Apokalipse 6 - Biblia Tetun Dili

Bibi Oan loke karimbu fatin neen

¹ Hotu tiha hau haree Bibi Oan loke karimbu fatin primeiru hosi karimbu fatin hitu nebee tau iha livru lulun nee. Depois hau rona animal ida hosi animal moris haat nee hatete ho lian makaas hanesan rai tarutu dehan, “Mai ona!”

² Derepenti hau haree kuda mutin ida, ema ida sae hela kuda nee ema ida ke sempre manaan funu. Nia kaer hela rama, i agora simu tan koroa liurai nian. Depois nia baa tan hodi halo funu halakon nia inimigu sira seluk.

Loke karimbu segundu

³ Depois Bibi Oan loke karimbu fatin numeru rua. I hau rona animal moris segundu hatete, “Mai ona!”

⁴ Kuda mean lakan ida mos sai mai. Ema nebee sae hela kuda nee, nia simu kbiit hodi lori funu ba iha mundu para halo ema oho malu. Nia mos simu surik boot ida.

Loke karimbu terseiru

⁵ Tuir mai Bibi Oan loke karimbu fatin numeru tolu. I hau rona animal moris numeru tolu hatete, “Mai ona!” Hau haree kuda metan ida, ema ida sae kuda nee kaer hela dasin ida atu tetu ai haan.

⁶ Depois hau rona buat ida hanesan ema nia lian sai hosi animal haat nee nia klaran dehan, “La kleur tan, rai sei hamlaha boot. Osan nebee ema manaan iha loron ida, sei too deit para sosa trigu kilu tolu. Se trigu diak nian, hetan deit kilu ida. Maibee keta estraga ai oliveira ho ai uvas.”

Loke karimbu dahaat

⁷ Depois Bibi Oan loke karimbu fatin numeru haat. I hau rona animal moris numeru haat hatete, “Mai ona.”

⁸ Hau haree tan kuda ida kor kamutis. Ema nebee sae kuda nee, nia naran ꞌMateꞌ. Iha ema ida tan naran ꞌMatebian sira nia Fatinꞌ lao tutuir nia. Sira nain rua simu kbiit atu baa oho ema lubuk ida iha mundu, uza surik, ho rai hamlaha, ho moras, ho mos animal siak. Se ita fahe ema hotu-hotu iha mundu ba parte haat, parte ida sei mate hotu.

Loke karimbu dalima

⁹ Tuir mai Bibi Oan loke karimbu fatin numeru lima. I hau haree ema barak nebee uluk ema oho, sira nia klamar iha meza sakrifisiu nia okos. Sira nee ema oho tanba sira foo sai Nai Maromak nia Liafuan ho loloos no sira nia moris sai sasiin diak.

¹⁰ Sira koalia ho lian makaas dehan, “Nai Maromak kbiit nain, Ita Boot mak santu i loos. Bainhira loos mak Ita Boot tesi lia ba ema iha mundu hodi kastigu ema sira nebee uluk oho ami?”

¹¹ Depois sira ida-idak simu batina mutin naruk. Iha ida haruka sira hein tan ituan, too sira nia numeru kompletu. Tanba hosi sira nia maluk sarani sira nebee sei serbii Kristu iha mundu, iha balu mak ema sei oho tan, hanesan mos sira uluk.

Loke karimbu daneen

¹² Depois hau haree Bibi Oan loke tan karimbu fatin numeru neen. Derepenti rai nakdoko makaas. Loro-matan sai nakukun tiha hanesan hena metan, fulan sai mean hanesan raan.

¹³ Fitun sira monu tuun ba rai, hanesan fali ai fuan figeira matak mak monu ba rai bainhira anin huu makaas.

¹⁴ Hau haree lalehan lulun aan too lakon tiha, hanesan fali ema lulun surat tahan. Foho ho ilha sira mos hotu-hotu muda tiha hosi sira nia fatin.

¹⁵ Haree nunee, liurai sira iha mundu, nai ulun sira, komandante militar sira, ema riku sira, ema boot sira too ema baibain ho atan sira, sira hotu-hotu halai baa iha foho hodi subar iha fatuk kuak ka subar iha fatuk nia leet.

¹⁶ Sira halerik ba foho ho fatuk boot sira dehan, “Monu taka tiha ami baa! Subar ami para Nia nebee tuur iha kadeira ukun la bele hetan ami, i Bibi Oan la kastigu ami.

¹⁷ Tanba loron kastigu too ona. Agora Sira fakar Sira nia hirus mai ami, too la iha ema ida mak bele aguenta!”