Ebreu 11 - Biblia Tetun Dili

Bei-ala sira nebee fiar ba Nai Maromak

¹ Entaun fiar nee saida loos? Fiar ba Nai Maromak dehan katak, ita laran metin nafatin ba buat nebee ita hein atu simu, i ita la duvida katak, buat nebee ita seidauk haree ho matan, iha duni.

² Ita nia bei-ala sira nia fiar hanesan nee. Tanba nee mak Nai Maromak simu sira ho laran haksolok.

³ Tanba ita fiar ba Nai Maromak mak ita bele komprende katak, bainhira Maromak halo lalehan ho rai, Nia halo hotu liu hosi Nia liafuan. Nia koalia deit mak lalehan ho rai iha kedas. Nunee, buat nebee ita haree, Nia halo hosi buat nebee mak ita ema la haree.

Abel

⁴ Abel fiar ba Nai Maromak. Nee mak nia foo ba Maromak sakrifisiu ida nebee diak liu Kaín nian. Tanba Abel nia fiar mak Maromak simu nia sakrifisiu i konsidera nia ema ida nebee moris loos. Nunee, maski Abel mate kleur ona, maibee ita bele aprende nafatin hosi nia fiar.

Enoke

⁵ Enoke fiar ba Nai Maromak. Nee mak nia la mate, maibee Maromak foti sae nia ba lalehan. Ema buka nia mos la hetan, tanba Maromak lori tiha ona nia. Molok Nai Maromak foti sae nia, Maromak dehan katak, Enoke ema ida ke halo haksolok Maromak nia laran.

⁶ Se ita la fiar ba Nai Maromak, ita la bele halo haksolok Maromak nia laran. Tanba ita tenki fiar katak Maromak iha duni, i ita mos tenki laran metin katak Nia sei foo premiu ba ema nebee buka teb-tebes Nia. Nee mak foin ita bele hakbesik ba Nia.

Noé

⁷ Noé fiar ba Nai Maromak. Nee mak bainhira Maromak foo hatene dehan, Nia atu halo rai nabeen, Noé mos rona. Maski Noé seidauk haree buat nee, maibee nia hakruuk ba Nai Maromak hodi halo roo para salva nia aan ho mos nia familia. Tanba nia fiar nee, Maromak konsidera nia ema ida nebee moris loos. Maibee ema sira seluk iha tempu nebaa hetan kastigu too mate mohu tanba sira la fiar ba Maromak hanesan Noé.

Abraão

⁸ Abraão fiar ba Nai Maromak. Nee mak bainhira Maromak bolu nia i haruka nia baa iha rai nebee Maromak promete atu foo ba nia, nia halo tuir deit. Abraão baa deit, maski nia la hatene atu baa loos nebee.

⁹ Too tiha rai nebee Maromak promete atu foo ba nia nee, nia fiar nafatin. Nee mak nia prontu moris hanesan ema lao rai hodi hela iha tenda okos deit. Maromak nia promesa nebee Abraão simu nee tuun mos ba nia oan Isac ho nia bei-oan Jacó, i sira mos moris hanesan ema lao rai nafatin.

¹⁰ Abraão hein ho pasiensia tanba nia laran metin katak, aban-bainrua nia sei hela iha sidade ida nebee hela metin tanba Nai Maromak rasik mak harii tuir Nia hakarak.

Sara

¹¹ Tanba Abraão fiar ba Nai Maromak mak nia kaben Sara bele hetan oan, maski sira nain rua ferik-katuas liu ona, i desde uluk kedas Sara la bele hetan oan. Maibee too ikus sira hetan duni oan tanba Abraão fiar katak Maromak sei halo tuir Nia promesa.

¹² Iha momentu nebaa Abraão katuas liu ona, maibee ikus mai nia jerasaun barak teb-tebes too ema sura la bele, hanesan fitun iha lalehan ho rai henek iha tasi ibun.

Bei-ala sira nebee fiar, laran metin ba rai eransa nebee Maromak sei foo ba sira

¹³ Ema sira nee fiar nafatin ba Nai Maromak too mate. Iha sira nia moris sira seidauk simu buat nebee Maromak promete ona ba sira. Maski nunee, maibee sira hein nafatin ho laran haksolok, hanesan ema nebee haree ona buat sira nee hosi dook. Sira dehan katak, sira hanesan ema nebee mai hosi rai liur ka ema lao rai deit iha mundu nee.

¹⁴ Ema nebee koalia nunee hatudu katak sira buka nafatin rai ida hodi sai sira nia rain rasik.

¹⁵ Rai nebee sira husik ona nee, sira la hanoin tan ona. Se karik sira hanoin nafatin rai ida uluk nee, entaun sira bele fila fali baa hela iha nebaa.

¹⁶ Maibee sira nia hakarak mak fatin ida nebee diak liu, fatin nee mak iha lalehan. Nee mak bainhira sira dehan, Maromak mak sira nia Nai, nee halo Nia laran haksolok, tanba Nia prepara tiha ona sidade ida ba sira iha lalehan.

Abraão entrega nia oan Isac

^17-18 Tanba Abraão fiar ba Nai Maromak mak bainhira Nai Maromak haruka nia oho nia oan Isac nudar sakrifisiu ba Maromak, Abraão prontu halo tuir. Isac nee Abraão nia oan mane mesak, i Maromak hatete ona ba nia dehan, “Liu hosi Isac mak o sei hetan jerasaun nebee Hau promete ona ba o.” Maski nunee, Abraão foo nia oan atu sai sakrifisiu ba Maromak,

¹⁹ tanba nia laran metin katak, Nai Maromak bele halo moris fali ema mate. I momentu nebaa, hanesan fali Abraão simu duni nia oan hosi mate, tanba Maromak salva tiha nia.

Isac

²⁰ Isac fiar ba Nai Maromak. Nee mak bainhira nia katuas ona, nia foo hatene ba nia oan Jacó ho Esaú kona ba bensaun nebee mak sira atu simu aban-bainrua.

Jacó

²¹ Jacó fiar ba Nai Maromak. Nee mak bainhira nia besik atu mate, nia harohan ba Maromak para foo bensaun ba José nia oan ida-idak. Depois Jacó hakruuk kaer ai tonka hodi adora Maromak.

José

²² José fiar ba Nai Maromak. Nee mak bainhira nia atu mate, nia hatete katak, Nai Maromak sei lori povu Israel sai hosi rai Ejitu. I nia rai hela lia menon ba sira, para bainhira sira sai hosi Ejitu, sira tenki lori Jacó nia mate ruin.

Moisés nia inan-aman

²³ Moisés nia inan-aman fiar ba Nai Maromak. Nee mak bainhira nia moris mai, sira subar nia durante fulan tolu, tanba sira haree katak sira nia oan nee oin kapaas loos. Sira la tauk atu kontra liurai Ejitu nia orden nebee dehan, se ema Israel nia oan moris mai mane, tenki oho kedas.

Moisés

²⁴ Moisés fiar ba Nai Maromak. Nee mak bainhira nia boot ona, nia lakohi atu ema konsidera nia hanesan liurai Ejitu nia oan feto nia oan, maski liurai nia oan feto mak hakiak nia desde kiik.

²⁵ Tuir nia hanoin, diak liu nia terus hamutuk ho Maromak nia povu Israel, duke iha tempu badak nia laran nia moris goza deit ho sala.

²⁶ Iha tempu nebaa ema hatete aat nia tanba nia laran metin ba Kristu, Ema nebee Nai Maromak promete ona hori uluk atu haruka mai. Maibee Moisés konsidera terus ida nee folin liu fali rikusoin rai Ejitu nian tomak, tanba nia laran metin atu aban-bainrua Maromak foo fali buat nebee diak liu tan ba nia.

²⁷ Tanba Moisés nia fiar mak bainhira nia sai hosi Ejitu, nia la tauk liurai nia hirus, tanba nia hanesan ke haree tiha ona Nai Maromak, maski ita ema la bele haree.

²⁸ Tanba Moisés nia fiar mak nia haruka povu Israel halo festa Paskua ba dala uluk. Nia haruka sira hisik bibi nia raan iha sira nia odamatan. Nunee anju nebee Maromak haruka ba oho ema ejitu nia oan mane boot sira hotu-hotu iha rai Ejitu, maibee la tama baa oho ema Israel nia oan sira nia oan.

Ita nia bei-ala sira

²⁹ Povu Israel fiar ba Nai Maromak. Nee mak sira lao hakur Tasi Mean hanesan fali sira lao iha rai maran. Tropas Ejitu sira duni tuir, maibee sira mout mate hotu iha tasi laran.

Rahab

³⁰ Tanba povu Israel nia fiar mak sira lao haleu sidade Jerikó too loron hitu, i sidade nee nia muru mos rahun hotu.

³¹ Rahab, feto luroon iha sidade Jerikó, fiar ba Nai Maromak. Nee mak bainhira Israel nia espiaun sira too iha Jerikó, nia simu ho diak. Too ikus Maromak halo mate hotu ema Jerikó sira nebee lakohi rona ba Nia, maibee Nia salva Rahab tanba nia fiar.

Ema seluk mos fiar ba Nai Maromak

³² Hau sei bele koalia naruk tan kona ba ema seluk nebee fiar ba Nai Maromak. Maibee tempu la too atu konta hotu kona ba Gideão, Barak, Sansão, Jefté, David, Samuel, ho Nai Maromak nia profeta sira seluk.

³³ Sira hotu fiar ba Nai Maromak. Nee mak sira balu manaan nasaun seluk, balu ukun nasaun ho loloos, i balu simu buat nebee Nai Maromak promete atu foo ba sira. Balu taka leaun nia ibun,

³⁴ balu hamate ahi lakan boot, i balu konsege halai sai hosi ema nebee atu oho sira ho surik. Balu la iha forsa maibee Maromak foo forsa ba sira. Balu sai funu nain makaas too sira duni sai tropas inimigu nebee mai hosi rai liur.

³⁵ Senhora balu simu fali sira nia maluk nebee mate, tanba Maromak halo moris fila fali. Iha mos balu, ema simu terus too mate tanba sira fiar ba Nai Maromak. Sira lakohi nega Nai Maromak para ema hasai sira hosi terus nee, tanba sira laran metin katak, bainhira sira mate, sira sei simu fali moris ida nebee diak liu.

³⁶ Balu ema tarata i baku ho sikoti. Balu ema kesi ho korenti hodi hatama ba kadeia laran.

³⁷ Balu ema tuda ho fatuk too mate, balu ema kadoo fahe ba rua, balu ema oho ho surik. Balu lao lemo rai hatais bibi nia kulit, sira moris kiak rabat rai, ema halo sira terus ho susar.

³⁸ Sira lao lemo-lemo iha rai fuik maran i sae-tuun foho hodi hela deit iha fatuk kuak ho rai kuak. Ema fiar makaas hanesan nee, mundu nee la serve ba sira atu hela.

³⁹ Maromak simu ema sira nee hotu ho kontenti tanba sira nia fiar ba Nia. Maski nunee, maibee too sira mate mos, sira seidauk simu hotu buat nebee Maromak promete ona atu foo.

⁴⁰ Nee tanba Maromak halo tuir nia promesa nebee Nia desidi ona atu halo buat diak liu tan mai ita. Nia hakarak para sira nebee moris uluk ita hein ita nebee moris agora, hodi halo ita hotu moris hamutuk iha Kristu.