Apostolu sira nia Istoria 22 - Biblia Tetun Dili

Paulo defende aan

¹ Paulo komesa koalia dehan, “Aman sira, ho maun-alin sira hotu, hau husu imi rona lai, tan hau atu defende hau nia aan.”

² Bainhira sira rona Paulo koalia ho sira nia lian rasik, sira nonook liu tan. Nia hatutan tan dehan,

³ “Hau ema Judeu, moris iha sidade Tarsu iha provinsia Silísia, maibee boot iha Jerusalém. Hau nia profesor naran Gamaliel. Nia hanorin hau ho didiak lei nebee profeta Moisés rai hela ba ita nia bei-ala sira. Iha tempu nebaa hau mos serbii Nai Maromak ho laran tomak hanesan mos imi hotu.

⁴ Hau sempre halo terus ema sira nebee tuir Jesus nia Dalan. Hau kaer sira, mane ho feto, hodi hatama ba kadeia, too ema balu mos mate.

⁵ Ita nia relijiaun Judeu nia ulun boot, ho xefi sira seluk hotu hatene katak buat nebee hau koalia nee, loos duni. Tan sira mak foo surat rekomendasaun mai hau, ba ema Judeu iha sidade Damasku. Ho surat nee hau hetan lisensa para baa kaer ema sarani sira iha nebaa, hodi lori mai kastigu iha Jerusalém.”

Paulo foo sasin dehan nia hasoru Nai Jesus

⁶ Paulo koalia nafatin, “Nunee hau baa iha Damasku. Iha meiu-dia ami atu besik too ona iha sidade, derepenti deit, naroman makaas ida hosi lalehan leno mai hau.

⁷ Hau monu ba rai, i rona lian ida koalia dehan, ‘Saulo! Saulo! Tansaa mak o halo terus Hau nunee?’

⁸ Hau husu, ‘Nai, Ita Boot nee see?’ Lian nee hataan, ‘Hau Jesus, ema Nazaré, ida nebee o halo terus.’

⁹ Ema sira nebee akompanha hau haree naroman nee, maibee sira la rona lian nebee koalia mai hau.

¹⁰ Depois hau husu fali, ‘Nai, se nunee, agora hau tenki halo saida?’ Nia hatete dehan, ‘Hamriik ona, hodi baa iha sidade Damasku. Iha nebaa, o sei rona saida mak o tenki halo.’

¹¹ Hau nia matan delek tiha, tanba naroman leno makaas liu. Nunee hau nia kolega sira kaer deit hau nia liman hodi ajuda hau lao tama ba iha Damasku.

¹² Iha ema ida naran Ananias hela iha nebaa. Nia ema ida adora loloos Nai Maromak i badinas halo tuir lei nebee Nai Maromak foo ba profeta Moisés. Ema Judeu hotu-hotu iha sidade nee respeita nia.

¹³ Nia mai buka hau, i hamriik iha hau nia sorin hodi hatete, ‘Irmaun Saulo, loke matan hodi haree fila fali!’ Momentu nee kedas, hau haree hetan nia.

¹⁴ Nia hatete mai hau dehan, ‘Nai Maromak, nebee ita nia bei-ala sira adora, hili ona irmaun hodi komprende didiak Nia hakarak, konhese Nia Ema Moris Loos, i rona Nia lian rasik.

¹⁵ Irmaun sei sai sasin hodi hatoo ba ema hotu-hotu saida mak ita haree, ho saida mak ita rona.

¹⁶ Ita hein tan saida?! Hamriik! Baa sarani ona! Nee hanesan sinal katak irmaun husu ba Nai Jesus hamoos ita nia sala hotu.’ ”

Nai Maromak haruka Paulo lori Nia Novidade Diak ba ema nebee laos Judeu

¹⁷ Paulo konta nafatin, “Nee liu tiha, hau fila mai sidade Jerusalém. Iha loron ida, hau baa halo orasaun iha Uma Kreda Boot. Momentu hau halo hela orasaun, Nai Maromak hatudu mai hau, hanesan mehi ida.

¹⁸ Hau haree Nai Jesus foo orden mai hau dehan, ‘O husik lalais Jerusalém! Tan povu iha nee sei la fiar sasin nebee o foo kona ba Hau.’

¹⁹ Hau hataan, ‘Maibee Nai! Sira hotu hatene katak, uluk hau tama-sai uma kreda Judeu nian iha fatin-fatin, hodi kaer ho baku ema sira nebee fiar ba Ita Boot.

²⁰ Sira mos hatene, momentu ema halibur fatuk hodi tuda mate Ita Boot nia sasin Estevão, hau mos konkorda. Hau mak hein sira nia hena nebee sira rai hela bainhira sira tuda nia.’

²¹ Maibee Nai Jesus hatete, ‘Baa ona! Tan Hau atu haruka o ba iha fatin dook, hodi foo sasin ba ema nebee laos Judeu.’ ”

²² Bainhira ema barak nee rona Paulo dehan Maromak haruka nia baa foo sasin ba ema nebee laos Judeu, sira lakohi rona tan nia. Sira hotu hakilar rame-rame dehan, “Oho tiha ema nee! Nia la serve atu moris tan.”

Paulo foo sai dehan nia ema sidadaun Roma

²³ Sira hakilar nunee, sira mos hasai sira nia hena balu soe tiha, ho raut rai uut soe ba leten, tanba sira hirus teb-tebes.

²⁴ Nunee komandante haruka soldadu sira lori tiha Paulo tama ba akampamentu laran. I nia haruka sira baku nia ho sikoti, atu hatene tansaa mak ema Judeu atu oho nia.

²⁵ Momentu sira kesi Paulo nia liman atu baku, nia husu ba kapitaun nebee hamriik besik dehan, “Tuir governu Roma nia lei, nebee mak loos? Se iha ema sidadaun Roma ida halo sala, imi tenki halo saida ba nia? Imi baku uluk nia ka, tesi nia lia uluk?”

²⁶ Rona nunee, kapitaun baa foo hatene ba nia komandante dehan, “Senhor, ema nee sidadaun Roma. Ita boot halo saida mak nee?”

²⁷ Entaun komandante baa husu rasik ba Paulo dehan, “Hatete mai hau, o sidadaun Roma ka?” Paulo hataan, “Loos duni. Hau sidadaun Roma.”

²⁸ Komandante dehan, “Hau mos hanesan. Hau selu karu teb-tebes hodi hetan direitu sidadaun nian.” Maibee Paulo hataan, “Hau sidadaun Roma kedas, dezde hau moris.”

²⁹ Bainhira sira rona dehan Paulo sidadaun Roma, soldadu nebee prontu ona atu baku Paulo, hakiduk kedas. Komandante mos tauk, tanba nia haruka kesi tiha ona Paulo nia liman, ida nee kontra lei.

Paulo iha tribunal relijiaun Judeu nian

³⁰ Iha aban fali, komandante sei hakarak buka hatene loloos lia nee nia huun oinsaa. Entaun nia haruka soldadu sira baa bolu nai-lulik Judeu nia ulun sira ho ema boot sira seluk nebee baibain tesi lia, para tuur hamutuk iha tribunal. Nia mos haruka kore tiha korenti iha Paulo, i lori nia baa aprezenta iha sira nia oin.