Apokalipse 17 - Biblia Tetun Dili

Sidade Babilónia hanesan feto luroon

¹ Depois anju ida hosi anju hitu nebee kaer manko sira nee, mai iha hau hodi dehan, “Mai para hau hatudu ba o oinsaa Nai Maromak kastigu sidade boot nebee harii besik mota barak. Sidade boot nee hanesan fali feto luroon nebee la hatene aan.

² Uluk liurai sira hosi mundu tomak mai halo sala adulteriu ho nia ema sira iha sidade nee. I povu hosi mundu tomak mos hemu nia tua too lanu hodi halo tuir nia hahalok aat sira nee.”

³ Depois Maromak nia Espiritu domina hau, i anju nee lori hau ba rai fuik maran. Iha nebaa hau haree feto ida tuur hela iha animal siak mean lakan ida nia leten. Iha animal siak nee nia isin lolon tomak hakerek liafuan nebee hatete aat Nai Maromak. Animal nee iha ulun hitu, dikur sanulu.

⁴ Feto nee hatais hena folin karun teb-tebes, kor mean ho kor uvas. I nia tau osan mean, fatuk murak, ho morteen perola mesak karun. Nia kaer hela kopu osan mean ida. Kopu nee nakonu ho nia hahalok aat, hanesan sala adulteriu, buat aat ho buat foer selu-seluk nebee mak nia halo.

⁵ Iha feto nee nia reen toos hakerek naran ida, nia signifikadu sei segredu hela. Nia naran nunee: “Sidade boot Babilónia, feto luroon hotu-hotu nia inan, hahalok foer hotu-hotu iha mundu nia huun.”

⁶ Hau haree feto aat nee, raan mak lanu tiha nia. Nia gosta liu oho Nai Maromak nia ema sira, gosta oho ema nebee foo sasin kona ba Jesus Kristu. Bainhira hau haree nia, hau admira teb-tebes.

⁷ Maibee anju nee husu mai hau, “Nusaa mak o admira nunee? Hau sei esplika ba o buat nebee mak sei segredu hela kona ba feto nee ho mos animal ulun hitu dikur sanulu nebee nia sae nee.

⁸ Animal siak nee uluk moris iha mundu, maibee agora la iha tiha ona. Aban-bainrua nia sei mosu fali mai hosi rai kuak klean nakukun. Bainhira nia mosu fali mai, ema hotu-hotu iha mundu nebee naran la tau iha lista ema moris rohan-laek nian molok Maromak halo mundu nee, sira sei admira haree animal siak nee. Tanba animal siak nee uluk moris, depois la iha tiha ona, maibee too ikus mosu fali. Maski nunee Maromak sei halo rahun tiha nia.

⁹ Ema presiza uza kakutak para bele komprende animal siak nee. Nia ulun hitu nee hatudu ba foho hitu, feto nee baibain tuur iha foho nee nia tutun.

¹⁰ Nia ulun hitu nee mos hatudu ba liurai nain hitu. Nain lima monu tiha ona, nain ida agora ukun hela, i ida seluk seidauk mai, maibee bainhira nia mai, nia ukun lalais deit.

¹¹ Animal siak nebee mak uluk iha i agora la iha tiha ona, nia mos uluk halo parte iha liurai nain hitu nee. Maibee aban-bainrua nia sei ukun fila fali para sai liurai numeru walu. Too ikus Maromak sei halo rahun tiha nia.

¹² Dikur sanulu nebee o haree nee, hatudu ba liurai nain sanulu tan nebee seidauk kaer ukun. Sira sei hetan kbiit para ukun hamutuk ho animal siak nee, maibee ukun too oras ida deit.

¹³ Liurai nain sanulu nee laran ida deit hodi entrega sira nia kbiit ba animal siak nee.

¹⁴ Sira sei halo funu kontra Bibi Oan. Maibee Bibi Oan ho Nia povu sei manaan, tanba Bibi Oan nee mak nai hotu-hotu nia Nai, ho liurai hotu-hotu nia Liurai. Nia povu nee mak ema nebee Nia hili no Nia bolu tiha ona, i sira foo laran ba Nia.”

¹⁵ Anju nee esplika tan, “Ohin o haree feto luroon nee tuur iha bee barak. Bee sira nee hatudu ba ema hosi suku, povu, lian ho nasaun hotu-hotu iha mundu.

¹⁶ Ohin o mos haree dikur sanulu nebee hatudu ba liurai nain sanulu, liurai sira nee ho animal siak nee sei odi feto luroon nee. Sira sei hadau tiha feto nee nia sasaan hotu-hotu too kolu molik tiha nia. Sira sei haan tiha nia isin, depois nia isin restu soe ba ahi laran.

¹⁷ Nai Maromak mak halo liurai nain sanulu nee laran ida hodi foo sira nia kbiit ba animal siak nee hodi ukun. I sira sei tuir animal siak nee too planu nebee mak Maromak hatete tiha ona, sai realidade duni.

¹⁸ Feto luroon nebee o haree nee hatudu ba sidade boot nebee mak ukun liurai hotu-hotu iha mundu.”