Apokalipse 3 - Biblia Tetun Dili

Nai Jesus nia lia menon ba sarani sira iha Sardis

¹ Tuir mai Ema nee hatete mai hau, “Hakerek hanesan nee ba sarani sira iha sidade Sardis: ‘Hau mak kaer Maromak nia Espiritu hitu, i kaer fitun hitu. Hau nia lia menon mak nee:

² Hau hatene buat hotu-hotu nebee imi halo: Ema dehan imi sei moris hela maibee imi hanesan ema nebee mate tiha ona. Hadeer ona baa! Imi nia fiar besik atu hotu ona, entaun hametin ona imi nia fiar baa. Tanba Hau haree imi nia hahalok, la iha ida mak tuir loloos Maromak nia hakarak.

³ Tanba nee hanoin fila fali hanorin nebee mak uluk imi rona no simu ona nee. Imi tenki halo tuir hanorin nee, i hakribit imi nia sala. Se imi dukur nafatin, Hau sei mai derepenti deit hanesan naok-teen, imi sei la hatene bainhira loos mak Hau mai.

⁴ Maibee hosi imi iha Sardis, iha balu mak laran moos nafatin, hanesan ema nebee la halo foer nia hena. Sira nee sei lao hamutuk ho Hau, hatais hena mutin, tanba sira serve duni.

⁵ See mak manaan, nia mos sei hatais hena mutin hotu. Hau sei la hamoos nia naran hosi lista ema moris rohan-laek nian. I aban-bainrua iha Hau nia Aman nia oin ho mos anju sira nia oin, Hau sei foo sai katak, nia nee Hau nia ema.

⁶ Imi nebee iha tilun, rona didiak saida mak Maromak nia Espiritu hatete ba sarani sira.’ ”

Nai Jesus nia lia menon ba sarani sira iha Filadélfia

⁷ Tuir mai Ema nee hatete mai hau, “Hakerek hanesan nee ba sarani sira iha sidade Filadélfia: ‘Hau mak Santu no Loos. Hau mak kaer xavi liurai David nian. Bainhira Hau loke odamatan, la iha ema ida mak bele taka fali. I bainhira hau taka odamatan, la iha ema ida mak bele loke. Hau nia lia menon mak nee:

⁸ Hau hatene buat hotu-hotu nebee imi halo. Maibee imi tuir nafatin Hau nia liafuan, i la nega Hau. Haree baa! Hau loke tiha ona odamatan ba imi, i la iha ema ida mak bele taka fali.

⁹ Iha ema balu dehan sira Maromak nia ema, maibee sira bosok, sira la hakruuk ba Maromak maibee hakruuk fali ba diabu. Hau sei halo sira monu ain ba imi, i sira sei rekonhese katak Hau hadomi imi.

¹⁰ Hau uluk haruka imi aguenta ho pasiensia iha terus nia laran, i imi halo tuir duni Hau nia liafuan nee. Tanba nee hau sei kuidadu didiak imi iha tempu susar no terus nebee mak sei mai iha mundu tomak. Maromak sei uza susar ho terus nee hodi koko ema hotu-hotu iha mundu.

¹¹ Hau besik atu mai ona. Nee duni kaer metin imi nia fiar para ema seluk la bele hadau prémiu nebee prepara tiha ona ba imi.

¹² See mak manaan, Hau sei halo nia sai hanesan ai-riin boot iha Hau nia Maromak nia Uma Kreda Boot, i nia sei hela metin iha nebaa too tinan ba tinan. Hau sei hakerek Hau nia Maromak nia naran ho mos Jerusalém foun nia naran iha ema nee nia isin lolon. Jerusalém foun nee Maromak nia sidade, i aban-bainrua sidade nee sei tuun hosi lalehan, hosi Hau nia Maromak. Hau mos sei hakerek Hau nia naran foun iha ema nee nia isin lolon para hatudu katak, nia Hau nia ema.

¹³ Imi nebee iha tilun, rona didiak saida mak Maromak nia Espiritu hatete ba sarani sira.’ ”

Nai Jesus nia lia menon ba sarani sira iha Laodiseia

¹⁴ Tuir mai Ema nee hatete mai hau, “Hakerek hanesan nee ba sarani sira iha sidade Laodiseia: ‘Hau mak Ida nebee ema bolu dehan ‘Amen, loos duni’. Hau sempre foo sasin loloos. Hau mak lalehan ho rai nia huun, ho buat hotu-hotu nebee Nai Maromak halo. Hau nia lia menon mak nee:

¹⁵ Hau hatene buat hotu-hotu nebee imi halo: Imi la manas no la malirin. Hau hakarak para imi manas karik, manas liu, se malirin karik, malirin tiha baa!

¹⁶ Maibee imi hanesan bee morna deit, la manas no la malirin. Nunee Hau sei tafui sai imi hosi Hau nia ibun.

¹⁷ Imi dehan imi riku no moris diak ona, la presiza tan buat seluk. Maibee imi la hatene katak, imi hanesan fali ema nebee susar liu, moris la diak, kiak rabat rai, matan delek, i isin molik.

¹⁸ Nunee diak liu imi sosa osan mean diak nian hosi Hau para imi bele sai riku. Imi sosa hena mutin hosi Hau hodi taka imi nia isin molik para imi la moe tan. I sosa aimoruk hosi Hau hodi kose ba imi nia matan delek sira nee para haree.

¹⁹ Ema nebee Hau hadomi, sira nee mak Hau koriji i Hau kastigu. Entaun imi tenki hakaas aan hodi husik ona imi nia sala.

²⁰ Haree baa! Hau hamriik hela iha odamatan oin hodi tuku odamatan. Ema nebee rona Hau nia lian i loke odamatan mai Hau, Hau sei tama ba laran i ami sei haan hamutuk.

²¹ See mak manaan, Hau sei foo direitu ba nia para tuur ukun hamutuk ho Hau, hanesan mos Hau manaan tiha ona, i agora Hau tuur ukun hamutuk ho Hau nia Aman.

²² Imi nebee iha tilun, rona didiak saida mak Maromak nia Espiritu hatete ba sarani sira.’ ”