Apostolu sira nia Istoria 28 - Biblia Tetun Dili

Paulo sira iha rai Malta

¹ Ami hotu too iha rai maran ho diak, foin ami hatene katak rai kiik nee naran Malta.

² Ema rai nain sira simu ami ho diak. Tanba udan boot ho rai mos malirin teb-tebes, nee mak sira tau ahi iha tasi ibun, ba ami haneruk.

³ Paulo mos baa hili ai, hodi tau ba ahi. Momentu nia bou ai nee ba ahi, derpenti deit, samodok ida sai hosi ai sira nee hodi halai hosi ahi, tata belit hela iha Paulo nia liman.

⁴ Bainhira ema rai nain sira haree samodok nee tata belit hela iha Paulo nia liman, sira dehan ba malu, “Ema ida nee karik ema oho door ida. Nee mak nia sai ona hosi tasi siak, maibee ita nia maromak ida nebee Justisa nain la husik liu nia.”

⁵ Maibee Paulo hisik tiha samodok nee ba ahi laran. Nia la senti moras ida.

⁶ Ema sira nee hanoin katak la kleur tan, Paulo nia liman bubu i nia sei mate derpenti. Maibee Paulo la iha buat ida. Entaun sira muda sira nia hanoin dehan, “Ema ida nee karik maromak ida.”

⁷ Xefi rai Malta nian, naran Públiu, iha rai ida besik iha tasi ibun nee. Nia mai simu ami iha tasi ibun, i lori ami ba iha nia uma. Iha nebaa nia foo hahaan mai ami durante loron tolu.

⁸ Momentu nee, xefi nia aman isin manas ho kabun moras la para. Paulo tama baa haree nia, halo orasaun, i tau liman ba nia. I katuas nee diak kedas.

⁹ Bainhira sira rona nunee, ema moras sira seluk mos mai ba Paulo, i sira hotu hetan kura.

¹⁰ Depois sira lori prezenti hodi foo onra ho obrigadu mai ami, i bainhira ami atu sae roo, sira lori buat hotu-hotu nebee ami presiza.

Paulo sira too iha Itália

¹¹ Ami hela iha Malta durante fulan tolu, depois ami baa sae roo ida ho estatua maromak oan kaduak. Roo nee mai hosi sidade Alexandria, maibee para hela iha Malta durante tempu malirin ho anin boot.

¹² Ami lao too iha sidade Sirakuza, i para iha nebaa loron tolu.

¹³ Depois ami ho roo lao tutuir tasi ibun too iha sidade Régiu. Aban fali, anin huu makaas hosi tasi mane, tan nee roo halai lalais. Iha bainrua fali, ami too iha pontikais Poteoli.

¹⁴ Iha nee, ami tuun hosi roo. Ami hasoru malu ho sarani sira, i sira konvida ami hela ho sira semana ida. Depois ami lao ain liu ba Roma.

¹⁵ Bainhira sarani sira iha Roma rona dehan, ami atu too ona iha nebaa, sira mai hasoru ami iha dalan. Sira balu hasoru ami iha merkadu Ápiu, sira seluk hasoru ami iha fatin ida naran Loja Tolu. Bainhira Paulo haree sira, nia mos laran metin, i nia foo agradese ba Nai Maromak.

Paulo iha Roma

¹⁶ Too iha Roma, komandante husik Paulo livre hodi aluga uma ida. I soldadu ida mak hein nia.

¹⁷ Liu tiha loron tolu, Paulo konvida xefi relijiaun Judeu sira mai hasoru malu ho nia, i nia hatete ba sira, “Maun-alin sira hotu, hau mai iha nee, tanba ema kaer hau iha Jerusalém, hodi entrega hau ba governu Roma nia liman, maski hau la halo sala ida. Hau la kontra ita nia nasaun, i hau mos la kontra lisan nebee ita nia bei-ala sira rai hela ba ita.

¹⁸ Governu Roma tesi tiha ona hau nia lia iha nebaa, maibee sira la hetan hau nia sala ida, para bele hetan kastigu mate. Nunee sira atu hasai hau.

¹⁹ Maibee ema Judeu nia boot sira la simu. Entaun pasiensia, hau mos husu atu mai iha liurai boot César hodi tesi hau nia lia, maski hau lakohi foo sala ba hau nia nasaun rasik.

²⁰ Tan lia nee mak hau halibur maun-alin sira iha nee, para ita koalia. Hau hakarak para ita boot sira hatene katak sira futu hau ho korenti nee, tanba hau serbii Ema ida nebee povu Israel hein ho laran metin atu Nai Maromak haruka mai.”

²¹ I sira hataan, “Ami seidauk simu surat ida hosi Judeia foo hatene kona ba ita nia kazu nee. Nunee mos, sira nebee mai hosi nebaa la koalia buat ida kontra irmaun.

²² Maibee ami hakarak rona saida mak irmaun fiar, tanba ami rona ona dehan, iha fatin hotu-hotu ema la simu saida mak irmaun nia grupu relijiaun nee hanorin.”

²³ Entaun sira marka loron ida, atu sira hasoru malu fali. Too iha loron nee, ema barak teb-tebes mai iha Paulo nia uma. Nia komesa esplika ba sira kona ba Nai Maromak nia reinu. I nia uza liafuan hosi profeta Moisés nia livru, ho mos hosi profeta sira seluk nia livru, atu halo sira fiar ba Jesus. Nia koalia hosi dadeer-saan too kalan.

²⁴ Bainhira sira rona Paulo nia koalia, iha ema balu fiar, maibee balu lakohi fiar.

²⁵ Sira haksesuk malu i atu fahe malu ona. Entaun Paulo hatete, “Imi nia ulun toos duni, hanesan ita nia bei-ala sira, tuir Nai Maromak nia Espiritu Santu foo hatene ba profeta Isaias,

²⁶ dehan, ‘O baa hatete ba povu nee dehan, “Imi sei rona bebeik Hau nia Liafuan, maibee imi la komprende buat ida. Imi sei haree bebeik saida mak Hau halo, maibee imi la hetan buat ida.”

²⁷ Tanba povu nee nia ulun toos teb-tebes. Sira sulan tiha sira nia tilun ona; sira taka metin tiha sira nia matan. Para sira nia tilun la bele rona tan, sira nia matan la bele haree tan, i sira nia laran nakukun nafatin. Too sira la hatene dalan atu fila mai Hau, para Hau bele kura sira.’ ”

²⁸ Ikus liu Paulo mos dehan, “Maun-alin sira, imi tenki hatene katak, agora Nai Maromak haruka ona Nia Liafuan kona ba salvasaun ba ema sira nebee laos Judeu, i sira mos sei simu Nia.”

²⁹ [Paulo koalia nunee, sira mos fila hodi haksesuk malu iha dalan.]

³⁰ Nia hela iha uma nebee nia aluga nee durante tinan rua. Nia simu ho laran haksolok ema hotu-hotu nebee baa vizita nia.

³¹ I nia konta ba sira kona ba Nai Maromak nia reinu, ho hanorin kona ba Nai Jesus Kristu. Nia koalia ho brani, i la iha ema ida bandu nia. Senhor Teófilo mak diak. Hau nia liafuan too iha nee deit. Obrigadu. Hosi hau, Lucas