Apokalipse 15 - Biblia Tetun Dili

Anju hitu atu lori terus boot ikus ba mundu

¹ Hotu tiha hau haree tan sinal ida iha lalehan halo hau admira teb-tebes. Iha anju hitu, ida-idak ho nia kbiit para haruka terus boot ida mai mundu. Terus boot hitu nee mak terus ikus ona, tanba liu tiha nee, Nai Maromak sei la fakar tan Nia hirus mai mundu.

² Tuir mai hau haree buat ida hanesan tasi, maibee haree hanesan fali vidru kahur ho ahi. Hau mos haree ema barak nebee mak manaan tiha ona animal siak ho nia estatua tanba sira la adora nia i la simu nia marka ho nia numeru nebee reprezenta nia naran. Ema sira nee hamriik iha tasi ninin i kaer hela viola nebee Nai Maromak foo ba sira.

³ Sira hotu hananu kanta ida hosi Nai Maromak nia atan Moisés ho Bibi Oan nunee: “Nai Maromak Forsa teb-tebes, buat hotu-hotu nebee mak Ita Boot halo makaas teb-tebes, halo ema admira! Ita Boot mak nasaun hotu-hotu nia Liurai, Ita Boot halo saida deit sempre loos.

⁴ Nai, ema hotu-hotu tauk Ita Boot i foti aas Ita Boot nia naran, tanba so Ita Boot deit mak santu. Ema hosi nasaun hotu-hotu sei mai adora Ita Boot, tanba ema hotu-hotu haree ona katak Ita Boot halo saida deit sempre diak no loos.”

⁵ Bainhira sira hananu hotu ona, hau haree iha lalehan, fatin nebee mak santu liu iha tenda orasaun nia laran, odamatan nakloke.

⁶ I anju hitu nebee lori terus boot nee, sai hosi Uma Kreda Boot laran. Sira hatais hena mutin nabilan i kesi hena naruk osan mean iha sira nia hirus matan.

⁷ Depois animal haat nee ida fahe manko osan mean ba anju hitu nee ida-idak. Manko nee nakonu ho kastigu nebee Maromak atu fakar mai mundu. Maromak nee moris tinan ba tinan nafatin.

⁸ La kleur Tenda Orasaun nee ahi suar nakonu tiha. Ahi suar nee hatudu Nai Maromak nia naroman nabilan. La iha ema ida mak bele tama ba iha Tenda Orasaun nee. Too terus boot hitu nebee anju hitu atu fakar mai mundu nee hotu ona mak foin bele tama fali.