Apokalipse 20 - Biblia Tetun Dili

Diabu dadur hela durante tinan rihun ida

¹ Depois hau haree anju ida tuun mai hosi lalehan kaer hela xavi rai kuak klean nakukun nian ho mos korenti boot ida iha nia liman.

² Anju nee kaer tiha samea ulun hitu. Samea antigu nee, ema mos bolu nia diabu ka Satanás. Anju nee kesi tiha samea ulun hitu ho korenti, atu hatama ba iha rai kuak klean nakukun laran too tinan rihun ida.

³ Depois anju nee soe nia ba rai kuak klean laran i xavi metin tiha para nia la bele lohi tan ema hosi nasaun hotu-hotu iha mundu. Liu tiha tinan rihun ida mak husik fali nia, maibee husik tempu la kleur.

⁴ Depois hau haree kadeira ukun barak ho ema tuur hela iha kadeira ida-idak. Nai Maromak foo ona kbiit ba ema sira nee hodi foo justisa. Uluk sira sei moris iha mundu, ema tesi tiha sira nia kakorok tanba sira foo sasin kona ba Jesus Kristu i foo sai Nai Maromak nia liafuan. Sira nee nunka adora animal siak ho nia estatua, i lakohi simu animal nee nia marka iha sira nia reen toos ka iha sira nia liman. Maski ema oho tiha ona sira, maibee Nai Maromak halo moris fali sira, i sira ukun hamutuk ho Kristu too tinan rihun ida.

⁵ Sira nee mak ema primeiru nebee Nai Maromak halo moris fali hosi mate. Ema mate sira seluk tenki hein too tinan rihun ida nee hotu foin Nai Maromak halo moris fali sira.

⁶ Sira nebee moris fali primeiru nee, sira nee hetan bensaun. Sira sai ona Nai Maromak nia povu santu. Sira la hetan mate ba dala rua. Sira sei sai nai-lulik hodi serbii Nai Maromak ho Jesus Kristu, i sei ukun hamutuk ho Kristu durante tinan rihun ida.

Satanás lakon funu

⁷ Bainhira tinan rihun ida nee hotu ona, Maromak sei haruka husik Satanás hosi nia dadur fatin,

⁸ i Satanás sei sai mai lohi nasaun hotu-hotu iha mundu. Nasaun sira nee ema temi dehan, Gog ka Magog. Diabu bosok ema para sira halibur hamutuk hodi halo funu. Ema nebee mak halibur hamutuk nee barak teb-tebes, hanesan rai-henek iha tasi ibun.

⁹ Sira lao mai hosi fatin hotu-hotu iha mundu hodi haleu Nai Maromak nia povu nia hela fatin para asalta sira. Fatin nee mak sidade nebee Nai Maromak hadomi. Maibee ahi lakan ida monu tuun hosi loro-leten haan motuk tiha sira hotu.

¹⁰ Diabu, ida nebee uluk bosok sira hotu, sei soe tama tiha iha ahi lakan boot nia laran. Iha nebaa nia sei terus loron-kalan hamutuk ho animal siak ho nia profeta falsu too tinan ba tinan.

Nai Maromak tesi ema hotu-hotu nia lia

¹¹ Hotu tiha hau haree kadeira ukun mutin boot ida, ho mos Ida nebee tuur iha kadeira ukun nee. Derepenti deit lalehan ho rai halai sees hosi Nia futar oin too lakon tiha.

¹² Hau haree ema sira nebee mate tiha ona, kiik-boot hotu-hotu hamriik hela iha kadeira ukun nia oin. Depois anju loke livru nebee hakerek ema hotu-hotu nia hahalok iha mundu. Anju mos loke livru ida seluk, iha livru nee hakerek ema sira nebee sei hetan moris rohan-laek. I Nai Maromak tesi ema ida-idak nia lia tuir sira nia hahalok nebee hakerek tiha ona iha livru nee nia laran.

¹³ Ema nebee uluk mate iha tasi laran, tasi sei entrega fila fali. Mate ho ema mate sira nia fatin sei entrega fali hotu. Tuir mai Nai Maromak tesi sira ida-idak nia lia tuir saida mak sira uluk halo.

¹⁴ Hotu tiha mate sira nia fatin soe tiha ba iha ahi lakan boot nebee nunka mate nia laran, i Mate mos soe hotu iha nebaa. Ahi lakan boot nee mak ema bolu dehan, “mate ba dala rua”.

¹⁵ Ema sira nebee naran la hakerek iha livru ema moris rohan-laek nian, mos soe tama hotu ba iha ahi lakan boot nee nia laran.