Apokalipse 11 - Biblia Tetun Dili

Nai Maromak haruka Nia sasin nain rua

¹ Depois hau simu ai sukat ida, hau mos simu liafuan nunee: “O baa sukat Nai Maromak nia Uma Kreda Boot, sukat mos nia meza sakrifisiu, i sura ema nain hira mak adora hela Maromak iha nebaa.

² Maibee lalikan sukat area nebee haleu Uma Kreda Boot iha muru laran, tanba area liur nee Nai Maromak foo tiha ona ba ema sira seluk nebee la konhese Maromak. Ema sira nee sei sama hanehan Nai Maromak nia sidade nee too fulan haat-nulu resin rua.

³ I Maromak sei haruka Nia ema nain rua baa foo sasin kona ba Nia. Sira sei hatais hena lutu hodi foo sai Maromak nia profesia durante fulan hirak nee hotu. Nee hamutuk loron rihun ida atus rua neen-nulu.”

⁴ Sasin nain rua nee hanesan ai huun oliveira rua ho mos ahi-oan riin rua nebee hamriik iha Nai Maromak nia oin, Nia mak ukun mundu tomak.

⁵ Se inimigu ruma atu halo aat sasin nain rua nee, ahi lakan sei sai hosi sira nain rua nia ibun laran hodi haan motuk tiha sira. Ema hotu-hotu nebee hakarak halo aat sira sei mate hanesan nee.

⁶ Sira nain rua sei iha kbiit hodi taka kalohan para udan la bele tuun durante sira foo tutan Nai Maromak nia liafuan. Sira mos iha kbiit para halo bee sai fali raan, ho kbiit para halo dezastre selu-seluk tan iha mundu, tuir sira nia hakarak.

⁷ Bainhira sasin nain rua nee foo sai tiha hotu Nai Maromak nia lia menon, animal siak ida sei sai hosi rai kuak klean nakukun. Animal nee sei ataka sira nain rua, animal nee mak forti liu i oho tiha sira

⁸ iha sidade boot. Fatin nee mos uluk ema oho sasin nain rua nia Nai iha krus. Ema iha sidade nee hahalok aat teb-tebes hanesan ema Sodoma ho Ejitu uluk. Depois sasin nain rua nia mate isin husik hela deit iha estrada boot.

⁹ Ema hosi povu, lian, suku ho nasaun hotu-hotu mai haree mate isin rua nee durante loron tolu ho balu, i sira la hataan para ema hakoi.

¹⁰ Ema iha mundu tomak kontenti tanba sasin nain rua nee mate tiha ona, tanba sira nain rua halo terus ema iha mundu tomak. Nunee sira rame-rame halo festa i foo prezenti ba malu.

¹¹ Liu tiha loron tolu ho balu, Nai Maromak foo fali iis ba sira nain rua, i sira hadeer fali. Ema hotu-hotu nebee haree, tauk teb-tebes.

¹² Depois sira nain rua rona lian makaas ida hosi lalehan dehan, “Sae mai iha nee!” Sira mos sae ba lalehan iha kalohan laran, iha sira nia inimigu sira nia oin.

¹³ Derepenti deit rai nakdoko makaas. Nunee se ita fahe sidade nee ba parte sanulu, parte ida rahun hotu. I ema rihun hitu mate. Ema nebee mak sei moris, tauk teb-tebes, i sira hahii Nai Maromak iha lalehan.

¹⁴ Nunee terus boot numeru rua liu ona. Maibee terus boot numeru tolu besik atu mai ona.

Anju numeru hitu huu nia korneta — Nai Maromak ho Jesus Kristu ukun mundu

¹⁵ Tuir mai anju numeru hitu huu nia korneta. I hau rona anju iha lalehan haklalak dehan, “Ita nia Nai Maromak ho mos ita nia Kristu nebee Nia haruka mai agora ukun ona mundu. Nia sei ukun too tinan ba tinan nafatin.”

¹⁶ Katuas lia nain rua-nulu resin haat nebee tuur hela iha sira kadeira ukun iha Nai Maromak nia oin, sira hotu hakneak i hakruuk too rai iha Nai Maromak nia ain hodi adora Nia.

¹⁷ Sira dehan, “Nai Maromak Forsa Teb-tebes, Ita Boot iha hori uluk kedas. Ami agradese ba Ita Boot tanba agora Ita Boot hatudu sai ona Ita nia kbiit makaas hodi ukun mundu.

¹⁸ Povu sira nebee la konhese Maromak, sira laran nakali maibee agora Ita Boot mos fakar sai Ita Boot nia hirus, i too ona tempu atu Ita Boot tesi ema mate sira nia lia. Too ona tempu para Ita Boot foo premiu ba ema nebee uluk serbii Ita Boot, hanesan Ita Boot nia atan sira, profeta sira ho mos Ita Boot nia povu sira kiik ho boot nebee foti aas Ita Boot nia naran. Too ona tempu para Ita Boot halo rahun tiha ema sira nebee mak uluk halo rahun ema seluk iha mundu.”

¹⁹ Depois Maromak nia Uma Kreda Boot iha lalehan nia odamatan nakloke. I hau haree Arka Aliansa iha laran. Rai lakan mos fera ba-mai, rai tarutu makaas iha fati-fatin, rai nakdoko, i udan jelu fatuk boboot monu tuun mai rai.