Apostolu sira nia Istoria 26 - Biblia Tetun Dili

Paulo komesa defende aan iha liurai Agripa nia oin

¹ Depois liurai Agripa hatete ba Paulo, “Agora o bele defende o nia aan. Ami hotu prontu ona atu rona o.” Paulo foo sinal ho liman, i komesa koalia dehan,

² “Liurai Agripa mak hau respeita, hau senti kontenti hau bele hamriik iha ita boot nia oin hodi defende hau nia aan kona ba sala nebee mak ema Judeu sira foo mai hau.

³ Tanba hau hatene katak liurai hatene ona ema Judeu nia lisan hotu. Ita boot mos hatene problema sira nebee mak halo ami haksesuk malu. Nee duni, hau husu ita boot pasiensia ituan hodi rona lai hau.

⁴ Ema Judeu sira hotu-hotu hatene katak, komesa hosi kiik, hau moris loos tuir Judeu nia lisan, fofoun iha hau nia rain, depois iha Jerusalém.

⁵ Sira konhese hau kleur ona. Nunee, se sira hakarak atu foo sasin karik, sira bele hatete katak hau moris nudar ema hosi grupu relijiaun Farizeu. Ema hotu hatene dehan, ami ema Farizeu fanatiku liu tuir ami nia lei relijiaun.

⁶ Agora ema foo sala mai hau iha tribunal nee tanba hau hein ho laran metin atu Nai Maromak kumpri Nia promesa, nebee Nia foo ba ami nia bei-ala sira hori uluk.

⁷ Ema Israel hosi suku sanulu resin rua nee hotu mos fiar Nia promesa nee. Tanba nee mak sira adora Nia loron-kalan. Liurai Agripa mak hau respeita. Maski ema Judeu sira mos fiar nunee, sira foo sala mai hau tanba hau fiar ba Nai Maromak nia promesa nebee halo ema mate moris fali.

⁸ Tansaa mak imi hanoin Nai Maromak la bele halo moris fali ema nebee mate tiha ona?

⁹ Uluk hau fiar katak, hau tenki halo buat saida deit, hodi kontra ema nebee tuir Jesus, ema Nazaré.

¹⁰ Iha tempu nee, nai-lulik Judeu nia xefi sira foo poder mai hau, hodi baa kaer Jesus nia ema sira i hatama ba kadeia. Hau mos konkorda bainhira atu foo kastigu mate ba sira balu.

¹¹ Hau baa tama-sai uma kreda Judeu nian hodi halo terus sira, i obriga sira hatete aat Jesus. Hau nia laran nakali, too hau mos baa buka sarani sira iha sidade-sidade iha rai liur hodi halo terus sira.”

Paulo konta fila fali dehan nia hasoru Nai Jesus

¹² Paulo hatutan tan dehan, “Iha loron ida, nai-lulik nia xefi sira foo orden ho surat rekomendasaun mai hau hodi baa kaer Jesus nia ema sira iha sidade Damasku.

¹³ Liurai Agripa, bainhira ami sei iha dalan klaran, meu-dia derpenti deit, iha naroman ida hosi lalehan leno kona hau ho hau nia kolega sira. Naroman nee makaas liu loro matan.

¹⁴ Ami hotu monu ba rai, i hau rona lian ida koalia mai hau ho lian Aram dehan, ‘Saulo! Saulo! Tansaa mak o halo Hau terus bebeik? Se o kontra bebeik Hau nia hakarak, o sei hetan terus barak.’

¹⁵ Hau husu, ‘Nai, Ita Boot nee see?’ Lian nee hataan fali, ‘Hau Jesus, ida nebee o halo terus teb-tebes.

¹⁶ Agora, o hamriik ona! Hau hatudu Aan ba o nee, atu o serbii Hau iha o nia vida tomak. O tenki baa foo sasin ba ema seluk kona ba saida mak o haree ona hosi Hau iha loron nee. O mos tenki foo sai buat nebee Hau sei hatudu ba o aban-bainrua.

¹⁷ Hau sei kuidadu o bainhira ema atu halo aat ba o, bele ema Judeu ka ema nebee laos Judeu. Hau haruka o baa iha ema sira nebee laos Judeu,

¹⁸ atu loke sira nia matan, para sira bele sai hosi nakukun laran ho moris iha naroman. O atu hasai sira hosi Satanás nia poder, i lori sira ba iha Nai Maromak. Tanba sira fiar mai Hau, Nai Maromak sei hamoos sira nia sala, i sira mos sai Maromak nia ema, hamutuk ho ema sira nebee Maromak hili ona.’ ”

Paulo konta dehan nia foo sasin kona ba Jesus

¹⁹ Paulo koalia tan dehan, “Nee duni, liurai Agripa, serbisu nebee hau simu rasik hosi Nai Maromak nee, hau halao duni too agora.

²⁰ Primeiru hau foo sai Jesus nia Dalan ba ema Judeu sira iha Damasku, depois ba ema Judeu sira iha Jerusalém ho provinsia Judeia hotu, ho mos ba ema nebee laos Judeu. Hau koalia momoos ba sira hotu, para sira husik ona sira nia sala, ho fila ba Nai Maromak. Sira mos tenki hatudu hahalok diak, hanesan sinal katak sira tuir Nia duni.

²¹ Tanba hau halo serbisu nunee, mak ema Judeu balu kaer hau iha Nai Maromak nia Uma Kreda Boot, i sira atu oho hau.

²² Maibee Nai Maromak tulun hau. Nee mak hau sei moris too agora. Tanba nee, hau bele hamriik iha nee, hodi foo sasin ba ema hotu-hotu, kiik-boot, kona ba Jesus. Saida mak hau koalia nee, haan malu ho saida mak profeta Moisés ho profeta sira uluk hanorin ona.

²³ Sira foo sai kona ba Ema ida nebee Nai Maromak hili ona nee, dehan, Nia tenki terus, depois Nia mate, maibee liu tiha, Nia mak ema primeiru nebee Nai Maromak halo moris fali hosi mate. Nia mak sei foo naroman ba ema Judeu sira, ho mos ba ema sira nebee laos Judeu.”

²⁴ Paulo sei koalia hela, Festu hakilar nia dehan, “Paulo! O bulak karik! O nia matenek nee halo o sai bulak.”

²⁵ Maibee Paulo hataan, “Senhor governador mak hau respeita. Hau laos bulak. Buat hotu nebee hau foo sai nee, loos duni. Hau la inventa.

²⁶ Liurai Agripa rasik hatene ona buat sira nee, tanba laos akontese iha fatin subar. Tan nee, hau brani koalia iha liurai nia oin, momoos deit.

²⁷ Hori uluk, Nai Maromak nia profeta sira foo sai ona kona ba buat sira nee. I hau fiar katak, liurai mos fiar ba profeta sira nia koalia.”

²⁸ Liurai Agripa tesi kedas nia koalia dehan, “Paulo, o hanoin o bele halo hau sai sarani lalais deit nunee ka?”

²⁹ Paulo hataan, “Hau harohan ba Nai Maromak, atu lalais ka kleur, laos liurai deit, maibee ema hotu nebee ohin loron rona hau nia koalia, bele sai Jesus nia ema, hanesan hau. Naran katak senhor sira keta hetan kastigu hanesan hau.”

³⁰ Depois liurai Agripa ho governador Festu ho Berenise, ho ema sira hotu, hamriik sai ba liur.

³¹ Bainhira sira lao sai tiha, sira koalia ba malu dehan, “Ema nee la halo sala ida. Nia la merese hetan kastigu mate ka tama kadeia.”

³² I liurai Agripa hatete ba governador Festu, “Se ema nee la husu atu lori nia lia baa tesi iha Roma karik, ita hasai tiha nia ona.”