Apokalipse 1 - Biblia Tetun Dili

¹ Iha livru nee hakerek kona ba buat nebee mak la kleur tan sei akontese. Nai Maromak foo hatene ona buat sira nee ba Jesus Kristu para foo sai ba ema sira nebee serbii Nai Maromak. Tuir mai, Jesus Kristu haruka Nia anju ida foo tutan mai hau, João, Maromak nia atan.

² Nunee agora hau mos konta sai hotu saida mak hau haree, nee mak Nai Maromak nia lia menon nebee Jesus Kristu hatudu sai.

³ See mak lee sai livru nee, hetan bensaun. I see mak rona hodi halo tuir, nia mos hetan bensaun. Tanba buat sira nee besik atu akontese ona.

João haruka komprimentus ba igreja hitu iha provinsia Ázia kiik

⁴ Maluk sarani sira hosi sidade hitu iha provinsia Ázia, hau João harohan ba Nai Maromak ho Nia Espiritu ho mos Jesus Kristu para hatudu Sira nia grasa ba imi i foo paz ho hakmatek ba imi. Maromak iha hori uluk kedas, agora iha, i iha nafatin too tinan ba tinan. Nia Espiritu nee hatudu Aan mai hau hanesan espiritu hitu nebee iha hela kadeira ukun nia oin. I Jesus Kristu sempre foo sasin nebee loos, Nia mak ema primeiru nebee moris fali hosi mate, i Nia mak ukun liurai hotu-hotu iha mundu nee.

⁵ Jesus hadomi ita, nunee Nia raan fakar too mate para ita bele livre hosi sala.

⁶ Nia foti ona ita sai Nia reinu. Nia mos hili ita sai hanesan nai-lulik para serbii Nia Aman Maromak. Nunee mai ita foti aas Jesus Kristu nia naran, tanba Nia mak iha kbiit hodi ukun tinan ba tinan. Amen!

⁷ Haree baa! Jesus sei tuun mai hosi lalehan iha kalohan laran, i ema hotu-hotu sei haree Nia, too ema nebee uluk sona Nia, sira mos sei haree. Ema hosi nasaun hotu-hotu iha mundu nee sei tanis halerik tanba Nia. Loos duni, buat nee sei sai nunee duni. Amen.

⁸ Nai Maromak dehan, “Hau mak Alfa ho Omega, primeiru no ikus. Hau iha hori uluk kedas, agora iha, i iha nafatin too tinan ba tinan. Hau mak kbiit nain.”

João haree Nai Jesus iha Patmos

⁹ Hau João, imi nia maun-alin. Ita hotu hetan susar ho terus tanba ita hakruuk ba Jesus nudar Liurai, maibee ita aguenta ho pasiensia nafatin. Ema kastigu hau iha ilha Patmos tanba hau foo sai Nai Maromak nia liafuan i foo sasin kona ba Jesus.

¹⁰ Depois iha loron Domingu ida, Maromak nia Espiritu domina hau i hau rona lian makaas hanesan korneta lian iha hau nia kotuk.

¹¹ Lian nee dehan nunee, “Buat nebee mak o haree nee, o tenki hakerek iha livru lulun ida, depois haruka ba sarani sira iha sidade hitu tuir mai nee: Efezu, Esmirna, Pérgamu, Tiatira, Sardes, Filadélfia ho Laodiseia.”

¹² Tuir mai, hau hateke ba kotuk atu haree see mak koalia mai hau nee. I hau haree fali ahi-oan riin hitu halo ho osan mean.

¹³ Ema ida hamriik hela iha ahi-oan riin hitu nee nia klaran. Nia hanesan Ida nebee ema baibain temi Ema Oan. Nia hatais batina naruk, iha nia hirus matan kesi hena naruk ida nebee enfeita ho osan mean.

¹⁴ Nia fuuk mutin teb-tebes. Nia matan hanesan fali ahi nebee lakan makaas.

¹⁵ Nia ain lakan hanesan riti nebee ema sunu ba ahi. Nia lian tarutu makaas hanesan mota tuun.

¹⁶ Iha Nia liman loos Nia kaer hela fitun hitu, i iha surik ida oin-kotuk kroat hotu sai hosi Nia ibun. Nia oin nabilan hanesan loro matan iha loron manas boot.

¹⁷ Bainhira hau haree Nia, hau monu kedas iha Nia oin hanesan ema mate. Maibee Nia tau Nia liman loos ba hau hodi dehan, “Keta tauk. Hau mak huun no rohan.

¹⁸ Uluk Hau mate tiha ona, maibee agora, haree baa, Hau moris fali ona. Hau sei moris nafatin tinan ba tinan. I Hau mak kaer xavi hodi loke odamatan ba matebian sira nia fatin, Hau mak iha kbiit hodi halo moris fali ema mate sira.

¹⁹ Entaun o tenki hakerek buat hotu-hotu nebee o haree nee, kona ba buat nebee akontese agora dadauk ho mos buat nebee aban-bainrua sei mosu.

²⁰ Ohin o haree fitun hitu iha Hau nia liman kwana, ho ahi-oan riin osan mean hitu. Nia signifikadu mak nee: ahi-oan riin sira nee mak sarani sira iha sidade hitu. I fitun hitu nee mak anju hitu nebee tau matan ba sira.”