Apokalipse 9 - Biblia Tetun Dili

Anju numeru lima huu nia korneta — Gafanhotu halo terus ema

¹ Anju numeru lima huu nia korneta. Derepenti hau haree fitun ida monu tuun tiha ona ba rai. Fitun nee simu xavi ida hodi loke rai kuak klean nakukun.

² Momentu fitun nee loke rai kuak klean nee, ahi suar makaas sai kedas hanesan suar sai hosi fornu boot. Suar nee taka metin loro matan, halo rai nakukun tiha.

³ Gafanhotu barak teb-tebes sai hosi ahi suar laran tuun mai mundu. Nai Maromak halo gafanhotu sira nee bele tata ema hanesan fali sakunar tata ema.

⁴ Maibee Nia bandu sira la bele estraga duut ho ai huun ho ai horis selu-seluk. Sira so bele halo terus ema nebee mak la iha Nai Maromak nia marka iha sira nia reen toos.

⁵ Gafanhotu sira nee la simu lisensa atu oho ema sira nee maibee so halo terus deit durante fulan lima. Gafanhotu nee tata ema halo moras teb-tebes, hanesan fali sakunar mak tata.

⁶ Durante fulan lima nee nia laran, ema sira nee hakarak atu mate lalais, too sira buka dalan oi-oin, maibee la konsege mate.

⁷ Gafanhotu sira nee nia modelu hanesan kuda nebee prontu ona atu ema sae hodi baa halo funu. Iha sira nia ulun taka buat ruma hanesan koroa liurai nian halo ho osan mean. Sira nia oin hanesan fali ema nia oin.

⁸ Sira nia fuuk naruk hanesan feto nia fuuk, i sira nia nehan kroat hanesan leaun nia nehan.

⁹ Sira nia hirus matan taka ho buat ida hanesan besi funu nian. Sira nia liras tarutu makaas hanesan kuda kareta lubuk ida nebee halai makaas atu baa funu.

¹⁰ Sira nia ikun forsa teb-tebes tanba iha veneno hanesan sakunar nian. Nunee sira uza sira nia ikun nee hodi halo terus ema durante fulan lima.

¹¹ Gafanhotu sira nia liurai mak anju ida nebee toma konta ba rai kuak klean nakukun. Nia naran ho lian Ebreu dehan, Ábadon, ho lian Gregu dehan, Apólion. Naran rua nee dehan, “Harahun door”.

¹² Terus boot primeiru liu ona. Maibee sei iha tan terus boot rua.

Anju numeru neen huu nia korneta — Terus oin tolu iha mundu

¹³ Hotu tiha anju numeru neen huu nia korneta. Hau rona lian ida sai hosi altar osan mean nia lidun haat, altar nee iha hela Nai Maromak nia oin.

¹⁴ Lian nee hatete ba anju numeru neen nee dehan, “Baa kore tiha anju haat nebee kesi hela besik mota boot Eufrates.”

¹⁵ Entaun anju nee baa kore tiha sira para sira bele baa oho ema. Tanba uluk kedas Maromak desidi katak anju haat nee mak tenki baa oho ema iha oras, loron, fulan no iha tinan nee duni. Hosi ema hotu-hotu iha mundu, parte ida hosi parte tolu mak sira oho.

¹⁶ Anju haat nia tropas nebee sae kuda funu, barak teb-tebes, hau rona dehan, sira hamutuk tookon atus rua.

¹⁷ Iha hau nia vizaun hau haree tropas ho sira nia kuda funu nian hanesan nee: Tropa sira nia hirus matan taka ho besi funu kor tolu: mean lakan, azul tuan, ho kinur. Kuda sira nee nia ulun hanesan fali leaun nia ulun. Ahi lakan, ahi suar ho fatuk dois naran enxofre, sai hosi sira nia ibun laran.

¹⁸ Buat tolu nebee sai hosi kuda sira nia ibun nee halo ema parte ida hosi parte tolu iha mundu nee mate hotu.

¹⁹ Kuda sira nee nia forsa iha sira nia ibun ho mos iha sira nia ikun, tanba sira nia ikun hanesan fali samea. Sira nia ikun nee mos iha nia ulun rasik, i sira uza ulun nee hodi tata halo terus ema.

²⁰ Maski ema barak mate iha terus boot sira nee, maibee ema nebee sei moris lakohi hakribit sira nia hahalok aat. Sira adora nafatin diabu, adora mos estatua lulik nebee halo ho osan mean, osan mutin, riti, fatuk ho ai. Maski buat sira nee la book aan, la haree, i la rona, maibee sira adora nafatin.

²¹ Sira mos lakohi hakribit sira nia sala sira seluk hanesan oho ema, uza ai kulit aat, la iha moral seksual ho naok.