Apostolu sira nia Istoria 20 - Biblia Tetun Dili

Paulo sira fila fali ba provinsia Masedónia

¹ Bainhira sidade Efezu hakmatek fila fali, Paulo halibur ema nebee tuir Jesus hodi hametin sira nia laran. Depois nia despede sira hodi baa provinsia Masedónia.

² Iha nebaa, nia lao lemo aldeia-aldeia hodi hametin ema sarani sira nia fiar, too nia tama iha provinsia Grésia.

³ Nia hela fulan tolu iha nebaa. Depois nia atu baa sae roo ba provinsia Síria, maibee nia rona dehan, ema Judeu balu kombina malu atu oho nia. Entaun nia desidi atu baa Síria liu hosi provinsia Masedónia.

⁴ Iha grupu kiik ida mak akompanha Paulo. Sira nee mak Sópatro hosi sidade Bereia, ema nain rua naran Aristarku ho Sekundu hosi sidade Tesalónika, ema ida naran Gaio hosi sidade Derbe, ho ema nain tolu hosi provinsia Ázia, sira nee mak Timóteo, Tíkiku ho Trófimu.

⁵ Nee liu tiha, sira sai baa uluk hein Paulo iha sidade Tróade iha tasi sorin baa.

⁶ Liu tiha tempu ema Judeu sira nia loron boot Paskua, ami baa sae roo iha sidade Filipi iha provinsia Masedónia. Ami iha tasi laran loron lima ona, depois ami too iha Tróade. Iha nebaa ami hasoru malu fali ho kolega sira, i hela iha nebaa semana ida.

Éutiku monu mate i moris fali

⁷ Iha loron Domingu, ami halibur hodi haan hamutuk. Tanba aban Paulo atu baa ona, nia koalia too kalan boot.

⁸ Ami halibur malu iha uma andar leten. Iha kalan nee sira sunu ahi oan barak.

⁹ Iha mane foin sae ida naran Éutiku tuur iha janela hodi rona Paulo nia hanorin. Tanba Paulo koalia kleur teb-tebes maka Éutiku matan dukur nakoros, nia monu hosi janela tuun ba rai, i mate kedas.

¹⁰ Paulo tuun baa hakruuk hodi hakuak nia dehan, “Lalika tauk! Nia moris fali ona!”

¹¹ Ami hotu sae fila fali ba andar leten hodi haan hamutuk. Depois Paulo hatutan nia koalia too loro matan sae, i nia baa ona.

¹² Sira lori Éutiku fila ba nia uma. Sira hotu haksolok, tanba nia moris fali.

Paulo sira lao hosi sidade Tróade ba sidade Miletu

¹³ Depois ami fahe malu. Paulo lao ain deit ba sidade Asós, i ami baa sae roo.

¹⁴ Ami too iha Asós, Paulo mos sae roo hamutuk ho ami, hodi baa iha sidade Mitilene.

¹⁵ Iha aban fali, ami besik iha rai kiik ida naran Kios. Iha bainrua, ami haree rai kiik ida seluk naran Samos. Iha baintolu, ami too iha sidade Miletu.

¹⁶ Paulo hakarak too lalais iha Jerusalém, para se bele tuir loron Pentakosta iha nebaa. Nunee nia lakohi lakon tempu lao sae ba sidade Efezu.

Paulo fahe malu ho presbiteru sira hosi sidade Efezu

¹⁷ Bainhira ami too iha Miletu, Paulo haruka lia menon ba presbiteru sira iha igreja Efezu, atu sira mai hasoru nia.

¹⁸ Bainhira sira too mai, Paulo foo hatene ba sira dehan, “Irmaun sira, imi hatene ona hau nia moris durante hau hamutuk ho imi, komesa loron primeiru hau tau ain iha provinsia Ázia, too oras nee.

¹⁹ Imi hatene hau serbisu makaas ba Nai Maromak iha imi nia leet, i sempre haraik aan. Iha hau nia serbisu nee, hau nia matan-been fakar barak. Hau mos hetan terus barak tanba ema Judeu sira kombina malu atu halo aat mai hau.

²⁰ Maski nunee, hau foo sai nafatin lia loos ba imi, ho mos ba ema barak, iha fatin publiku ka iha ema nia uma. I hau nunka sees hosi knaar ida nee.

²¹ Hau foo hatene ona ba ema Judeu, ho mos ema nebee laos Judeu, atu sira husik ona sira nia sala, hodi tuir Nai Maromak i fiar ba Nai Jesus.

²² Agora Nai Maromak nia Espiritu Santu haruka hau baa Jerusalém. Hau tuir deit, hau la hatene saida mak atu mosu mai hau iha nebaa.

²³ Maibee iha sidade ba sidade, Espiritu Santu foo hatene antes tiha ona mai hau dehan, hau sei tama kadeia i hetan terus barak.

²⁴ Nai Jesus mak tau serbisu nee iha hau nia kabaas, atu hau baa foo sai Nai Maromak nia Novidade Diak kona ba Nia grasa ho Nia domin mai ita. Se karik hau la tuir Nia hakarak, i la halo remata Nia serbisu nee, hau senti hau nia moris nee la iha folin ida.

²⁵ Agora hau hatene katak, imi nebee hau hanorin kona ba Nai Maromak nia reinu, sei la hasoru tan hau ona.

²⁶ Tanba nee, rona didiak mai. Hau halo remata ona hau nia serbisu iha imi. Se iha ema ruma hosi imi mak la halo parte ba Nai Maromak, imi mak hatene! Laos hau mak sala.

²⁷ Hau foo hatene ona Maromak nia hakarak hotu ba imi. La iha tan buat ida ke hau la foo sai ba imi.

²⁸ Nee duni imi tenki kuidadu didiak ho imi nia moris, ho haree didiak Maromak nia povu. Espiritu Santu haruka imi tau matan ba sira hanesan bibi atan ida hein nia bibi. La bele haluha katak, Nai Jesus mate ona hodi sosa kotu ema sira nee ho Nia raan.

²⁹ Hau atu baa ona. Depois mestri falsu sei mai hanesan asu siak iha imi nia klaran hodi buka atu halo imi sees aan hosi Nai Jesus nia Dalan.

³⁰ Iha mos balu hosi imi sei hanorin la loos, atu ema husik Jesus hodi tuir deit sira.

³¹ Tanba nee, imi tenki matan moris neon nain. Keta haluha, hau hela tinan tolu nia laran hamutuk ho imi, hodi hanorin imi loron-kalan. Hau nia matan been fakar barak, tanba imi.

³² Agora ita atu fahe malu ona. Nunee hau entrega imi hotu ba iha Maromak nia liman, atu Nia kuidadu imi. Imi tenki kaer metin liafuan nebee mak hau foo sai ona ba imi kona ba Maromak nia grasa. Liu hosi liafuan nee, Nai Maromak bele halo forti imi nia fiar, i sei foo ba imi buat hotu-hotu nebee Nia promete ona atu foo ba Nia povu.

³³ Bainhira hau sei serbisu hamutuk ho imi, hau nunka hanoin atu husu imi nia osan mean, ka osan mutin, ka hena, ka buat saida deit.

³⁴ Imi mos hatene, hau serbisu makaas ho hau nia liman hodi foo haan hau nia aan rasik ho mos sira nebee tuir hau.

³⁵ Nunee hau sempre hatudu ezemplu atu imi mos bele serbisu makaas hodi ajuda ema kiak sira. Hanoin didiak Nai Jesus nia Liafuan, ‘Diak liu ita foo, dukee ita simu.’ ”

³⁶ Paulo koalia hotu nunee, nia hakneak hodi halo orasaun hamutuk ho sira.

^37-38 Sira hotu laran tristi, tanba Paulo hatete dehan sira sei la hasoru tan nia ona. Too ona oras sira atu fahe malu, sira hakuak Paulo i rei nia ho tanis. Depois sira akompanha nia hodi baa too iha roo.