Apokalipse 8 - Biblia Tetun Dili

Bibi Oan loke karimbu fatin numeru hitu

¹ Hotu tiha Bibi Oan loke karimbu fatin numeru hitu. Iha lalehan tomak nonook hotu mais-ou-menus oras sorin balu.

² Depois hau haree anju hitu nebee baibain hamriik iha Nai Maromak nia oin, sira ida-idak simu korneta.

³ Depois iha anju seluk mai lori manko osan mean ida hamriik iha altar oin. Nia simu ai been morin barak iha nia manko atu hasae ba Maromak hamutuk ho Maromak nia povu nia orasaun. Nia sunu ai been morin nee iha altar osan mean iha kadeira ukun nia oin.

⁴ I ai been morin nia suar ho povu sira nia orasaun sae hamutuk hosi anju nia liman too iha Nai Maromak nia oin.

⁵ Depois anju nee mos foti ahi klaak iha altar leten hodi enxe nakonu ba iha manko osan mean laran, i nia riba tuun ba mundu. Derepenti rai tarutu makaas iha fatin-fatin, rai lakan taa ba-mai i rai mos nakdoko.

⁶ Hotu tiha anju hitu nebee kaer hela korneta prepara aan atu huu sira nia korneta.

Anju huu korneta primeiru, ahi haan rai

⁷ Anju primeiru huu nia korneta. Derepenti iha udan jelu fatuk ho ahi ho raan kahur malu fakar tuun mai iha mundu. Parte ida hosi parte tolu hosi mundu nee, ahi haan motuk hotu. Nunee mos duut matak ho ai huun sira, ahi haan motuk hotu parte ida hosi parte tolu.

Anju huu korneta numeru rua, ikan iha tasi laran mate hotu

⁸ Anju numeru rua huu nia korneta. Derepenti iha buat boot ida hanesan fali foho boot nebee lakan makaas, riba tuun ba tasi laran. Tasi parte ida hosi parte tolu sai tiha raan.

⁹ Nunee ikan ho animal nebee moris iha tasi laran, parte ida hosi parte tolu mate hotu. I roo nebee lao iha tasi laran mos, parte ida hosi parte tolu rahun hotu.

Korneta numeru tolu, bee sai moruk

^10-11 Anju numeru tolu huu nia korneta. Derepenti fitun boot ida lakan hanesan ahi lakan, monu tuun hosi lalehan. Fitun nee nia naran ꞌMorukꞌ. Nia monu tama ba mota ho bee matan, halo parte ida hosi parte tolu sai moruk hotu. Too ikus ema barak mate tanba sira hemu bee moruk nee.

Korneta numeru haat, loron matan, fulan ho fitun sira nakukun tiha hotu

¹² Depois anju numeru haat huu nia korneta. Derepenti hanesan buat ruma xoke loro matan, fulan ho mos fitun, halo parte ida hosi parte tolu sai nakukun tiha. Nunee, se oras loron ida nian ita fahe ba tolu, entaun oras rua naroman, oras ida nakukun. Kalan mos hanesan.

¹³ Depois hau haree manu makikit ida semo aas, i hau rona manu nee foo sai ho lian makaas dehan. “Aii, susar! Susar! Ema hotu-hotu iha mundu sei hetan susar boot liu tanba sei iha tan anju tolu mak sei huu sira nia korneta.”