Apokalipse 2 - Biblia Tetun Dili

Nai Jesus nia lia menon ba sarani sira iha Efezu

¹ Tuir mai, Ema nee hatete mai hau, “Hakerek hanesan nee ba sarani sira iha sidade Efezu: ‘Hau mak kaer fitun hitu iha Hau nia liman kwana, i Hau lao haleu ahi-oan riin osan mean hitu nee. Hau nia lia menon mak nee:

² Hau hatene buat hotu-hotu nebee imi halo: Hau hatene imi serbisu makaas hodi serbii Nai Maromak, i imi aguenta ho pasiensia iha terus nia laran. Hau mos hatene imi la simu ema aat iha imi nia leet. Se iha ema ruma mai lohi imi dehan, sira Hau nia apostolu, imi sempre koko sira i deskobre katak sira bosok.

³ Ema halo terus imi tanba imi fiar mai Hau, maibee imi aguenta nafatin, i la kole.

⁴ Maibee iha buat ida mak Hau la simu: Imi la hatudu imi nia domin mai Hau hanesan uluk, tanba imi husik tiha ona imi nia domin ida uluk nee.

⁵ Imi monu aat liu ona! Agora, hanoin fila fali imi nia domin uluk. Husik tiha imi nia sala nee hodi moris fali tuir imi nia hahalok ida uluk nia. Se lae, Hau sei mai hasai imi nia ahi-oan riin.

⁶ Maski nunee, imi mos halo buat diak ida: imi la simu Nikolau nia ema sira nia hahalok, Hau mos la simu.

⁷ Imi nebee iha tilun, rona didiak saida mak Maromak nia Espiritu hatete ba sarani sira. Ema nebee manaan, Hau sei foo direitu ba nia para bele haan ai fuan nebee lori nia ba moris rohan-laek. Ai fuan nee nia huun moris iha Nai Maromak nia toos Eden.’ ”

Nai Jesus nia lia menon ba sarani sira iha Esmirna

⁸ Depois Ema nee hatete mai hau, “Hakerek hanesan nee ba sarani sira iha sidade Esmirna: ‘Hau mak huun ho rohan. Uluk Hau mate tiha ona maibee agora Hau moris fali ona. Hau nia lia menon mak nee:

⁹ Hau hatene imi moris iha terus ho kiak nia laran. Maski nunee iha Maromak nia oin imi riku. Hau hatene ema balu hatete aat imi. Sira deklara sira nia aan dehan sira Maromak nia ema, afinal lae. Sira la hakruuk ba Maromak maibee sira sai satanas nia ema.

¹⁰ Maski nunee imi lalikan tauk kona ba terus nebee mak imi sei hetan. Hau hatete ba imi, diabu sei halo imi balu sai dadur iha kadeia hodi koko imi nia fiar. Imi sei hetan terus too loron sanulu. Maibee imi tenki tuir nafatin Hau too mate, maski ema oho imi. Se imi halo nunee, Hau sei foo prémiu moris rohan-laek nian ba imi.

¹¹ Imi nebee iha tilun, rona didiak saida mak Maromak nia Espiritu hatete ba sarani sira. See mak manaan, nia sei la tama ba iha ahi infernu. Tama ba ahi infernu nee mak ema bolu dehan ꞌmate ba dala ruaꞌ.’ ”

Nai Jesus nia lia menon ba sarani sira iha Pérgamu

¹² Depois Ema nee hatete mai hau, “Hakerek hanesan nee ba sarani sira iha sidade Pérgamu: ‘Hau mak kaer surik oin-kotuk kroat hotu. Hau nia lia menon mak nee:

¹³ Hau hatene imi nia hela fatin nee, Satanás mak hela iha nebaa hodi ukun. Maski nunee imi kaer metin nafatin Hau nia naran. Iha imi nia sidade nee mos, ema oho tiha Antipas, ema ida nebee sempre foo sasin loloos kona ba Hau. Maski sira oho tiha nia mos, imi la husik imi nia fiar mai Hau.

¹⁴ Maibee iha buat balu mak Hau la simu: Imi balu tuir fali Balaão nia hanorin. Uluk Balaão hanorin ema ida naran Balak para lohi ema Israel monu ba sala. Nunee sira haan fali hahaan nebee mak ema oferese ona ba estatua lulik, i sira mos halo relasaun seksual ho ema nebee laos sira nia feen ka laen.

¹⁵ Imi balu mos tuir hanorin falsu nebee Nikolau nia ema sira hanorin.

¹⁶ Tanba nee husik ona imi nia sala ba! Se lae, la kleur tan Hau baa ho surik nebee iha Hau nia ibun laran nee hodi halo funu hasoru imi.

¹⁷ Imi nebee iha tilun, rona didiak saida mak Maromak nia Espiritu hatete ba sarani sira. See mak manaan, Hau sei foo ai haan manaa. Ai haan nee agora sei subar hela. Hau mos sei foo fatuk mutin ba sira ida-idak. Iha fatuk nee hakerek naran foun, naran nee ema ida sei la hatene, so ema nebee simu fatuk nee deit mak hatene.’ ”

Nai Jesus nia lia menon ba sarani sira iha Tiatira

¹⁸ Tuir mai Ema nee hatete mai hau, “Hakerek hanesan nee ba sarani sira iha sidade Tiatira: ‘Hau Maromak nia Oan. Hau nia matan hanesan ahi lakan, i Hau nia ain lakan hanesan riti nebee ema sunu ba ahi. Hau nia lia menon mak nee:

¹⁹ Hau hatene buat hotu-hotu nebee imi halo: Imi hadomi malu, i fiar metin mai Hau. Imi serbii ema seluk i aguenta ho pasiensia iha terus laran. Hau mos hatene, agora imi halao Hau nia serbisu ho badinas liu fali uluk.

²⁰ Maibee iha buat ida mak Hau kontra: Imi husik deit feto Jezabel hanorin sala. Nia foti aan dehan nia Maromak nia profeta ida. Maibee nia hanorin sarani sira lao sala dalan, too sira mos halo relasaun seksual ho ema nebee laos sira nia feen ka laen i haan fali hahaan nebee ema oferese tiha ona ba estatua lulik.

²¹ Hau foo ona tempu ba Jezabel atu hakribit nia sala nee, maibee nia lakohi.

²² Nunee Hau sei riba tuun nia ba rai hodi halo nia terus iha nia toba fatin. Ema nebee halo adulteriu ho nia mos, se sira la hakribit sira nia sala nee, Hau sei foo terus todan ba sira.

²³ Sira nebee tuir Jezabel hanesan fali oan ida tuir nia inan, Hau sei oho hotu sira. Nunee sarani sira iha fatin-fatin deit sei hatene katak, Hau konhese momoos ema nia hanoin ho laran i Hau foo ba ema ida-idak tuir nia hahalok.

²⁴ Maibee imi balu iha Tiatira la tuir feto nee nia hanorin aat. Maski ema balu dehan nia hanorin ꞌSatanás nia segredu bootꞌ mos, imi lakohi rona. Ba imi sira nee, Hau la foo tan regra,

²⁵ naran katak imi kaer metin nafatin imi nia fiar too Hau fila fali mai.

^26-27 Ema nebee manaan no halo tuir nafatin Hau nia hakarak too rohan, Hau sei foo ba sira kbiit nebee Hau hetan hosi Hau nia Aman. Hau foo kbiit ba sira hodi ukun nasaun sira nebee kontra Nai Maromak ho liman besi. Sira sei ukun ho rota nebee halo ho besi, i hodi rota nee sira sei halo rahun tiha povu hanesan fali ema halo rahun sanan rai.

²⁸ Ba ema nebee halo tuir nafatin Hau nia hakarak too rohan, Hau sei foo tan fitun dadeer nian.

²⁹ Imi nebee iha tilun, rona didiak saida mak Maromak nia Espiritu hatete ba sarani sira.’ ”