Apokalipse 12 - Biblia Tetun Dili

Samea ulun hitu ameasa senhora ida ho nia Oan

¹ Hotu tiha, iha sinal ida oin seluk liu mosu iha loro-leten. Iha senhora ida, nia isin falun ho loron-matan, nia ain sama iha fulan. Iha nia ulun tau koroa liurai nian, koroa nee iha fitun sanulu resin rua.

² Senhora nee isin rua hela, besik atu tuur ahi, i nia halerik makaas tanba nia kanotak moras loos.

³ Iha tan sinal ida mosu iha loro-leten. Iha samea mean boot ida, nia iha ulun hitu, dikur sanulu. Iha nia ulun hitu nee tau koroa liurai nian ida-idak.

⁴ Samea ulun hitu nee uza nia ikun hodi baku makaas fitun parte ida hosi parte tolu tuun ba mundu. Depois nia baa hamriik iha senhora isin rua nee nia oin para nia oan moris mai nia bele tolan kedas.

⁵ Depois senhora nee tuur ahi Oan mane ida. Nia mak sei ukun nasaun hotu-hotu iha mundu ho kbiit makaas. Maibee anju ida mai hadau tiha Labarik nee hosi nia inan, i lori baa iha Nai Maromak, iha Nia kadeira ukun.

⁶ Senhora nee halai kedas baa iha rai fuik maran, iha fatin ida nebee mak Nai Maromak prepara tiha ona ba nia. Nai Maromak sei tau matan ba nia iha fatin nee too tinan tolu ho balu, nee hamutuk loron rihun ida atus rua neen nulu.

Anju Miguel funu hasoru samea ulun hitu i nia manaan

⁷ Tuir mai funu boot mosu iha lalehan. Maromak nia anju boot ida naran Miguel ho anju sira nebee tuir nia, halo funu hasoru samea ulun hitu nee. Samea ulun hitu nee mos iha nia anju, nunee sira funu hasoru Miguel ho nia anju sira.

⁸ Too ikus samea nee lakon, nunee nia ho nia anju sira la bele hela tan iha lalehan.

⁹ Miguel ho nia anju sira soe sai tiha samea ulun hitu nee hosi lalehan. Sira soe tiha samea nee mai mundu hamutuk ho nia anju sira hotu. Samea ulun hitu nee mak ema bolu ꞌdiabuꞌ ka ꞌSatanásꞌ. Hori uluk kedas samea nee lohi ema hotu iha mundu para lao sala dalan.

¹⁰ Depois hau rona lian makaas ida hosi lalehan dehan nunee: “Agora tempu too ona atu Nai Maromak salva ema. Ita nia Nai Maromak hatudu ona Nia kbiit hodi ukun nudar Liurai. Ita nia Kristu nebee Nia haruka mai mos hatudu ona Nia kbiit. Tanba uluk samea ulun hitu nee loron-kalan hamriik iha Nai Maromak nia oin hodi foo sala ba ita nia maluk sarani sira, maibee agora Maromak soe sai tiha ona nia hosi lalehan.

¹¹ Ita nia maun-alin ema fiar sira manaan tiha ona samea ulun hitu nee, Tanba Bibi Oan nia raan nebee fakar hodi salva sira, i tanba sira foo sai nafatin Nai Maromak nia liafuan. Maski ema atu oho sira mos sira la hakiduk.

¹² Nunee lalehan ho buat hotu-hotu iha lalehan haksolok baa! Maibee buat hotu-hotu nebee moris iha rai ho tasi sei terus, tanba diabu tuun ona baa iha imi. Nia laran nakali ona tanba nia hatene katak, nia tempu hodi halo buat aat besik hotu ona.”

Samea ulun hitu nee buka feto nee iha rai

¹³ Bainhira samea ulun hitu nee hatene katak, sira soe tuun tiha ona nia iha mundu, nia baa buka tuir senhora nebee mak tuur ahi Oan mane nee, atu halo terus nia.

¹⁴ Maibee senhora nee simu liras rua hanesan manu makikit boot ida nia liras hodi semo ba fatin nebee prepara tiha ona ba nia iha rai fuik maran. Iha nebaa Nai Maromak sei hamahon nia durante tinan tolu ho balu para samea ulun hitu nee la bele halo buat aat ba nia.

¹⁵ Haree nunee, samea ulun hitu nee fakar sai bee barak hanesan mota boot hosi nia ibun para mota bele lori senhora nee.

¹⁶ Maibee rai mak ajuda senhora nee hodi tolan tiha bee nebee sai hosi samea nia ibun.

¹⁷ Nunee samea ulun hitu nee hirus teb-tebes senhora nee, too nia baa buka senhora nee nia oan sira seluk. Sira nee mak ema nebee halo tuir Nai Maromak nia ukun fuan i foo sasin kona ba Jesus.

¹⁸ Depois samea nee baa hamriik iha tasi ibun.