Apokalipse 14 - Biblia Tetun Dili

Bibi Oan ho Nia ema 144.000

¹ Tuir mai hau haree tan buat foun ida. Hau haree Bibi Oan hamriik hela iha foho Siaun nia tutun, hamutuk ho ema rihun atus ida haat-nulu resin haat. Iha sira hotu nia reen toos hakerek Bibi Oan nia naran ho mos Bibi Oan nia Aman nia naran.

² I hau rona buat ida iha lalehan, hanesan laloran boot ka rai tarutu makaas. Lian nebee hau rona nee mos hanesan ema barak toka muzika ho viola.

³ Ema rihun atus ida haat-nulu resin haat nee hamriik hela iha Nai Maromak nia kadeira ukun nia oin ho animal moris haat ho katuas lia nain rua-nulu resin haat nee nia oin. Ema sira nee hananu kanta foun ida. Kanta nee ema seluk la hatene, so ema sira nee mak hatene, tanba hosi mundu tomak, sira nee mak Maromak sosa kotu tiha ona.

⁴ Ema sira nee moris loos, hanesan mane klosan ida nebee sempre kuidadu nia aan i nunka iha relasaun seksual ho feto. Sira sempre lao tutuir Bibi Oan. Sira nee Maromak sosa kotu ona para sai Nia povu. Sira mos hanesan ai fuan diak nian nebee toos nain kuu uluk hodi oferese ba Nai Maromak ho mos ba Bibi Oan.

⁵ Ema sira nee nunka bosok i sala ituan mos la iha.

João haree anju tolu

⁶ Depois hau haree anju ida semo aas lori Maromak nia Novidade Diak nebee iha too tinan ba tinan. Nia baa lori Novidade Diak nee hodi foo sai ba ema hotu-hotu hosi povu, suku, lian ho nasaun hotu iha mundu tomak.

⁷ Anju nee hatete ho lian makaas dehan, “Hotu-hotu tenki respeita Nai Maromak i foti aas Nia naran, tanba tempu too ona atu Nai Maromak tesi ema hotu-hotu nia lia. Adora Nia tanba Nia mak halo lalehan ho rai, tasi ho bee matan.”

⁸ Iha tan anju ida seluk semo tuir anju primeiru nee hodi dehan, “Sidade boot Babilónia rahun tiha ona! Rahun too rai! Uluk sidade nee hanesan feto luroon nebee obriga nasaun hotu-hotu iha mundu hemu lanu too halo relasaun seksual tuun-sae. Maibee agora Maromak kastigu ona nia.”

⁹ Depois anju ida tan semo tuir anju rua nee. Anju nee foo sai ho lian makaas dehan, “See mak adora animal siak nee ho nia estatua, i simu nia marka iha sira nia reen toos ka liman,

¹⁰ Maromak sei fakar Nia hirus ba sira. Nia hirus nee hanesan fali tua ulun nebee manas teb-tebes. Maski manas, sira tenki hemu. Maromak sei halo sira terus teb-tebes iha ahi lakan boot nia laran, iha anju santu sira ho Bibi Oan nia oin.

¹¹ Ema hotu-hotu nebee adora animal siak nee ho nia estatua i sira nebee iha marka animal nia naran, sei hetan terus loron-kalan iha ahi laran. I ahi nebee halo sira terus nee, nia suar sae la para too tinan ba tinan.”

¹² Entaun imi nebee sai ona Nai Maromak nia povu, imi nebee halo tuir Nai Maromak nia ukun fuan i fiar metin ba Jesus too rohan, imi tenki aguenta ho pasiensia nafatin.

¹³ Hotu tiha hau rona lian ida hosi lalehan dehan, “Hakerek nunee: Ema nebee mate iha fiar ba Nai Jesus hetan bensaun.” Maromak nia Espiritu hataan, “Loos duni, sira deskansa ona, tanba sira nia serbisu ho sira nia terus hotu ona. I Nai Maromak sei selu fali sira nia kolen.”

Maromak kastigu mundu hanesan ema koa hare ka kuu uvas

¹⁴ Tuir mai hau haree kalohan mutin ida. Iha kalohan nee nia leten hau haree hanesan Ema ida mak tuur. Iha Nia ulun iha koroa liurai nian halo ho osan mean, i Nia kaer hela tudik koa hare nian kroat loos.

¹⁵ Depois anju ida sai hosi Uma Kreda Boot. Anju nee koalia ho lian makaas ba Ema nebee tuur iha kalohan leten dehan, “Hodi tudik nee koa ona baa, tanba hare hotu-hotu iha mundu tasak ona, tempu too ona atu kolheira.”

¹⁶ Entaun Ema nebee tuur iha kalohan leten nee, ho Nia tudik kroat koa hare hotu-hotu iha mundu.

¹⁷ Depois iha anju ida tan sai hosi Uma Kreda Boot, nia mos kaer tudik kroat ida.

¹⁸ Iha anju ida seluk nebee toma konta sunu ai been morin iha altar, nia lao mai hosi altar. Nia hatete ho lian makaas ba anju nebee kaer hela tudik kroat nee dehan, “Hodi tudik kroat nee tesi tiha uvas fuan sira nee baa! Tanba uvas hotu-hotu iha mundu tasak ona.”

¹⁹ Anju nee mos hodi nia tudik tesi uvas hotu-hotu hosi nia sanak. Tesi tiha hotu, nia soe ba iha tanki laran para sama hasai nia been. Sama uvas nee hatudu Maromak nia hirus.

²⁰ Fatin sama uvas nee iha liur, laos iha sidade laran. I bainhira sira sama uvas nee, sai fali raan suli hosi fatin nee hanesan fali mota tuun. Mota raan nee nia naruk kilometru atus tolu, i nia klean metru ida ho balu.