Apostolu sira nia Istoria 27 - Biblia Tetun Dili

Paulo sae roo atu baa Roma

¹ Nee liu tiha, governador Festu haruka Paulo baa hasoru liurai boot César iha Roma, para tesi nia lia. Nia entrega Paulo ho ema dadur balu tan ba komandante kompanhia ida naran Júlio, hosi Batalhaun Liurai Boot Roma nian.

² Tempu nee, hau (Lucas) akompanha hotu Paulo. Iha tan irmaun ida, ema Masedónia hosi sidade Tesalónika, naran Aristarku, mos tuir. Ami baa sae roo ida nebee mai hosi sidade Adramítiu. Tuir planu, roo nee sei tama tutuir iha pontikais iha provinsia Ázia.

³ Iha aban fali, ami too iha sidade Sidon. Komandante Júlio haree Paulo diak loos, i hatete ba nia para bele tuun baa haree nia kolega sira iha rai maran, atu sira bele foo buat nebee Paulo presiza.

⁴ Depois ami baa sae fali roo hodi lao tan. Maibee tanba anin boot hasoru ami, ami lao liu fali hosi rai kiik Xipre ho rai Síria nia klaran, para bele sees ituan hosi anin.

⁵ Ami lao liu hosi tasi provinsia Silísia ho provinsia Panfília nian. Depois ami too iha sidade Mira, iha rai Lísia. Too iha nebaa, ami hotu tuun hosi roo.

⁶ Iha Mira, komandante Júlio buka roo seluk nebee atu baa Itália. Nia hetan roo ida, mai hosi sidade Alexandria. I nia haruka ami hotu baa sae roo nee.

⁷ Durante loron barak nia laran, roo nee halai neineik liu, tanba anin boot makaas hasoru ami. Ikus mai, too besik sidade Knidu, anin sei boot nafatin, halo ami la bele lao tan ba oin. Nunee ami lao ba iha rai kiik ida naran Kreta, para sees ituan hosi anin. Too iha nebaa, ami liu hosi fatin ida naran Salmona.

⁸ Ho hakaas aan, ami liu hosi tasi ibun Kreta nian, foin ami too iha fatin ida naran Pontikais Diak, besik sidade Laseia.

⁹ Ami lakon tempu barak ona iha dalan. Tempu nee, ema Judeu sira nia loron boot hodi husu perdaun liu tiha ona. Nee katak, tempu anin boot ho laloran boot komesa ona. Paulo foo hanoin ba sira nebee serbisu iha roo nee dehan,

¹⁰ “Maun-alin sira, hau husu koalia ituan. Hau hanoin se ita lao nafatin, ita bele hetan azar. Roo bele mout, sasaan sira lakon, i ita mos bele mate.”

¹¹ Maibee komandante nebee hein ema dadur sira la simu. Tanba ema ida kaer roo ho roo nia nain hakarak sai hosi fatin nee, i komandante fiar liu ba sira.

¹² Problema mak Pontikais Diak nee laduun diak atu roo para iha tempu rai malirin ho laloran boot. Nee mak sira barak hakarak atu se bele, ami lao tan ituan ba iha sidade Feniks, atu hela iha nebaa durante tempu laloran boot. Feniks nee pontikais diak ida, tanba bele taka netik anin hosi loro-sae, i livre hosi laloran boot.

Anin boot iha tasi

¹³ Bainhira anin komesa huu neineik hosi tasi mane, sira hanoin dehan tempu diak ona atu lao ba Feniks. Entaun sira dada sae hosi tasi okos, besi ankor nebee halo roo para metin. Sira mos hasae laan iha roo riin hodi halo roo halai. Nunee roo lao tuir tasi ibun.

¹⁴ Maibee ami seidauk lao kleur, anin komesa huu makaas loos hosi rai nee. (Anin nee ema bolu ‘anin loro-sae’.) Anin huu roo nee baa tiha iha tasi klaran.

¹⁵ Sira hakaas aan dulas roo halo fila fali tuir dalan, maibee la bele. Entaun sira husik tiha roo tuir deit anin nia hakarak.

¹⁶ Ami ho roo namlele tuir laloran nunee, too besik rai kiik-oan ida naran Kauda. Iha nee anin laduun makaas. Roo oan salva vida sei kesi hela iha roo kotuk. I ami hakaas aan dada roo oan nee sae ba leten.

¹⁷ Bainhira salva vida nee iha ona roo leten, sira komesa bobar haleu roo ho tali para roo nia ai kabelak sira la bele nakloke. Sira tauk, keta halo-be anin huu roo baa metin tiha iha rai henek besik Sirte iha Áfrika nebaa. Nunee sira hatuun laan, atu roo halai neineik ituan.

¹⁸ Tanba anin boot huu roo baa-mai, nunee aban fali, sira komesa foti naha soe ba tasi.

¹⁹ Bainrua fali, sira foti tan naha soe ba tasi. Roo nia material barak mos, sira foti soe ba tasi laran.

²⁰ Loron-kalan anin la para too loron barak nia laran, i kalohan taka rai metin halo ami la hetan loro matan ho fitun. Too ikus ami hanoin ami la moris tan ona.

²¹ Kleur ona, ami hotu-hotu la haan buat ida. Paulo hamriik iha sira nia klaran hodi hatete, “Maun-alin sira, haree ka lae?! Uluk hau dehan ita la bele sai hosi rai Kreta. Se imi rona hau karik, ita la hetan azar hanesan nee.

²² Maibee agora, hau husu ba imi hotu aten brani. Lalikan tauk, tan la iha ema ida mak mate. So roo deit mak sei mout.

²³ Hori kalan, Nai Maromak, ida nebee hau serbii nee, haruka Nia anju ida mai hamriik iha hau nia sorin, hodi hatete,

²⁴ ‘Paulo, o lalika tauk! O sei baa hamriik iha liurai César nia oin para tesi o nia lia. Nai Maromak hatudu Nia grasa ba o. Nee mak Nia mos salva ema sira hotu nebee hamutuk ho o iha roo nee.’

²⁵ Tan nee, maun-alin sira hotu, imi aten brani baa. Hau fiar ba Nai Maromak katak, saida mak Nia foo hatene mai hau nee, sei sai duni.

²⁶ Maibee roo nee sei baa xoke rahun tiha iha rai kiik ida.”

Roo bes-besik iha rai maran

²⁷ Laloran ho anin baku roo nee baa-mai durante loron sanulu resin haat ona iha tasi Adriátiku. Depois, iha kalan boot, ema sira nebee serbisu iha roo senti ami besik ona iha rai maran.

²⁸ Entaun sira hatuun prumu hodi buka hatene tasi nia klean. I sira sukat hetan metru 37. Roo halai ituan tan ba oin, sira sukat fali, hetan metru 27.

²⁹ Sira hotu tauk, keta halo-be roo nee xoke fatuk. Entaun sira hatuun ankor haat hosi roo kotuk hodi halo roo para metin. I sira hotu hamulak atu rai naroman lalais.

³⁰ Maibee sira nebee serbisu iha roo kombina malu atu halai husik hela roo. Nunee sira hatuun roo oan, halo finji atu hatuun ankor hosi roo ulun.

³¹ Maibee Paulo foo hatene ba komandante ho soldadu sira dehan, “Se ema sira nee la hela iha roo laran, ita sei mate hotu.”

³² Entaun soldadu sira tesi kotu tiha roo oan nia talin, i husik tiha ba tasi.

³³ Bainhira rai naroman ona, Paulo husu atu ema sira nee hotu-hotu haan. Nia hatete, “Semana rua ona, ita la haan buat ida.

³⁴ Nunee hau husu ita haan ituan lai, para ita bele iha forsa fali. Imi nia fuuk lahan ida mos sei la monu.”

³⁵ Depois Paulo foti paun, halo orasaun agradese ba Nai Maromak iha ami hotu nia oin, i nia silu paun pedasuk ida ba haan.

³⁶ Haree nunee, ami mos laran metin, i haan.

^37-38 Depois ami foti trigu iha karoon-karoon soe ba tasi, para halo roo kamaan liu tan. (Ami hotu iha roo laran, ema nain 276.)

Roo xoke fatuk, i Paulo sira salva aan

³⁹ Rai komesa loron ona, sira haree rai maran ida. Maibee sira la hatene rai nebee mak nee. Sira haree tasi ibun ho rai henek iha rai inur rua nia klaran, i laloran iha nebaa laduun boot. Nunee sira hakarak, se bele, lori roo tama too rai maran nebaa.

⁴⁰ Entaun sira tesi kotu tiha ankor nia talin, husik ba tasi. Sira hatuun kamudi atu bele fila roo para lao tuir dalan. I sira hasae laan ida iha roo ulun, atu anin bele huu roo ba tasi ibun.

⁴¹ Maibee roo nee halai sae tiha fatuk leten, i roo ulun metin tiha iha nebaa. Roo nia kotuk, laloran boot komesa baku rahun tiha.

⁴² Bainhira soldadu sira haree nunee, sira halo planu para oho tiha ema dadur sira hotu. Sira tauk, keta halo be ema dadur sira nani ba rai maran, i halai tiha.

⁴³ Maibee komandante la hataan, tanba nia hakarak salva Paulo. Nunee nia foo orden ba ema sira nebee hatene nani haksoit ba tasi laran, hodi nani ba rai maran.

⁴⁴ I ema sira nebee la hatene nani, nia haruka atu sira kaer ai kabelak ka naran buat ida, hodi tuir laloran ba rai maran. Nunee ami hotu too iha rai maran ho diak.