Apokalipse 7 - Biblia Tetun Dili

Nai Maromak tau marka ba Nia ema 144.000

¹ Hotu tiha, hau haree anju haat hamriik hela iha mundu nia lidun haat hodi satan netik anin hosi rai ulun, rai ikun, tasi feto, tasi mane, para la bele huu ba rai maran ho tasi. Ai huun ida mos anin la kona.

² Anju haat nee simu ona kbiit atu estraga rai ho tasi. Depois hau haree anju ida seluk mai hosi loro-sae lori hela karimbu hosi Maromak nebee Moris. Anju nee koalia ho lian makaas ba anju haat nee

³ dehan, “Hein lai! Ami sei tau marka iha Nai Maromak nia ema sira nia reen toos lai. Marka hotu mak imi foin bele estraga rai maran ho tasi ho mos ai huun sira hotu.

⁴ Tuir mai hau rona dehan, ema nebee simu marka nee, hamutuk rihun atus ida haat-nulu resin haat. Sira hosi suku Israel hotu, mak hanesan tuir mai nee:

⁵ hosi suku Judá, ema rihun sanulu resin rua; hosi suku Ruben, ema rihun sanulu resin rua; hosi suku Gade, ema rihun sanulu resin rua;

⁶ hosi suku Aser, ema rihun sanulu resin rua; hosi suku Naftali, ema rihun sanulu resin rua; hosi suku Manassés, ema rihun sanulu resin rua;

⁷ hosi suku Simeão, ema rihun sanulu resin rua; hosi suku Levi, ema rihun sanulu resin rua; hosi suku Isakar, ema rihun sanulu resin rua;

⁸ hosi suku Zebulón, ema rihun sanulu resin rua; hosi suku José, ema rihun sanulu resin rua; i hosi suku Benjamim, ema rihun sanulu resin rua.

Ema santu sira hahii Nai Maromak no Bibi Oan

⁹ Hotu tiha, hau haree ema barak loos, too sura la bele. Ema sira nee hosi nasaun, suku, povu ho lian hotu-hotu iha mundu. Sira hotu hatais batina mutin, hamriik iha kadeira ukun nia oin ho Bibi Oan nia oin. Sira kaer ai tahan ramus

¹⁰ hodi haklalak dehan, “Ami hetan salvasaun hosi Nai Maromak Ida nebee tuur iha kadeira ukun ho mos hosi Bibi Oan.”

¹¹ Anju hotu-hotu hamriik haleu kadeira ukun nee ho katuas lia nain sira ho mos animal moris haat. Sira hotu hakneak i hakruuk too rai iha kadeira ukun nia oin hodi adora Nai Maromak

¹² dehan, “Amen, loos duni! Ami hahii ho agradese, ami foti aas Ita Boot nia naran. Tanba Ita Boot mak kbiit nain, Ita Boot forsa teb-tebes, Ita Boot nia matenek klean liu. Ita Boot deit mak ami adora too tinan ba tinan. Amen!”

¹³ Depois katuas lia nain ida hosi sira rua-nulu resin haat nee husu mai hau dehan, “Sira nebee hatais batina mutin nee, see? Sira mai hosi nebee?”

¹⁴ Hau hataan, “Hau la hatene, Senhor. Ita Boot mak hatene.” Katuas nee hatete mai hau, “Sira nee uluk hetan terus boot tanba sira nia fiar. Sira fasi tiha ona sira nia batina ho Bibi Oan nia raan, nee mak sira nia batina sai mutin.

¹⁵ Tanba nee sira hamriik iha Nai Maromak nia kadeira ukun nia oin hodi serbii Nia loron-kalan iha Nia Uma Kreda Boot. I Nia nebee tuur iha kadeira ukun nee sei hamahon sira.

¹⁶ Sira sei la hamlaha no sei la hamrook tan. Loro manas sei la halo terus tan sira, i rai manas sei la halo sira senti atu motuk.

¹⁷ Tanba Bibi Oan nebee mak hamriik iha klaran besik kadeira ukun nee mak sei sai sira nia Bibi Atan. Nia sei lori sira ba bee matan hodi foo hemu bee nebee foo moris rohan-laek. I Nai Maromak sei hamaran sira nia matan been.”