Apokalipse 21 - Biblia Tetun Dili

Lalehan foun ho mundu foun

¹ Tuir mai hau haree lalehan foun ho mundu foun. Lalehan ida uluk ho mundu ida uluk la iha tiha ona. Tasi mos la iha tiha ona.

² Hau haree Jerusalém foun tuun mai hosi Nai Maromak iha lalehan. Sidade nee sidade santu, i kapaas teb-tebes hanesan noiva ida nebee enfeita aan furak loos atu hasoru nia noivu iha sira nia loron kazamentu.

³ Depois hau rona lian makaas ida sai hosi kadeira ukun nee dehan, “Haree baa! Hahuu agora Nai Maromak nia hela fatin iha ema sira nia leet. Nia hela hamutuk ho sira. Nia sai sira nia Maromak i sira sai Nia povu. Maromak rasik hela hamutuk ho sira.

⁴ Nia sei hamaran sira nia matan been. La iha tan terus, la iha tan mate ka tanis lelir, la iha tan tristi. Tanba buat sira uluk nian nee liu tiha ona.”

⁵ Depois Ida nebee tuur iha kadeira ukun nee dehan, “Rona mai! Agora Hau halo buat hotu-hotu sai foun.” Tuir mai Nia koalia tan mai hau dehan, “Hakerek liafuan sira ohin nee, tanba aban-bainrua buat sira nee sei akontese duni, ema hotu-hotu bele fiar.”

⁶ Nia dehan tan, “Buat sira nee kumpri tiha hotu ona! Hau mak Alfa no Omega, primeiru ho ikus, huun ho rohan. Ema nebee hamrook, Hau sei foo hemu bee hosi bee matan nebee foo moris tinan ba tinan, bee nee la selu.

⁷ Ema hotu-hotu nebee manaan, sira sei simu bensaun sira nee hotu. Hau sei sai sira nia Maromak, i sira sei sai Hau nia oan.

⁸ Maibee sira nebee hakiduk tanba tauk, sira nebee la fiar, ema nebee hanoin no halo sala foer oi-oin, oho-door, ema nebee halo relasaun seksual ho ema nebee laos nia feen ka laen, ema matandook no ema nebee kaer ai kulit aat, sira nebee adora lulik, ema bosok-teen, sira nee hotu-hotu Hau sei soe tama ba iha ahi lakan boot nia laran. Ida nee mak mate ba dala rua.”

Sidade Jerusalém foun

⁹ Tuir mai anju ida hosi anju hitu nebee kaer manko nakonu ho Nai Maromak nia kastigu ikus, mai dehan ba hau, “Mai, hau sei hatudu ba o noiva nebee atu kaben ho Bibi Oan.”

¹⁰ Derepenti Maromak nia Espiritu domina hau, i anju nee lori hau ba iha foho ida aas teb-tebes. Iha nebaa anju nee hatudu sidade santu Jerusalém tuun mai hosi Nai Maromak iha lalehan.

¹¹ Sidade nee kapaas teb-tebes. Iha naroman nabilan nian sai hosi Nai Maromak, halo sidade nee nabilan hanesan fatuk murak nebee karu teb-tebes, hanesan fatuk murak jaspe, i moos loos hanesan vidru.

¹² Iha muru boot haleu sidade nee. Muru nee aas no mahar. Muru nee nia portaun sanulu resin rua, i anju ida-idak hamriik hein portaun sira nee. Iha portaun ida-idak hakerek naran ida hosi suku Israel sanulu resin rua.

¹³ Portaun tolu see oin ba lorosae, tolu see oin ba loromonu, tolu see oin ba tasi feto i tolu tan see oin ba tasi mane.

¹⁴ Muru nee harii iha fatuk boot sanulu resin rua nia leten, iha fatuk ida-idak hakerek Bibi Oan nia reprezentate nain sanulu resin rua nia naran.

¹⁵ Anju nebee ohin koalia ho hau nee kaer hela ai sukat ida halo hosi osan mean, para sukat sidade nee tomak ho mos nia portaun ho muru.

¹⁶ Hodi nia ai sukat nee, anju nee sukat uluk sidade. Sidade nee nia naruk sasukat rihun sanulu resin rua, nia luan ho nia aas mos hanesan hotu.

¹⁷ Depois anju nee sukat muru nia mahar tuir ita ema nia sukat metru neen nulu resin lima.

¹⁸ Muru nee halo hosi fatuk murak jaspe, sidade nee tomak halo hosi osan mean diak nian i lakan nabilan hanesan vidru.

¹⁹ Fatuk boot sanulu resin rua nebee tane muru nee, enfeita ho fatuk murak oi-oin. Fatuk murak sira nee lakan kor oi-oin i karu teb-tebes. Fatuk boot primeiru halo ho fatuk jaspe, numeru rua halo ho fatuk safira, numeru tolu halo ho fatuk kalsedonia, numeru haat halo ho fatuk esmeralda,

²⁰ numeru lima halo ho fatuk sardoniu, numeru neen halo ho fatuk sardiu, numeru hitu halo ho fatuk krisolitu, numeru walu halo ho fatuk berilu, numeru sia halo ho fatuk topaziu, numeru sanulu halo ho fatuk krisoprazu, numeru sanulu resin ida halo ho fatuk jasintu, i numeru sanulu resin rua halo ho fatuk ametista.

²¹ Muru nee nia portaun sanulu resin rua halo ho morteen perola sanulu resin rua, portaun ida-idak halo hosi perola boot ida. Estrada iha sidade nee, halo ho osan mean diak nian i lakan nabilan hanesan vidru.

²² Iha sidade nee tomak hau la haree uma kreda ida, tanba Nai Maromak Forsa Teb-tebes ho mos Bibi Oan, Sira rasik iha nebaa. Nunee la presiza ona uma kreda.

²³ Iha sidade nee la presiza loro matan ho fulan para foo naroman. Tanba naroman lalehan nian sai hosi Nai Maromak, i Bibi Oan mos sai hanesan ahi-oan hodi leno sidade nee.

²⁴ Nasaun hotu-hotu sei moris iha naroman nee nia laran. Liurai sira hosi mundu tomak sei lori sira nia rikusoin ba iha sidade nee.

²⁵ Portaun atu tama sidade nunka taka, tanba iha nebaa la iha tan kalan.

²⁶ Ema hosi nasaun hotu-hotu iha mundu lori sira nia rikusoin mesak kapaas deit ba iha sidade nee hodi foo ba Nai Maromak i adora Nia.

²⁷ Maibee buat aat ida mos la bele tama iha nebaa. Ema nebee halo sala foer ka adora fali lulik, ho ema bosok-teen, sira hotu la bele tama. So ema sira nebee nia naran hakerek tiha ona iha Bibi Oan nia livru mak bele tama iha sidade nee.