Apostolu sira nia Istoria 21 - Biblia Tetun Dili

Paulo sira baa Jerusalém

¹ Ho laran susar, ami despede malu tiha hotu ho presbiteru sira iha igreja Efezu, ami sae roo, hodi baa iha rai kiik ida naran Kos. Iha aban fali, ami too iha rai kiik ida seluk naran Rodes, depois lao nafatin ba iha sidade Pátara.

² Ami tuun hosi roo, depois sae fali roo seluk nebee atu baa provinsia Fenísia besik ho Síria.

³ La kleur ami mos haree rai Xipre iha ami nia sorin karuk, maibee ami liu deit. Depois ami too iha sidade Tiru, iha provinsia Síria. Iha fatin nee, roo para hodi hatuun naha.

⁴ Nunee ami tuun baa buka sarani sira. Hasoru tiha sira, ami hela ho sira semana ida. Espiritu Santu foo hatene ba sira para hatete ba Paulo la bele liu ba Jerusalém.

⁵ Liu tiha semana ida, sarani sira hotu, mane-feto, kiik-boot, katuas-ferik ho foin sae, sira akompanha ami too iha tasi ibun. Iha nebaa, ami hotu hakneak hodi halo orasaun hamutuk.

⁶ Despede malu tiha hotu iha tasi ibun, ami sae roo, i sira mos fila.

⁷ Ami sai hosi Tiru, baa iha sidade Tolemais. Tuun tiha hosi roo, ami baa kumprimenta sarani sira, i hela ho sira loron ida.

⁸ Iha aban fali, ami sai hosi Tolemais, depois ami too iha sidade Sezareia. Iha nebaa, ami hela ho Filipe, ema ida nebee foo sai Nai Jesus nia Novidade Diak ba ema nebee seidauk rona. Nia mos ema ida hosi sira nain hitu nebee uluk ema sarani sira iha Jerusalém hili hodi toma konta haan-hemu.

⁹ Filipe iha oan feto-raan nain haat. Nai Maromak baibain uza sira hanesan profeta hodi foo tutan Maromak nia lia menon.

¹⁰ Bainhira ami hela ho sira loron ida-rua ona, iha ema ida naran Ágabu too mai hosi provinsia Judeia. Maromak mos uza nia hanesan profeta.

¹¹ Nia lao mai iha ami, i nia foti Paulo nia sintu, hodi kesi nia liman-ain rasik ho sintu nee dehan, “Nai Maromak nia Espiritu Santu hatete nunee, ‘Sintu nee nia nain, ema Judeu sira iha Jerusalém sei futu nia nunee. Depois sira sei entrega nia ba ema nebee laos Judeu sira nia liman.’ ”

¹² Rona nia koalia nunee, ami ho sarani sira iha nebaa husu boot ba Paulo atu nia la bele liu ba Jerusalém.

¹³ Maibee nia hataan, “Nusaa mak imi tanis? Imi halo hau nia laran dodok deit. Maski ema futu hau ka oho hau tanba hau tuir Nai Jesus, hau prontu atu simu.”

¹⁴ Tanba ami hatene dehan Paulo la rona ona ami, ami mos husik deit, hodi dehan, “Tuir deit Nai Maromak nia hakarak baa.”

¹⁵ Liu tiha nee, ami haloot ami nia sasaan hodi baa Jerusalém.

¹⁶ Iha sarani balu hosi Sezareia akompanha ami, too iha ema ida naran Manason nia uma. Nia hosi ilha Xipre, i nia tuir Jesus kleur ona.

¹⁷ Bainhira ami too iha Jerusalém, sarani sira simu ami ho laran haksolok.

Paulo baa vizita Tiago

¹⁸ Iha aban fali, Paulo hamutuk ho ami baa hasoru Tiago ho presbiteru sira iha igreja Jerusalém.

¹⁹ Ami kumprimenta malu tiha, Paulo konta ba sira saida mak Nai Maromak halo ona iha fatin-fatin ba ema sira nebee laos Judeu, liu hosi Paulo nia serbisu.

²⁰ Rona nunee, sira hotu hahii Nai Maromak. Depois sira hatete ba Paulo dehan, “Irmaun, naran katak ita hatene, iha ona ema Judeu rihun ba rihun mak fiar ba Nai Jesus. Maibee sira hotu sei kaer nafatin lei nebee Nai Maromak rai hela ba profeta Moisés.

²¹ Ema balu mos lori lia mai iha nee dehan, irmaun hanorin ema Judeu sira iha rai liur, para sira lalikan tuir tan profeta Moisés nia lei nee. Sira dehan, irmaun bandu sira lalikan sunat sira nia oan mane, i lalikan tuir tan ita ema Judeu nia lisan.

²² Orsida sira sei hatene dehan ita too ona iha nee. Entaun ita atu halo oinsaa?

²³ Diak liu halo hanesan nee deit. Ami iha ema nain haat iha nee atu koi sira nia fuuk, hanesan sinal katak sira kumpri ona promesa nebee uluk sira halo ba Nai Maromak.

²⁴ Baa ho sira hodi tuir serimonia hamoos aan hamutuk ho sira iha Nai Maromak nia Uma Kreda Boot. Bainhira koi sira nia fuuk, irmaun mak selu. Se irmaun halo nunee, ema hotu sei hatene katak, irmaun sei kaer nafatin lei relijiaun Judeu nian nebee profeta Moisés foo ba ita. I sira sei hatene katak lia anin nebee sira rona nee la loos.

²⁵ Maibee ba ema nebee laos Judeu nebee fiar ona ba Nai Jesus, ami haruka ona surat ba sira, hodi foo hatene ami nia desizaun katak sira la presiza tuir ita nia lisan Judeu nian hotu. Sira tenki halo tuir mak nee: la bele halo relasaun seksual ho ema nebee laos nia feen ka laen. La bele haan naan nebee hamulak tiha ona ba lulik. La bele haan naan raan. La bele haan naan animal nebee la koa kakorok halo raan sai lai.”

²⁶ Paulo simu sira nia opiniaun ho diak. Iha aban fali, nia ho ema nain haat nee baa hamutuk iha Nai Maromak nia Uma Kreda Boot, hodi hamoos sira nia aan tuir kostumi relijiaun Judeu nian. Nee hotu tiha, Paulo foo hatene ba nai-lulik dehan, sei hela loron hira tan, foin sira halo remata sira nia promesa. Tanba bainhira loron nee too ona, sira tenki foo oferta ba Nai Maromak.

Ema kaer Paulo iha Nai Maromak nia Uma Kreda Boot

^27-29 Loron hitu nee besik hotu ona, iha ema Judeu balu hosi provinsia Ázia haree Paulo lao hela iha sidade Jerusalém, hamutuk ho nia kolega ida naran Trófimu. Nia hosi sidade Efezu, i nia laos ema Judeu. Bainhira sira haree Paulo tama ba Nai Maromak nia Uma Kreda Boot, sira hanoin, nia lori nia kolega Trófimu tama ba iha Uma Kreda Boot laran. Tuir loos ema nebee laos Judeu la bele tama. Tan nee, sira tau lia ba ema barak iha fatin nee, i kaer Paulo, hodi hakilar dadauk, ‘Maluk Israel sira, ajuda ami lai! Ema ida nee mak hanorin ema iha fatin-fatin para soe tiha ita nia lisan Judeu. Nia mos hatete aat Nai Maromak nia Uma Kreda Boot nee. I agora tan, nia lori ema nebee laos Judeu tama ba laran hafoer Nai Maromak nia fatin santu.”

³⁰ Rona nunee, ema iha sidade Jerusalém tomak, laran nakali. Ema barak halai baa butuk iha Uma Kreda Boot, i sira kaer Paulo, rasta sai ba liur. Depois ema taka tiha uma kreda nia odamatan boot.

³¹ Bainhira sira komesa atu oho Paulo, ema baa foo hatene ba komandante batalhaun Roma nian katak, sidade Jerusalém tomak rungu-ranga.

³² Nia bolu kedas kapitaun sira ho sira nia soldadu, hodi halai ba iha ema barak nee. Bainhira povu haree komandante ho tropas mai, sira la baku tan Paulo ona.

³³ Komandante kaer tiha Paulo, i haruka sira futu nia ho korenti rua. Nia husu ba ema barak nee, “Ema nee see? Nia halo sala saida?”

³⁴ Maibee sira nia liafuan la haan malu. Balu hakilar oin ida. Balu tan hakilar oin seluk. Nunee halo komandante la hatene lia nee nia huun ho tutun, tanba ema barak hakilar ida-idak nian. Tan nee, nia haruka sira lori tiha Paulo ba iha tropas sira nia akampamentu.

^35-36 Ema barak nee sena malu tutuir. Bainhira sira too iha eskada, sira saruntu tuun-sae. Too soldadu sira hiit tiha Paulo tau ba sira nia kabaas, para ema la bele baku nia. I ema barak nee tuir hodi hakilar dehan, “Oho tiha nia! Oho tiha nia!”

Paulo komesa defende aan iha ema barak nia oin

³⁷ Momentu sira atu tama ba iha akampamentu laran, Paulo husu ba komandante ho lian Gregu dehan, “Senhor, hau bele koalia ituan?” Rona Paulo husu nunee, komandante hakfodak, i husu, “O hatene lian Gregu?

³⁸ Hau hanoin o ema Ejitu nebee uluk tau lia ba ema atu hatuun governu. Depois nia lori ema rihun haat ho kroat ba iha rai fuik maran.”

³⁹ Paulo hataan fali, “Lae, senhor! Hau ema Judeu, hosi Tarsu, sidade prinsipal ida iha provinsia Silísia. Hau husu senhor foo lisensa mai hau, hodi koalia ba ema sira nee.”

⁴⁰ Komandante simu. Entaun Paulo hamriik iha eskada leten, nia foti liman, husu para sira nonook. Bainhira sira hotu nonook ona, nia koalia ba sira ho sira nia lian Aram rasik.