Apokalipse 13 - Biblia Tetun Dili

Animal siak nebee sai hosi tasi

¹ Depois hau haree animal siak ida sai hosi tasi laran. Animal nee nia ulun hitu, dikur sanulu. Iha nia dikur sanulu nee tau koroa liurai nian ida-idak. Iha nia ulun ida-idak hakerek naran nebee hatete aat Nai Maromak.

² Animal nebee hau haree nee, nia isin hanesan tigre. Nia ain boot hanesan animal fuik ursu nian, i nia ibun hanesan leaun nia ibun. Samea ulun hitu nee foo nia kbiit ba animal siak nee i entrega nia kadeira ukun ba nia.

³ Animal siak nee, nia ulun ida iha fitar, tanba uluk kanek boot. Tuir loloos nia mate tiha ona, maibee kanek nee diak fali ona. Ema hotu-hotu admira ho animal siak nee i sira hotu tuir nia.

⁴ Sira hotu adora samea ulun hitu nee hanesan fali maromak ida, tanba samea nee foo tiha ona kbiit ba animal siak nee. Sira mos adora animal siak nee hodi dehan, “La iha ida mak forsa hanesan animal nee! La iha ida mak bele manaan nia.”

⁵ Maromak husik deit animal siak nee foti aan i hatete aat Nai Maromak. Animal nee mos hetan lisensa para kaer ukun durante fulan haat-nulu resin rua, nee hamutuk tinan tolu ho balu.

⁶ Nia hatete aat Nai Maromak, hatete aat Nai Maromak nia naran ho Nia hela fatin, hatete aat mos hotu-hotu nebee hela iha lalehan.

⁷ Maromak foo lisensa ba animal siak nee hodi halo funu hasoru Maromak nia povu too manaan. Nia mos simu kbiit para ukun ema hotu-hotu hosi suku, povu, lian ho nasaun hotu-hotu.

⁸ Ema hotu-hotu iha mundu nee sei adora animal siak nee. So ema nebee naran hakerek ona iha lista nebee hakerek iha Livru ema moris rohan-laek nian mak la adora animal nee. Livru nee Maromak hakerek nanis ona molok Nia halo mundu. Livru nee Bibi Oan nian, Ida nebee mak ema oho.

⁹ Imi nebee iha tilun, rona didiak baa!

¹⁰ Se Maromak desidi ona katak, ema ruma tenki sai dadur, nia sei sai dadur duni. Se Maromak desidi ona katak, ema ruma tenki mate ho surik, nia sei mate duni ho surik. Nee duni sarani sira tenki aguenta ho pasiensia nafatin i fiar metin too rohan.

Animal siak nebee sai hosi rai

¹¹ Tuir mai hau haree animal siak ida tan sai mai hosi rai. Animal segundu nee nia dikur rua, hanesan bibi malae oan nia dikur, maibee nia lian hanesan samea ulun hitu nia lian.

¹² Nia simu kbiit hosi animal siak primeiru, ida nebee uluk kanek boot i tuir loos mate maibee diak fali ona. Nunee nia halao serbisu hodi animal siak primeiru nia naran, i nia obriga ema hotu-hotu iha mundu adora fali animal siak primeiru nee.

¹³ Animal segundu nee halo milagre boboot halo ema hotu-hotu admira, too nia mos halo ahi monu tuun hosi lalehan iha ema barak nia oin.

¹⁴ Ho milagre nebee nia halo hodi animal siak primeiru nia naran nee, nia lohi ema hotu iha mundu. Nia haruka ema harii estatua animal primeiru nian para foti aas animal primeiru nee, ida nebee uluk ema halo kanek ho surik, maibee sei moris hela.

¹⁵ Maromak husik animal segundu halo estatua nee bele iha iis para bele koalia. I estatua nee haruka oho tiha ema hotu-hotu nebee lakohi adora nia.

¹⁶ Animal segundu nee obriga ema hotu-hotu, kiik-boot, riku-kiak, atan ka ema livre, tenki simu marka iha sira nia liman loos ka iha sira nia reen toos.

¹⁷ Ema nebee la iha marka nee, sira la bele faan sasaan ka sosa buat ida. Iha marka nee hakerek animal siak primeiru nia naran, ka numeru nebee reprezenta nia naran.

¹⁸ Iha nee ita presiza uza matenek. Ema nebee hanoin klean bele komprende kodigu numeru nee. Numeru nee mak “666”, i hatudu ba ema ida.