Apokalipse 5 - Biblia Tetun Dili

Nai Jesus mak iha direitu atu loke livru lulun

¹ 1 Depois hau haree Ida nebee mak tuur iha kadeira ukun nee kaer hela livru lulun ida iha Nia liman kwana. Livru lulun nee nia liur-laran hakerek nakonu hotu, i taka metin tiha ho lilin been iha fatin hitu, tau mos karimbu tuir lilin been fatin hitu nee ida-idak.

² I hau haree anju forti ida husu ho lian makaas dehan, “See mak iha direitu atu hasai karimbu fatin iha livru lulun nee hodi loke livru nee?”

³ Maibee la iha ema ida iha lalehan ka iha rai ka iha rai okos mak bele loke livru nee para bele haree saida mak hakerek iha livru laran.

⁴ Haree nunee, hau tristi no tanis loos tanba la iha ema ida mak bele loke livru lulun nee para bele haree saida mak hakerek iha laran.

⁵ Depois ema ida hosi katuas lia nain rua-nulu resin haat nee dehan mai hau, “Keta tanis. Haree baa! Liurai David nia Jerasaun Ida makaas teb-tebes, ema bolu Nia ꞌLeaun hosi suku Judáꞌ, Nia manaan tiha ona. Nunee Nia mak iha direitu hodi hasai karimbu fatin hitu hodi loke livru nee.”

⁶ Depois hau haree Bibi Oan ida hamriik hela iha klaran besik kadeira ukun. I animal moris haat ho katuas lia nain rua-nulu resin haat nee, sira hotu haleu kadeira ukun. Bibi Oan nee, hau haree, iha fitar iha Nia isin, hatudu katak uluk ema oho tiha ona. Nia iha dikur hitu ho matan hitu. Matan hitu nee nia signifikadu mak Maromak nia Espiritu hitu nebee Nia haruka ona ba iha mundu tomak.

⁷ Bibi Oan nee baa iha Ida nebee mak tuur iha kadeira ukun hodi simu livru lulun nee hosi Nia liman loos.

⁸ Bainhira Bibi Oan simu livru nee, animal moris haat ho katuas lia nain rua-nulu resin haat nee hakneak i hakruuk too rai iha Nia oin. Sira ida-idak kaer buat ida hanesan viola, i kaer mos manko osan mean ida, ai been morin nakonu iha laran. Ai been morin nee mak Maromak nia povu sira nia orasaun.

⁹ Sira hotu hananu kanta foun ida hanesan nee: “Ita Boot mak serve simu livru lulun nee hodi loke nia karimbu fatin, tanba ema oho tiha ona Ita Boot. Hodi Ita Boot nia raan, Ita Boot sosa kotu ona ema sira nee hosi suku, lian, povu ho nasaun hotu-hotu para sai Nai Maromak nia povu.

¹⁰ Ita Boot foti sira sai Nai Maromak nia reinu, i hili mos sira sai hanesan nai-lulik para serbii ita nia Nai Maromak. I sira mos sei kaer ukun iha mundu nee.”

¹¹ Depois hau haree tan, iha anju rihun ba rihun no tookon ba tookon. Sira haleu hela kadeira ukun ho mos animal moris haat ho katuas lia nain sira. Hau rona

¹² anju sira nee hananu ho lian makaas dehan, “Bibi Oan nebee mak ema oho tiha ona nee, Nia mak serve atu ema hotu-hotu respeita. Tanba Nia kbiit boot liu, Nia riku teb-tebes, Nia matenek klean liu, Nia forsa teb-tebes. Onra, gloria, hahii no foti aas Nia naran!

¹³ Tuir mai, hau rona tan kriatura hotu-hotu iha lalehan, iha rai, iha rai okos ho mos iha tasi laran, sira hotu hananu hamutuk dehan, “Ida nebee mak tuur iha kadeira ukun ho mos Bibi Oan, Sira nee mak ami hahii, respeita i foti aas too tinan ba tinan.”

¹⁴ Depois animal haat nee hataan, “Amen, loos duni!” I katuas lia nain rua-nulu resin haat hakneak i hakruuk too rai hodi adora Ida nebee tuur iha kadeira ukun ho mos Bibi Oan.