i kastigu ema nebee Nia konsidera hanesan Nia oan.”

⁷ Nunee, bainhira imi hetan terus ho susar, aguenta ho pasiensia baa. Tanba terus nee hatudu katak Nai Maromak hanorin imi hanesan aman ida hanorin nia oan. Aman sira hotu-hotu foo disiplina sira nia oan.

⁸ Se Maromak la foo disiplina ba imi hanesan mos Nia foo ba ema sira seluk, nee dehan katak imi laos Maromak nia oan duni.

⁹ Ita baibain respeita ita nia aman sira iha mundu tanba sira foo disiplina mai ita. Se nunee, saa tan ita nia Aman iha lalehan, ita tenki respeita liu tan hodi hakruuk ba Nia para ita bele hetan moris rohan-laek.

¹⁰ Ita nia aman sira iha mundu nee foo disiplina mai ita iha tempu badak, tuir sira nia matenek deit. Maibee Nai Maromak foo disiplina mai ita para tulun ita, atu ita bele moris ho laran moos hanesan Nia.

¹¹ Bainhira Maromak foo disiplina mai ita ka ema ruma foo disiplina mai ita, ita senti tristi, laos kontenti. Maibee se ita aprende ona hosi buat sira nee, too ikus ita nia laran hakmatek, tanba ita moris loos.

^12-13 12 Tanba nee halo forti imi nia liman nebee mak fraku, i hametin imi nia ain tuur para la bele nakdedar. 13 Lao nafatin tuir dalan loos para imi nia belun sira nebee lao kudik keta sai aat liu tan, maibee bele hetan kura hodi lao ba oin nafatin.

La bele fila kotuk ba Nai Maromak

¹⁴ Hakaas aan para moris dame ho ema hotu-hotu. I buka atu moris ho laran moos, tanba so ema nebee moris ho laran moos mak aban-bainrua bele haree Nai Maromak.

¹⁵ Foo korajen ba malu nafatin para la bele iha ema ida hosi imi nia leet dada aan hosi Maromak nia grasa. Kuidadu para imi ida la bele sai hanesan ai abut ida nebee moruk hodi estraga ema nia moris too dada sira tuir fali dalan nebee la loos.

¹⁶ Kuidadu para ema ida la bele halo sala seksual, ka moris la respeita Nai Maromak, hanesan Esaú. Uluk Esaú nee faan tiha nia direitu nudar oan mane boot para hetan deit hahaan bikan ida.

¹⁷ Imi hatene katak, too ikus Esaú hakarak atu simu bensaun nee hosi nia aman, maibee la bele ona. Maski nia husu ho tanis mos, nia la bele hetan fali buat nebee uluk nia soe tiha ona nee.

¹⁸ Imi mai ona iha Nai Maromak nia prezensa, maibee laos ona hanesan uluk bainhira Nai Maromak hatuun nia aliansa ba povu Israel iha foho Sinai. Sira baa iha foho ida nebee ema bele haree ho matan. Iha foho Sinai nee nia tutun, ahi lakan boot ho anin boot, i nakukun falun metin foho nee.

¹⁹ Iha momentu nebaa sira rona korneta lian. Sira mos rona Maromak nia lian makaas teb-tebes, too sira husu ho tauk para la bele rona tan Maromak nia lian nee.

²⁰ Tanba sira la aguenta ho orden nebee haruka sira dehan, “Ema ka animal saida deit mak lao sama foho nee, tenki tuda ho fatuk too mate.”

²¹ Buat nebee povu Israel haree nee, halo sira tauk teb-tebes too Moisés mos dehan, “Hau tauk teb-tebes ho nakdedar.”

²² Maibee agora imi mai iha Nai Maromak nia prezensa iha Jerusalém lalehan nian, iha foho Siaun, iha Maromak nebee Moris nia hela fatin. Iha nebaa anju tookon ba tookon halibur hamutuk ho haksolok.

²³ Iha mos ema sira nebee fiar ba Kristu halibur hamutuk. Sira hotu nia naran hakerek ona iha lalehan. Imi mai ona iha Nai Maromak. Nia mak Juis nebee sei tesi ema hotu-hotu nia lia. Imi mai iha sira nebee mak uluk moris loos. Agora Maromak halo sira sai moos liu ona, sala ituan mos la iha.

²⁴ Imi mai ona iha Jesus. Nia mak sai mediador hodi lori Nai Maromak nia aliansa foun mai ita ema, i Nia raan fakar too mate hodi salva ita. Nunee Nia raan nee diak liu Abel nian.

²⁵ Tanba nee bainhira Nai Maromak koalia ba imi, see tilun didiak hodi rona. Uluk Moisés hatoo Maromak nia liafuan iha mundu nee, maibee ita nia bei-ala sira lakohi rona. Nee mak Maromak kastigu sira. Saa tan ita, se ita lakohi rona Maromak koalia mai ita hosi lalehan.

²⁶ Iha Moisés nia tempu, Maromak nia lian makaas teb-tebes, halo rai nakdoko. Maibee agora Nia promete dehan, “Hau sei halo rai nakdoko tan dala ida. Laos deit rai, maibee iha loro leten mos sei nakdoko hotu.”

²⁷ Liafuan “dala ida tan” hatudu katak, too iha ikus buat hotu-hotu nebee Maromak halo sei nakdoko too lakon tiha hotu. So buat nebee metin too tinan ba tinan mak sei hela nafatin.

²⁸ Nee duni, mai ita agradese ba Nai Maromak, tanba Nia simu ita sai Nia reinu, i Ninia ukun la nakdoko. Mai ita adora Nia ho respeitu ho hamtauk tuir Nia hakarak.

²⁹ Tanba ita nia Maromak hanesan ahi lakan boot nebee haan motuk too mohu.