Apokalipse 16 - Biblia Tetun Dili

Nai Maromak fakar Nia hirus mai mundu

¹ Depois hau rona lian makaas ida sai hosi Uma Kreda Boot hodi haruka anju hitu nee dehan, “Baa ona! Lori manko hitu nee baa fakar tiha Maromak nia hirus ba mundu.”

² Anju numeru ida fakar uluk Maromak nia hirus nebee iha nia manko laran nee ba mundu. Derepenti deit, ema sira nebee mak simu animal siak nia marka i adora nia estatua, sira nia isin sai kanek dodok hotu, halo sira senti moras loos.

³ Anju numeru rua fakar Maromak nia hirus nebee mak iha nia manko laran ba tasi. Derepenti tasi sai raan hanesan fali ema mate nia raan, i buat hotu-hotu nebee moris iha tasi laran mate hotu.

⁴ Anju numeru tolu fakar Maromak nia hirus nebee mak iha nia manko laran ba mota ho bee matan, nunee bee hirak nee hotu sai tiha raan.

⁵ Tuir mai hau rona anju ida nebee toma konta bee hotu iha mundu dehan nunee: “Nai Maromak, Ita Boot santu no justu. Ita Boot iha hori uluk kedas i iha nafatin. Kastigu nebee mak Ita Boot foo ba sira nee loos,

⁶ tanba sira oho Ita Boot nia povu ho profeta sira too sira nia raan fakar, i agora Maromak obriga sira hemu fali raan. Sira merese duni hetan kastigu nee.”

⁷ Depois hau rona lian ida hosi meza sakrifisiu hataan nunee, “Loos duni! Nai Maromak Kbiit Nain, Ita Boot tesi lia ho loos duni. Sira merese duni simu kastigu nebee Ita Boot foo ba sira.”

⁸ Hotu tiha anju numeru haat fakar Maromak nia hirus nebee iha nia manko laran ba loro matan. Derepenti loro matan simu kbiit para sai manas liu too sunu ema nia isin hanesan fali ahi.

⁹ Loro manas makaas halo sira nia isin kanek, i sira hatete aat Nai Maromak nia naran, tanba Nia mak iha kbiit hodi foo terus boot nee ba sira. Maski nunee, sira la hakribit sira nia sala, i lakohi foti aas Nai Maromak nia naran.

¹⁰ Anju numeru lima fakar Maromak nia hirus nebee mak iha nia manko laran ba animal siak nia kadeira ukun. Derepenti nakukun taka metin animal siak nee nia reinu hotu, i sira hotu-hotu tata nanaal tanba sira terus liu.

¹¹ Sira hotu-hotu koalia aat Nai Maromak iha lalehan tanba sira nia kanek moras teb-tebes. Maski terus nunee, maibee la iha ema ida husik nia hahalok aat.

¹² Anju numeru neen fakar Maromak nia hirus nebee iha nia manko laran ba mota boot Eufrates. Derepenti mota nee sai maran tiha, para loke dalan ba liurai sira hosi loro-sae bele liu.

¹³ Tuir mai hau haree tan espiritu aat tolu, haree hanesan manduku. Ida sai hosi samea ulun hitu nia ibun, ida seluk sai hosi animal siak primeiru nia ibun, ida tan sai hosi profeta falsu nia ibun. Profeta falsu nee mak animal siak segundu.

¹⁴ Espiritu aat tolu nee iha kbiit hodi halo milagre oi-oin. I sira baa konvida liurai sira iha mundu tomak atu mai halibur hamutuk hodi halo funu hasoru Nai Maromak Kbiit Nain. Afinal tempu nebee sira marka atu funu nee mak Nai Maromak nia loron para kastigu Nia inimigu sira.

^15-16 Fatin nebee liurai sira halibur atu halo funu nee ho lian Ebreu dehan Armagedon. Jesus Kristu hatete, “Rona didiak! Hau sei mai derepenti deit hanesan naok-teen. Ema nebee hadeer hela deit no hatais hela nia ropa, ema nee hetan bensaun. Se lae, bainhira Hau mai, nia moe loos tanba nia isin molik hela.”

¹⁷ Tuir mai anju numeru hitu fakar Maromak nia hirus nebee iha nia manko laran ba anin. Derepenti lian makaas ida sai hosi kadeira ukun iha Uma Kreda Boot dehan, “Kumpri hotu tiha ona!”

¹⁸ Depois rai lakan fera ba-mai, rai tarutu makaas iha fati-fatin, rai mos nakdoko. Dezde Maromak halo ema, seidauk iha rai nakdoko makaas hanesan nee.

¹⁹ Sidade boot Babilónia nakfera fahe ba tolu, i sidade hotu-hotu iha nasaun sira seluk mos rahun. Nai Maromak la haluha ema Babilónia nia hahalok aat sira. Nee mak Nia fakar nia hirus ba iha kopu tua nian halo nakonu hodi obriga sira hemu.

²⁰ Ilha sira iha tasi klaran mout tiha i foho sira mos lakon hotu.

²¹ Udan jelu fatuk boboot monu hosi kalohan hanehan ema. Udan jelu fatuk nee nia todan too kilu haat-nulu. Ema sira nee hatete aat Nai Maromak nia naran tanba terus nebee sira simu nee todan teb-tebes.