Apostolu sira nia Istoria 5 - Biblia Tetun Dili

Ananias ho Safira mate tanba bosok Espiritu Santu

¹ Iha mos mane ida naran Ananias, nia kaben naran Safira. Sira faan sira nia rai pedasuk ida.

² Sira nain rua kombina rai tiha osan rai nian sorin balu ba sira. Depois Ananias baa foo hatene ba Jesus nia apostolu sira dehan, “Ami foin faan ami nia rai pedasuk ida. Osan rai nian nee tomak ami foo ba Nai Maromak.”

³ Maibee Pedro hatete, “Ananias, nusaa mak o tuir fali Satanás nia hakarak, para o bosok Espiritu Santu?! Nusaa mak osan rai nian nee, o subar tiha balu?

⁴ Afinal o hakarak faan rai nee, ka lakohi, nee konformi o. Se o faan ona, o atu foo nia osan hotu, ka sorin balu deit, konformi o. Maibee nusaa mak o halo fali nunee? O laos bosok ema, maibee o bosok Nai Maromak!”

⁵ Rona Pedro koalia nunee, Ananias monu ba rai, i mate kedas iha fatin. I ema nebee rona novidade nee, sira tauk teb-tebes.

⁶ Depois labarik klosan sira tama baa falun Ananias nia mate isin, i hulan hodi baa hakoi.

⁷ Liu tiha oras tolu nunee, Ananias nia kaben mos tama, maibee nia la hatene saida mak akontese.

⁸ Pedro husu ba nia, “Oinsaa senhora? Senhora sira faan imi nia rai nee, nia folin mak nee deit ka?” Nia hataan, “Loos, senhor. Rai nia folin mak nee deit.”

⁹ I Pedro dehan, “Nusaa mak imi nain rua kombina malu koko Nai Maromak nia Espiritu? Haree tok ba! Ema sira nebee lori o nia laen baa hakoi, foin fila. Sira mos sei hulan o nia mate isin baa hakoi.”

¹⁰ Rona Pedro nia koalia nee, feto nee mos monu ba rai i mate kedas iha fatin. I labarik klosan sira tama ba laran, haree nia mate tiha ona. Sira mos hulan nia mate isin hodi baa hakoi iha nia laen nia sorin.

¹¹ I ema sira nebee fiar ba Jesus, ho ema sira seluk nebee rona kona ba Ananias ho Safira nia mate, sira tauk teb-tebes.

Apostolu sira kura ema barak

¹² Iha tempu nee, apostolu sira halo milagre ho sinal barak iha povu nia leet, nebee halo sira admira teb-tebes. I sarani sira sempre baa iha Nai Maromak nia Uma Kreda Boot. Sira halibur hamutuk ho neon ida laran ida iha Varanda Salomão.

¹³ Iha tempu nee, ema barak respeita no admira Jesus nia ema sira. Maibee see mak seidauk fiar ba Jesus, la brani baa hamutuk ho sira.

¹⁴ Ema sira nebee fiar ba Jesus, loron ba loron amenta ba bebeik. Iha mane no mos feto.

¹⁵ Tanba buat sira nee, ema hulan ema moras sira hodi baa tau iha biti iha dalan ninin. Sira hanoin dehan, “Se Pedro lao liu hosi nee, maski nia lalatak deit mak kona sira mos, moras sira sei diak.”

¹⁶ Ema nadodon mai la hotu fatin, hosi aldeia-aldeia besik sidade Jerusalém. Sira hulan moras sira, ho lori ema nebee iha espiritu aat tama iha sira nia laran, i apostolu sira kura tiha sira hotu, i duni sai mos espiritu aat hosi sira.

Jesus nia apostolu sira hetan terus

¹⁷ Iha tempu nee, nai-lulik Judeu sira nia boot ho nia kolega sira hosi partidu Saduseu laran moras makaas.

¹⁸ Nee mak sira baa kaer Jesus nia apostolu sira hodi baa hatama iha kadeia.

¹⁹ Maibee iha kalan nee kedas Nai Maromak nia anju ida baa loke kadeia nia odamatan, i lori sira sai ba liur. Nia hatete,

²⁰ “Agora imi baa iha Nai Maromak nia Uma Kreda Boot. Baa foo sai mensajen kona ba moris foun, ba ema hotu-hotu iha nebaa.”

²¹ Nunee iha dadeer-saan nakukun sira baa ona iha Nai Maromak nia Uma Kreda Boot nia kintal laran hodi hanorin. Bainhira nai-lulik Judeu sira nia boot ho nia kolega sira hasoru malu fali, sira halibur lider relijiaun Judeu sira hodi tesi lia kona ba apostolu sira. Depois sira haruka ema seguransa baa hasai apostolu sira hosi kadeia.

²² Maibee kuandu sira too iha kadeia, Pedro sira la iha tiha ona. Entaun sira fila ba tribunal,

²³ hodi foo hatene dehan, “Senhor sira, bainhira ami too iha kadeia, ami haree odamatan kadeia nian xavi metin hela. Ema seguransa sira mos hamriik hela iha oin. Maibee kuandu ami haruka sira loke odamatan, ami la hetan ema ida.”

²⁴ Rona nunee, nai-lulik Judeu boot sira ho komandante seguransa Uma Kreda Boot, sira hotu bilan tiha.

²⁵ Depois iha ema ida mai foo hatene dehan, “Senhor sira, ema nebee ita boot sira hatama iha kadeia nee, hanorin hela ema iha Uma Kreda Boot!”

²⁶ Rona nunee, komandante seguransa Uma Kreda Boot bolu nia funsionariu sira, hodi baa kaer fali apostolu sira. Sira kaer ho didiak deit, sira tauk kaer ho brutu, tanba keta halo be povu bele hirus i tuda sira ho fatuk.

²⁷ Depois sira lori apostolu sira ba iha tribunal. I nai-lulik boot husu ba sira,

²⁸ “Imi nee ulun toos duni! Ami bandu ona imi para la bele hanorin ema kona ba Jesus nee. Maibee imi baa hanorin fali iha fatin hotu-hotu iha sidade Jerusalém, i imi duun ami dehan, ami mak haruka oho Jesus.”

²⁹ Entaun Pedro hamriik ho apostolu sira hataan, “Senhor sira, ami tenki tuir mak Nai Maromak nia orden. Se ema haruka ami kontra Nai Maromak nia orden, ami la tuir ema nee.

³⁰ Jesus nee, imi prega mate tiha ona iha krus. Maibee Nai Maromak ida nebee ita nia bei-ala sira adora nee, Nia mak halo moris fali Jesus hosi mate.

³¹ Agora Nai Maromak foti Jesus tuur iha Nia liman loos hodi kaer ukun hanesan Liurai i Salvador. Nia foo tempu ba povu Israel para bele husik ona sira nia sala, atu sira bele hetan perdaun hosi Nai Maromak.

³² Ami sai sasin ba buat sira nee hotu, i nunee mos Espiritu Santu. Agora Nai Maromak foo ona Nia Espiritu Santu ba ema sira nebee halo tuir Nia.”

³³ Rona tiha Pedro koalia nunee, lider relijiaun sira hirus teb-tebes too sira hakarak oho apostolu sira.

³⁴ Maibee iha mos lider ida hosi grupu relijiaun Farizeu, naran Gamaliel. Nia mestri relijiaun, i ema hotu respeita nia. Nia hamriik i haruka ema lori Pedro sira sai ba liur.

³⁵ Depois Gamaliel koalia ba lider relijiaun sira dehan, “Maluk Israel sira, imi tenki kuidadu! Hanoin didiak saida mak imi atu halo ba ema sira nee.

³⁶ Imi sei hanoin ema ida naran Teudas, tinan hira liu baa nia foti nia aan sai lider, i mais-ou-menus ema nain atus haat mak tuir nia. Iha ikus ema oho tiha nia, depois nia ema sira halai namkari too sai lakon tiha deit.

³⁷ Depois too tempu ida governu haruka halo sensus, iha ema ida naran Judas, hosi provinsia Galileia. Ema barak mak tuir nia. Maibee iha ikus ema oho tiha nia. Depois nia ema sira mos halai namkari.

³⁸ Nunee agora, irmaun sira, hau nia hanoin nunee deit: Husik tiha sira nain rua baa. Se sira nia hanorin ho sira nia hahalok hosi ema, mak ema nebee tuir sira sei namkari hanesan Teudas ho Judas nia ema.

³⁹ Maibee se sira nia hanorin nee mai hosi Nai Maromak, mak imi sei la bele taka dalan. Keta halo be imi kontra fali Nai Maromak.” Rona nunee, sira hotu simu.

⁴⁰ Depois sira bolu apostolu sira tama fali ba laran, i sira haruka ema baku sira ho sikoti. Sira mos bandu apostolu sira la bele koalia tan kona ba Jesus. Depois sira husik tiha sira baa.

⁴¹ Sira sai hosi tribunal relijiaun ho laran haksolok, tanba Nai Maromak konsidera sira serve atu terus tanba Jesus.

⁴² I loro-loron sira baa hanorin ema dehan, “Ema ida nebee Nai Maromak hili ona nee, mak Jesus.” Sira baa foo sai iha Uma Kreda Boot laran ho mos iha uma ba uma.