Apokalipse 18 - Biblia Tetun Dili

Sidade Babilónia rahun tiha ona

¹ Hotu tiha hau haree anju ida tan tuun mai hosi lalehan. Anju nee nia kbiit boot i nia nabilan too halo mundu nee sai naroman hotu.

² Nia koalia ho lian makaas dehan, “Sidade boot Babilónia rahun tiha ona! Rahun too rai. Sidade nee sai ona espiritu aat sira nia hela fatin, ho espiritu sira nee hotu-hotu nia subar fatin. Manu sira nebee ema la bele haan no ema hakribit, halo nia knuuk iha nebaa.

³ Sidade nee rahun tiha ona, tanba nasaun hotu-hotu iha mundu, mai hemu nia tua too lanu hodi halo relasaun seksual tuun-sae, i liurai hotu-hotu iha mundu mai halo relasaun seksual ho nia. Ema Babilónia kaan atu sosa sasaan didiak deit, nunee halo kontratu nain sira hosi mundu tomak sai riku.”

⁴ Depois hau rona tan lian ida hosi lalehan dehan nunee: “Hau nia povu, sai tiha hosi sidade boot nee. Imi la bele halo tuir nia hahalok aat nee, se lae imi mos hetan hotu kastigu hamutuk ho nia.

⁵ Tanba nia sala butuk aas too ona loro-leten, i Nai Maromak la haluha nia hahalok aat.

⁶ Nee duni, foo terus ba nia tuir terus nebee mak nia foo ona ba ema seluk, maibee nia hahalok aat nee, tenki selu too dala rua. Uluk nia kahur tua manas foo ba ema seluk hemu, agora tenki obriga nia hemu tua manas makaas liu dala rua.

⁷ Uluk nia foti aan liu hodi moris goza deit, agora tenki foo fali terus ho susar boot liu ba nia. Feto luroon nee gaba aan dehan, ‘Hau nee liurai feto! Hau nunka sai feto faluk, i nunka hatene tristi.’

⁸ Tanba nee, iha loron ida deit, terus boot sei kona nia: tanis lelir, hamlaha no mate, too ahi haan motuk tiha nia isin. Tanba Nai Maromak Forsa Teb-tebes mak foo justisa ba nia nunee.

⁹ Bainhira ahi haan nia, liurai sira hosi mundu tomak nebee uluk mai halo sala adulteriu hodi moris goza hamutuk ho nia, sira sei haree ahi suar sae, i tanis lelir ba nia.

¹⁰ Sira tauk nia terus nee kona mos sira, entaun sira hamriik hosi dook deit hodi dehan, ꞌKoitadu Babilónia! Koitadu sidade boot i forti nee! Derepenti o hetan kastigu, iha oras ida deit, o rahun tiha ona.ꞌ

¹¹ Kontratu nain sira hosi mundu tomak mos tanis lelir ba sidade nee, tanba la iha tan ema ida atu sosa sira nia sasaan,

¹² sira nia osan mean, osan mutin, fatuk murak, ka morteen perola, sira nia hena mesak furak, sira nia hena diak nian nebee kor mean ho kor uvas. Ema la sosa tan sira nia ai morin, sasaan oi-oin nebee halo hosi elefante nia nehan, ai nebee karu, riti, besi ka fatuk marmore.

¹³ Ema la sosa tan sira nia ai kanela ka temperus oi-oin, sira nia ai-been morin ka mina morin oi-oin, sira nia tua, mina azeiti, trigu diak nian, ka trigu musan. La iha tan ema atu sosa sira nia karau, bibi malae ka kuda, sira nia kuda kareta ka sira nia atan.

¹⁴ Kontratu nain sira sei dehan ba sidade nee, ‘Buat hotu-hotu nebee o kaan, nabeen tiha ona. O nia rikusoin ho sasaan furak sira nee hotu-hotu nabeen tiha ona, i o sei la hetan tan ona.’

¹⁵ Kontratu nain sira nee riku tiha ona, tanba uluk mai faan sira nia sasaan iha sidade nee. Sira hotu sei hamriik hosi dook deit, tanba tauk sidade nee nia terus kona mos sira. I sira sei tanis lelir dehan,

¹⁶ ‘Koitadu! Koitadu sidade boot nee! Uluk o hatais hena mesak didiak, kor mean ho kor uvas ho folin karun teb-tebes. Uluk o enfeita aan ho osan mean, fatuk murak ho morteen perola.

¹⁷ Maibee iha oras ida nia laran deit, o nia rikusoin sira nee mohu tiha hotu.’ Ema sira nebee kaer roo, ema nebee serbisu iha roo laran, pasajeiru sira ho mos ema sira nebee mak buka moris iha tasi, sira hotu-hotu mos hamriik hosi dook deit

¹⁸ bainhira ahi haan sidade nee. Kuandu sira haree ahi suar sae, sira halerik ho lian makaas dehan, ꞌLa iha tan sidade seluk hanesan sidade boot ida nee!ꞌ

¹⁹ Sira raut rai rahun tau ba sira nia ulun hodi hatudu sira nia laran tristi, i tanis lelir dehan, ꞌKoitadu! Koitadu sidade boot nee! Ami nebee lori roo baa-mai iha tasi laran halo kontratu, ami hotu sai riku ona hosi o nia rikusoin. Maibee iha oras ida nia laran deit, o rahun tiha hotu.ꞌ”

²⁰ Depois hau rona lian ida dehan, “Imi nebee moris iha lalehan, haksolok baa! Maromak nia povu, Nai Jesus nia apostolu sira ho profeta sira, haksolok baa! Tanba Maromak kastigu ona sidade nee, tuir saida mak nia uluk halo ba imi.”

²¹ Hotu tiha anju forti ida lori fatuk boot hanesan meza, nia riba tuun ba tasi laran hodi dehan, “Hanesan nee mos Nai Maromak sei riba tuun sidade boot Babilónia, i ema sei la haree tan.

²² Iha sidade nee, sei la rona tan ema kanta, la rona tan ema toka viola ka huu flauta ho korneta. La iha tan badaen atu serbisu tuir ida-idak nia area, la iha ona ema dulas hare.

²³ Ahi-oan sei la foo tan naroman ba sidade nee. La iha tan festa kazamentu. Sidade boot nee hetan kastigu nunee tanba uluk nia kontratu nain sira mak sai ema boot liu iha mundu, i nia ema matandook sira nia hahalok aat bosok nasaun hotu-hotu.

²⁴ Uluk ema Babilónia halo Maromak nia profeta sira ho Nia povu sira seluk raan fakar too mate. Ema sira nebee ema oho iha fatin selu-seluk mos, Babilónia mak lori todan.”