Apokalipse 19 - Biblia Tetun Dili

Ema barak haklalak hahii Nai Maromak

¹ Hotu tiha hau rona hanesan ema barak teb-tebes haklalak iha lalehan dehan, “Aleluia! Hahii ba Nai Maromak iha leten aas baa! Ita nia Maromak kbiit boot teb-tebes, Nia mak salva ita.

² Nia tesi lia ho loloos, Nia foti ona desizaun atu kastigu feto luroon nee. Feto aat nee dada ema hosi mundu tomak para halo sala adulteriu ho nia, nunee ema sira nee mos sai aat hotu. Nia mos oho Nai Maromak nia atan sira, i agora Maromak foo kastigu ona ba nia.”

³ Depois ema barak nee haklalak tan dehan, “Aleluia! Hahii ba Nai Maromak! Ahi haan motuk tiha ona feto luroon nee, ahi nee nia suar sae bebeik too tinan ba tinan.”

⁴ Depois katuas lia nain rua-nulu resin haat ho mos animal moris haat nee hakneak i hakruuk too rai iha Nai Maromak nia kadeira ukun nia oin hodi adora Nia dehan, “Amen, aleluia! Hahii ba Nai Maromak!”

Bibi Oan nia festa kazamentu

⁵ Depois lian ida mai hosi kadeira ukun nee dehan, “Imi hotu-hotu nebee serbii Nai Maromak, imi hotu kiik-boot nebee respeita Nia, hahii ita nia Nai Maromak.”

⁶ Tuir mai hau rona buat ruma hanesan ema barak teb-tebes nia lian, hanesan fali laloran boot, ka hanesan rai tarutu makaas. Lian nee dehan, “Aleluia! Hahii ba Nai Maromak, tanba Nai Maromak Kbiit Nain mak ukun.

⁷ Mai ita foti aas Nai Maromak nia naran ho laran haksolok no kontenti, tanba Bibi Oan nia loron kazamentu too ona, i Nia noiva hatais prontu ona atu kaben ho Nia.

⁸ Vestidu mutin nabilan nebee nia hatais nee Nai Maromak mak foo.” Vestidu nabilan nee signifika hahalok diak hosi Maromak nia povu.

⁹ Depois anju nee dehan mai hau, “Hakerek nunee: See mak hetan konvite atu mai asisti Bibi Oan nia festa kazamentu nee, sira hetan bensaun.” Anju nee hatutan tan dehan, “Nai Maromak nia liafuan nee loos duni!”

¹⁰ Tuir mai hau hakneak i hakruuk too rai iha anju nee nia oin atu adora nia, maibee nia bandu dehan, “La bele! Adora mak Maromak deit! Tanba hau nee Maromak nia atan hanesan mos o ho o nia maluk sira seluk nebee foo sai nafatin Jesus nia hanorin. Tanba ita hotu hetan kbiit hosi Maromak nia Espiritu para ita foo sasin kona ba Jesus.”

Nai Jesus sae kuda mutin i manaan funu

¹¹ Depois hau haree lalehan nakloke hela, i hau haree kuda mutin ida iha nebaa. Ema nebee tuur iha kuda leten nee, Nia naran mak “Kaer Metin Nia Promesa” ho “Ema nebee Loos”. Bainhira Nia tesi ema nia lia, Nia tesi lia ho loloos, i bainhira Nia halo funu, Nia halo ho laran moos.

¹² Ema nee nia matan hanesan fali ahi nebee mak lakan makaas. Iha Nia ulun tau koroa liurai nian barak. Iha Nia isin lolon hakerek naran ida, maibee so Nia deit mak hatene naran nee, ema seluk la hatene.

¹³ Nia hatais hena nebee habokon tiha ho raan. Ema temi Nia naran “Maromak nia Liafuan”.

¹⁴ Iha mos tropas lalehan nian barak teb-tebes sae kuda mutin tuir Nia. Tropas sira nee hotu hatais hena mutin nabilan.

¹⁵ Ema nee iha surik kroat ida sai hosi nia ibun, i Nia uza surik nee hodi halo funu hasoru nasaun hotu-hotu iha mundu i Nia manaan. Depois Nia sei ukun nasaun sira nee ho liman besin. Nia sei sama sira hanesan fali ema sama uvas iha tanki laran hodi hasai nia been. Nia halo nunee hodi hatudu katak, Nai Maromak Forsa Teb-tebes fakar Nia hirus ba sira.

¹⁶ Iha Ema nee nia batina ho mos iha Nia kelen hakerek naran ida nunee: “Liurai hotu-hotu nia Liurai, nai hotu-hotu nia Nai.”

Nai Jesus manaan funu hasoru animal siak no nia tropas sira

¹⁷ Depois hau haree tan anju ida hamriik hela iha loro matan leten. Anju nee koalia ho lian makaas ba manu fuik hotu-hotu nebee semo aas, hodi dehan, “Mai halibur hamutuk hodi haan rame-rame iha Nai Maromak nia festa boot.

¹⁸ Mai haan tiha ema hotu-hotu nia mate isin: liurai sira, komandante militar ho aswain sira, kuda ho soldadu sira nebee sae kuda, ema boot ho kiik, atan ho ema nebee livre. Mai haan sira hotu nia mate isin baa!”

¹⁹ Depois hau haree fali animal siak nebee uluk sai hosi tasi laran nee. Nia halibur hamutuk ho liurai sira iha mundu ho sira nia tropas hodi halo funu hasoru Ema ida nebee sae kuda mutin nee ho Nia tropas.

²⁰ Maibee Ema nebee sae kuda mutin nee manaan tiha animal siak nee ho nia profeta falsu. Profeta falsu nee mak uluk hatudu nia milagre boboot hodi animal siak nia naran. Ho milagre sira nee nia bosok ema hotu-hotu nebee simu ona animal siak nia marka i adora animal nee nia estatua. Agora Ema ida nebee sae kuda mutin nee kaer animal siak nee ho nia profeta falsu, i soe moris sira nain rua ba iha ahi lakan boot nia laran.

²¹ Depois nia uza surik nebee sai hosi Nia ibun laran nee hodi oho ema hotu nebee mak tuir animal siak nee. I manu fuik mai rame-rame hodi haan tiha sira nia isin nee too bosu didiak.