Apokalipse 10 - Biblia Tetun Dili

Anju ho livru kiik-oan

¹ Depois hau haree anju forte ida tan tuun mai hosi lalehan. Kalohan falun metin nia isin, i arkuiris ida haleu nia ulun. Nia oin nabilan loos hanesan loro matan, i nia ain hanesan fali ahi lakan makaas.

² Nia kaer hela livru kiik-oan ida. Livru nee baibain lulun maibee agora nakloke hela. Nia hamriik ain loos sama iha tasi, ain karuk sama iha rai maran.

³ Depois anju nee koalia ho lian makaas hanesan leaun nia lian. Nia koalia tiha hotu, rai tarutu simu malu too dala hitu hodi hataan ba nia.

⁴ Rai tarutu liu tiha, hau atu hakerek liafuan nebee mak sai hosi rai tarutu nee. Maibee hau rona fali lian ida hosi lalehan dehan, “O la bele konta sai buat nebee mak rai tarutu dala hitu nee foo sai, la bele hakerek nia liafuan.”

⁵ Tuir mai anju nebee mak hamriik ain sorin sama iha tasi i ain sorin sama iha rai maran nee foti nia liman loos ba lalehan.

⁶ I nia jura hodi Nai Maromak nia naran, tanba Nai Maromak moris tinan ba tinan i Nia mak halo lalehan, rai, tasi ho buat hotu-hotu iha laran. Nia jura dehan, “Maromak sei la demora tan.

⁷ Bainhira anju numeru hitu huu nia korneta, Nai Maromak sei halao Nia planu segredu, tuir loloos buat nebee uluk Nia foo hatene ona ba Nia atan sira nebee serbii Nia nudar profeta.”

⁸ Depois lian nebee ohin hau rona hosi lalehan nee koalia dala ida tan mai hau dehan, “Baa iha anju nebee hamriik ain sorin sama iha tasi i ain sorin sama iha rai maran nee hodi simu livru lulun nebee mak nakloke hela iha nia liman laran.”

⁹ Tuir mai hau baa iha anju nee hodi husu livru lulun kiik nee. Nia dehan mai hau, “Simu ba hodi haan. Bainhira o haan livru nee, o nia kabun laran sei moruk, maibee iha o nia ibun sei midar hanesan bani been.”

¹⁰ Entaun hau foti livru lulun nee hosi anju nia liman i hau haan. Loos duni, iha hau nia ibun senti midar hanesan bani been, maibee bainhira hau tolan tiha, iha hau nia kabun senti moruk.

¹¹ Depois hau rona orden dehan, “O tenki foo sai fali profesia hosi Maromak kona ba saida mak sei akontese ba povu sira, nasaun sira, ema hosi lian oi-oin, no liurai sira.”