Apokalipse 22 - Biblia Tetun Dili

Mota ho ai huun nebee foo moris tinan ba tinan

¹ Tuir mai anju nee hatudu mota ida mai hau. Mota nee nia bee foo moris tinan ba tinan, i moos loos hanesan vidru. Bee nee sai hosi Nai Maromak ho Bibi Oan nia kadeira ukun,

² suli liu hosi estrada boot nia klaran iha sidade nee. Iha mota nee nia sorin-sorin iha ai nebee foo fuan, i ai fuan sira nee mos foo moris rohan-laek. Ai huun nee foo fuan tinan ida dala sanulu resin rua, fulan ida foo fuan dala ida. I ai nee nia tahan uza hanesan aimoruk hodi kura ema iha nasaun hotu-hotu iha mundu.

³ Buat nebee Nai Maromak foo malisan la tama iha sidade nee. Nai Maromak ho Bibi Oan nia kadeira ukun iha hela sidade nee nia laran, i Nai Maromak nia ema sira serbii Nia iha nebaa.

⁴ Sira haree Nia oin, i Nia naran hakerek iha sira nia reen toos.

⁵ Iha sidade nee, la iha tan kalan. Maromak nia povu la presiza ona loro matan ka ahi-oan, tanba Nai Maromak rasik mak foo naroman ba sira. I Nia povu sei ukun iha nebaa too tinan ba tinan.

Nai Jesus fila fali mai

⁶ Depois anju nee dehan mai hau, “Buat hotu-hotu nebee hau foo hatene ba o nee loos i ema hotu-hotu bele fiar. Nai Maromak sempre foo nia Espiritu ba Nia profeta sira para sira bele foo tutan Nia liafuan. Agora Nai Maromak haruka tan Nia anju mai hatudu ba Nia atan sira, saida mak la kleur tan sei akontese.”

⁷ Jesus dehan, “Rona mai! La kleur tan Hau sei mai. Ema nebee halo tuir Nai Maromak nia lia menon iha livru nee, sira hetan bensaun.”

⁸ Hau João, mak rona buat sira nee hotu, i haree rasik ho matan. Bainhira hau rona ho haree tiha hotu, hau hakneak i hakruuk too rai atu adora anju nebee mak hatudu buat sira nee mai hau.

⁹ Maibee anju nee bandu hau dehan, “La bele! Adora mak Maromak deit! Tanba hau nee Maromak nia atan hanesan mos o ho o nia maluk profeta sira seluk ho mos ema hotu-hotu nebee halo tuir liafuan iha livru nee.”

¹⁰ Tuir mai anju nee dehan tan mai hau, “La bele taka liafuan sira nebee Nai Maromak foo sai tiha ona iha livru nee, tanba loron besik ona atu buat sira nee akontese.

¹¹ Ema nebee halo buat aat, husik sira halo buat aat nafatin baa. Ema nebee halo buat foer, husik sira halo buat foer nafatin baa. Maibee ema nebee halo buat diak, sira tenki halo buat diak nafatin. I ema nebee moris ho laran moos, tenki moris ho laran moos nafatin.”

¹² Jesus dehan, “Rona mai! La kleur tan Hau sei mai. Hau mai lori premiu hodi selu ema hotu-hotu tuir ida-idak nia hahalok.

¹³ Hau mak Alfa no Omega, primeiru no ikus, Hau mak hahuu no remata, Hau mak huun ho rohan.

¹⁴ Ema nebee fasi tiha ona sira nia hena too moos, sira hetan bensaun. Tanba sira mak iha direitu tama ba sidade laran liu hosi portaun para bele haan ai fuan nebee foo moris rohan-laek.

¹⁵ Maibee ema aat sira, ema matandook ka ema nebee kaer ai kulit aat, ema nebee halo sala adulteriu, oho-door, adora fali estatua lulik, ka gosta bosok, sira nee la tama ba lalehan, sei hela hotu iha liur.

¹⁶ "Hau, Jesus, haruka ona Hau nia anju lori liafuan nee ba imi, para imi foo tutan ba sarani sira. Hau nee liurai David nia jerasaun, Hau mak fitun dadeer, ida nebee lakan makaas.”

¹⁷ Maromak nia Espirítu ho noiva nee dehan, “Mai ona!” Ema nebee rona mos tenki koalia tuir, “Mai ona!” See mak hamrook, mai ona ba. See mak hakarak hemu bee nebee foo moris tinan ba tinan, kuru deit tuir imi nia hakarak ba, lalikan selu.

João nia lia menon ikus

¹⁸ Hau, João, foo hanoin ba ema hotu-hotu nebee sei rona Maromak nia lia menon iha livru nee: Se ema ruma aumenta tan buat ruma ba lia menon nee, Nai Maromak mos sei aumenta kastigu todan ba nia, tuir kastigu nebee mak hakerek iha livru nee.

¹⁹ I se ema ruma hasai ka hamenus liafuan ruma hosi lia menon iha livru nee, Maromak mos sei hasai nia direitu atu tama ba iha sidade santu, i nia la bele haan ai fuan nebee foo moris tinan ba tinan, hanesan hakerek tiha ona iha livru nee.

²⁰ Ida nebee foo sai buat sira nee hotu dehan, “Loos duni! La kleur tan, Hau mai ona.” Amen. Nai Jesus, mai ona baa!

²¹ Hau harohan para Nai Jesus hatudu Nia grasa ba Maromak nia povu hotu-hotu. Amen.