Apokalipse 4 - Biblia Tetun Dili

Nai Maromak simu adorasaun iha lalehan

¹ Hotu tiha, hau, João haree iha lalehan odamatan ida nakloke hela. I hau rona fali lian ida nebee uluk hau rona tiha ona. Lian nee hanesan ema huu korneta lian. Agora lian nee hatete mai hau dehan, “Sae mai, Hau sei hatudu ba o saida maka sei akontese.”

² Iha momentu nee kedas Maromak nia Espiritu domina hau. Derepenti deit hau haree kadeira ukun ida iha lalehan, i Ema ida tuur hela iha kadeira nee.

³ Ema nee nabilan hanesan fatuk murak jaspe ho sardóniu. Iha arkuiris ida haleu hela kadeira ukun nee. Arkuiris nee nabilan hanesan fatuk murak esmeralda.

⁴ Iha mos kadeira rua-nulu resin haat mak haleu kadeira ukun nee, i katuas lia nain rua-nulu resin haat tuur hela iha kadeira sira nee. Sira hotu hatais hena mutin, sira nia ulun tau koroa liurai nian nebee halo ho osan mean.

⁵ Rai lakan ho rai tarutu makaas sai hosi kadeira ukun nee. Iha mos ahi-oan hitu lakan hela iha kadeira ukun nee nia oin. Ahi-oan nee mak Maromak nia Espiritu hitu.

⁶ Iha kadeira ukun nia oin iha mos buat ida hanesan tasi, maibee moos loos hanesan vidru. Iha animal moris haat haleu hela kadeira ukun nee. Animal sira nee nia oin-kotuk matan nakonu. Animal primeiru hanesan leaun.

⁷ Ida tuir mai hanesan karau aman. Ida seluk, nia oin hanesan ema nia oin. Ida ikus liu hanesan manu makikit ida nebee semo hela.

⁸ Animal moris haat nee ida-idak iha liras neen. Iha sira nia liras tomak nakonu ho matan. Loron-kalan animal haat nee hananu la para dehan, “Santu, santu, Nai Maromak mak santu. Nia mak kbiit nain. Nia iha hori uluk kedas, agora iha, i iha nafatin too tinan ba tinan.”

⁹ Animal moris sira nee hananu hodi hahii Ida nebee tuur iha kadeira ukun nee, Nia moris tinan ba tinan nafatin. Sira foti aas Nia naran hodi foo agradese ba Nia. Bainhira animal sira nee hananu,

¹⁰ katuas lian nain rua-nulu resin haat nee hakneak i hakruuk too rai iha kadeira ukun nee nia oin hodi adora Ida nebee tuur iha kadeira ukun nee, Nia moris too tinan ba tinan. Sira mos hasai sira nia koroa liurai nian i tau iha kadeira ukun nia oin hodi hahii Nia dehan,

¹¹ “Maromak ami nia Nai, Ita Boot mak serve atu ema hotu-hotu hahii no foti aas Ita nia naran, tanba Ita Boot mak forsa teb-tebes, Ita Boot mak halo buat hotu-hotu. Buat sira nee hotu iha tanba Ita Boot mak hakarak.”