Ebreu 10 - Biblia Tetun Dili

Jesus Kristu mak sakrifisiu nebee perfeitu

¹ Lei Moisés nian la hatudu sai momoos buat diak nebee mak Maromak atu foo mai ita aban-bainrua. Lei nee so hatudu buat sira nee nia lalatak deit. Tuir lei nee dehan, ema nebee hakarak adora Nai Maromak, tinan-tinan tenki oho animal hodi halo sakrifisiu. Maski ema barak badinas halo tuir, maibee sira nia laran la moos nafatin, tanba lei nee lalatak deit.

² Se lei nee bele hamoos sira nia laran karik, entaun sira la presiza lori tan animal hodi halo sakrifisiu, tanba sakrifisiu nee bele hamoos ona sira nia sala hotu dala ida hodi halo sira senti kamaan. Maibee lae.

³ Sakrifisiu nebee sira halo tinan-tinan nee, so hodi hanoin deit kona ba sira nia sala.

⁴ Tanba karau nia raan ka bibi nia raan nunka bele hamoos ema nia sala.

⁵ Tanba nee, bainhira Jesus Kristu mai iha mundu, Nia hatete ba Nai Maromak nunee: “Ita Boot lakohi para ema lori oferta i oho animal sai sakrifisiu ba Ita Boot. Nee mak Ita Boot foo isin lolon mai Hau atu Hau mak sai sakrifisiu.

⁶ Ita Boot nia laran la haksolok ho animal nebee ema tunu hodi halo sakrifisiu, Ita Boot la kontenti ho sakrifisiu nebee ema foo hodi husu perdaun.

⁷ Entaun Hau dehan, ‘Maromak, Hau mak nee. Hau mai atu halo tuir Ita Boot nia hakarak, hanesan hakerek ona kona ba Hau iha Livru Sagradu rolo nian.’ ”

⁸ Primeiru Kristu dehan, “Ita Boot lakohi para ema lori oferta i oho animal para sai sakrifisiu. Ita Boot lakohi simu animal nebee ema tunu halo sakrifisiu ka sakrifisiu nebee ema foo hodi husu perdaun. Buat sira nee hotu la halo Ita Boot nia laran haksolok.” Kristu dehan nunee maski lei Moisés nian haruka ema lori sakrifisiu sira nee hotu.

⁹ Depois Nia hatutan tan, “Hau mak nee, Hau mai atu halo tuir Ita Boot nia hakarak.” Nee dehan katak, Maromak halakon tiha lei tuan kona ba sakrifisiu hodi troka fali ho Kristu nia sakrifisiu.

¹⁰ Tanba Nai Maromak nia hakarak mak nee: Jesus Kristu tenki mate hanesan sakrifisiu dala ida deit, i liu hosi Nia sakrifisiu nee, Nia hamoos tiha ona ita nia laran too tinan ba tinan.

¹¹ Loro-loron, nai-lulik sira hamriik halao sira nia knaar hodi oho bebeik animal halo sakrifisiu. Afinal sakrifisiu sira nee nunka bele hamoos ema nia sala.

¹² Maibee Kristu foo Nia Aan sai sakrifisiu dala ida deit hodi hamoos ita nia sala, nebee vale too tinan ba tinan. Hotu tiha, Nia baa tuur iha Nai Maromak nia sorin kuana.

¹³ Iha nebaa, Nia hein hela too Nai Maromak halo Nia inimigu sira taka rabat iha Nia ain okos.

¹⁴ Tanba liu hosi Nia sakrifisiu dala ida deit, Kristu hamoos Nia ema sira nia laran hotu, i halo sira sai livre hosi sala hodi moris santu too tinan ba tinan.

¹⁵ Espiritu Santu mos foo hatene mai ita kona ba buat nee. Primeiru Nia dehan,

¹⁶ “Agora Hau, Nai Maromak, dehan, aliansa nebee Hau sei halo ho sira mak nee: Hau sei tau Hau nia lei iha sira nia laran, i sei hakerek lei nee iha sira nia neon.”

¹⁷ Depois Nia dehan tan, “Hau sei haluha sira nia sala ho sira nia hahalok aat hotu-hotu.”

¹⁸ Se Nai Maromak hamoos tiha ona ita nia sala, entaun ita la presiza foo tan sakrifisiu hodi hamoos ita nia sala.

Mai ita hakbesik aan ba Nai Maromak

¹⁹ Maun-alin sira, tanba Jesus nia raan fakar too mate mai ita, agora ita brani tama ba iha Maromak nia prezensa iha Fatin nebee Santu Liu.

²⁰ Hanoin ba Fatin nebee Santu Liu nee. Iha nebaa iha kortina boot ida nebee uluk taka hela fatin nee, i ema la bele tama direta ba Nai Maromak. Maibee ho Jesus nia mate nee, Nia loke ona dalan foun mai ita para ita bele tama liu ba laran hodi koalia direta ho Maromak.

²¹ Ita iha nai-lulik ida nebee boot teb-tebes hodi toma konta Nai Maromak nia uma tomak.

²² Tanba nee mai ita hakbesik aan ba Nai Maromak ho laran moos i fiar metin ba Nia. Tanba Jesus hamoos tiha ona ita nia laran, too ita la hanoin tan sala nebee uluk ita halo. Nee hanesan Nia fasi ita nia isin lolon hodi bee nebee moos.

²³ Mai ita hein ho laran metin nafatin atu simu buat nebee Maromak promete ona atu foo mai ita, hanesan mos ita foo sai tiha ona ba ema seluk. Lalika duvida, tanba Maromak sempre halo tuir Nia promesa.

²⁴ Mai ita foo hanoin ba malu ho dalan oi-oin atu ita hotu hatudu domin ba ita nia maluk hodi halo diak ba sira.

²⁵ Tan hau rona ona, ema balun lakoi halibur hamutuk tan ho sira nia maun alin iha Kristu. La bele nunee. Tanba imi tenki halibur hamutuk hodi foo korajen ba malu nafatin para ita nia fiar sai metin. Liu-liu tanba Nai Jesus nia loron hodi fila fali mai hosi lalehan besik ona.

²⁶ Ita hatene ona lia loos kona ba Jesus Kristu. Maibee se ita rasik desidi fila kotuk ba Nia hodi moris nafatin iha sala laran, maka la iha tan sakrifisiu seluk mak bele hamoos ita nia sala.

²⁷ Se ema fila kotuk ba Nia, ita so hein deit ho laran tauk atu Nai Maromak kastigu ema nee i ahi lakan boot haan motuk tiha ema hotu nebee kontra Maromak.

²⁸ Uluk, se ema ruma kontra lei nebee Nai Maromak foo ba Moisés, i ema nain rua ka tolu sai sasin ba ema nebee kontra lei nee, ema nee la hetan perdaun, nia tenki simu kastigu mate.

²⁹ Saa tan ema nebee sama Nai Maromak nia Oan ba rai! Ema nee dehan katak Jesus nia raan la vale liu, maski Jesus nia raan nee sai sinal katak Maromak halo ona aliansa foun ho ita, i raan nee mak hamoos tiha ona ema nee nia sala. Nia mos hatete aat Maromak nia Espiritu, afinal Nia Espiritu nee hatudu Maromak nia laran diak mai ita. Hanoin didiak! Ema hanesan nee sei simu kastigu todan liu fali ema nebee kontra Moisés nia lei.

³⁰ Tanba ita hatene Nai Maromak rasik dehan nunee: “Hau mak iha direitu foo kastigu ba ema nebee halo aat. Hau sei kastigu sira tuir sira nia hahalok aat.” Nia mos dehan, “Hau, Nai Maromak mak sei julga Hau nia ema.”

³¹ Maromak nee moris rohan laek. Atu monu ba Maromak nia kastigu nunee, todan teb-tebes.

³² Keta haluha tempu uluk, bainhira imi foin sai hosi nakukun hodi moris iha naroman nia laran. Iha tempu nebaa, imi hetan terus ho susar oi-oin, maski nunee imi hamriik metin nafatin.

³³ Momentu nebaa ema koalia aat imi i halo aat imi iha ema barak nia oin. Bainhira ema halo aat imi nia maluk sarani sira seluk, imi mos prontu terus hamutuk ho sira.

³⁴ Imi hatudu imi nia laran diak ba ema dadur sira iha kadeia laran. I bainhira ema hadau imi nia sasaan, imi foo deit ho laran kontenti, tanba imi hatene katak, imi sei simu fali rikusoin nebee diak liu, i rikusoin nee sei dura too tinan ba tinan.

³⁵ Entaun la bele husik imi nia fiar. Tanba se imi laran metin nafatin, Maromak sei foo prémiu boot ba imi.

³⁶ Aguenta ho pasiensia deit baa, atu nunee imi halo tuir nafatin Nai Maromak nia hakarak, i too ikus imi simu buat hotu-hotu nebee Nia promete ona ba imi.

³⁷ Tanba iha Livru Sagradu hakerek ona dehan, “La kleur tan, Ema ida nebee atu mai nee, sei mai duni, Nia sei la demora.

³⁸ Hau nia ema sira nebee moris loos, sira fiar mai Hau iha sira nia moris tomak. Maibee ema nebee fila kotuk mai Hau, Hau nia laran la simu sira.”

³⁹ Sira nebee husik tiha Maromak, iha ikus sei rahun. Maibee ita lae. Ita nee ema nebee fiar, i hetan salvasaun.