Apostolu sira nia Istoria 19 - Biblia Tetun Dili

Paulo fila fali ba sidade Efezu

¹ Bainhira Apolo sei iha Korintu, Paulo lao lemo aldeia-aldeia iha foho, depois nia too iha Efezu. Iha nebaa, nia hasoru malu ho ema balu nebee fiar ona ba Nai Jesus.

² Nia husu ba sira, “Maun-alin sira. Uluk imi fiar ba Jesus, imi simu ona Espiritu Santu ka lae?” Sira hataan, “Lae. Ami nunka rona dehan, iha Espiritu Santu.”

³ Paulo husu tan, “Se nunee, imi sarani ho sarani ida nebee?” Sira hataan, “Ho João nia sarani.”

⁴ Paulo hatete, “João sarani ema hanesan sinal katak sira husik ona sira nia sala. Maibee nia mos hanorin ema Israel, para sira tenki fiar ba Jesus, Ema nebee Maromak atu haruka mai nee.”

⁵ Depois Paulo sarani sira ho Nai Jesus nia naran.

⁶ Momentu Paulo tau liman ba sira nia ulun hodi halo orasaun, Espiritu Santu tuun kedas ba sira. Sira mos komesa koalia lian oi-oin nebee sira nunka aprende. I Maromak uza sira hodi foo sai Nia liafuan.

⁷ Sira nee hamutuk mais-ou-menus mane nain sanulu resin rua.

Paulo foo sai Nai Maromak nia Liafuan iha Efezu

⁸ Durante fulan tolu nia laran, Paulo baa tama bebeik iha ema Judeu sira nia uma kreda hodi hatoo Nai Maromak nia Liafuan. Nia koalia ho aten brani atu bele dada ema ba Nai Jesus.

⁹ Maibee iha ema balu ulun toos lakohi simu nia hanorin. Sira mos tau lia ba ema seluk, para la bele tuir Jesus nia Dalan. Nunee Paulo ho ema sarani sira husik tiha uma kreda nee, i sira loro-loron baa halibur hamutuk iha salaun Tiranu, hodi koalia kona ba Nai Maromak nia Liafuan.

¹⁰ Nia halo nunee durante tinan rua, too ema iha provinsia Ázia tomak rona Nai Maromak nia Liafuan. Ema sira nee ema Judeu ho ema nebee laos Judeu.

Espiritu aat baku Seva nia oan sira

¹¹ Nai Maromak foo poder ba Paulo hodi halo milagre oi-oin.

¹² Por ezemplu, se ema empresta Paulo nia lensu, ka hena ruma nebee nia uza ona, hodi baa tau ba ema moras, sira diak kedas. I ema sira nebee espiritu aat tama iha sira, nia mos sai kedas.

¹³ Iha matan-dook Judeu balu lao lemo-lemo iha rai nee hodi duni sai espiritu aat hosi ema. Sira koko temi Nai Jesus nia naran hodi haruka espiritu aat sira sai, i sira temi liafuan nee, “Hau haruka o sai hosi ema nee, hodi Jesus nia naran, Jesus ida nebee Paulo foo sai nee.”

¹⁴ Iha maun-alin nain hitu mos halo nunee. Sira nia aman mak Seva, nai lulik Judeu ida.

¹⁵ Maibee bainhira sira koko uza liafuan nee hodi haruka espiritu aat nee sai, espiritu nee hataan, “Hau rona ba Jesus. Hau mos rona ba Paulo. Maibee imi nee see?”

¹⁶ Ema ida nebee iha espiritu aat nee, haksoit ba sira nia leten i baku sira too kanek, i lees sira nia ropa, too sira halai sai molik hosi uma nee.

¹⁷ Novidade nee ema konta iha fatin ba fatin iha sidade Efezu tomak, too ema Judeu ho mos ema sira nebee laos Judeu mos hatene. Sira nebee rona istoria nee tauk ba Nai Maromak, i sira hahii ho respeita teb-tebes Nai Jesus.

¹⁸ Hosi sira nebee foin fiar ba Jesus, barak mai foo sai sira nia sala iha sarani sira nia oin.

¹⁹ Hosi sira nee, iha balu halao forsa nakukun. Entaun sira halibur sira nia livru forsa nakukun nian hodi baa sunu tiha hotu iha ema barak nia oin. Livru sira nee nia folin, osan mutin rihun lima-nulu.

²⁰ Nunee ema barak liu tan rona ho fiar Nai Maromak nia Liafuan kona ba Nai Jesus. I ema sarani sira aumenta barak ba bebeik.

Ema halo rungu-ranga iha Efezu

²¹ Nee liu tiha, Paulo desidi atu baa iha provinsia Masedónia ho provinsia Akaia, depois mak baa Jerusalém. Nia dehan, “Tuir mai, hau tenki baa Roma.”

²² Nia haruka nia ajudante nain rua Timóteo ho Erastu ba uluk iha Masedónia, i nia rasik sei hela iha provinsia Ázia.

²³ Iha tempu nee, mosu rungu-ranga boot ida iha sidade Efezu kona ba Jesus nia Dalan.

²⁴ Problema nee nia huun nunee: iha fatin nee, iha badaen osan mutin ida naran Demétriu. Nia serbisu mak halo uma lulik kiikoan-kiikoan ho osan mutin ba sira nia maromak ida, naran Ártemis. Nia kontratu nee manaan osan boot, i nia foo serbisu ba badaen barak.

²⁵ Iha loron ida, Demétriu halibur nia badaen sira ho badaen sira seluk, hodi hatete ba sira, “Maluk sira, imi hatene katak ita sai riku nunee, tanba serbisu ida nee.

²⁶ Maibee agora, ita haree ho ita rona rasik, ema nia aman Paulo nee, nia koalia. Tan nia halo ema barak fiar ona dehan, estatua maromak nebee ita ema halo ho liman, laos maromak. Agora, laos iha sidade Efezu deit mak rona ba nia, maibee iha provinsia Ázia tomak.

²⁷ Nunee ita nia serbisu nee, ema sei la foo folin ona. Povu mos sei la respeita ona uma lulik Ártemis nian, i sei la fiar ona ba Ártemis, maski agora dadauk ema hotu adora nia iha provinsia Ázia tomak, too iha rai ulun rai ikun.”

²⁸ Rona nunee, sira nia laran nakali kedas, i sira komesa hakilar dehan, “Viva Ártemis! Ártemis mak boot! Ita ema Efezu adora nia!”

²⁹ Rona ema hakilar-hakilar nunee, ema halai mai hosi fatin-fatin, too sidade nee sai rungu-ranga boot. Ema hotu halai rame-rame baa too estádiun. Sira kaer tiha Paulo ho nia kolega nain rua hodi rasta ba iha nebaa. Sira nain rua naran Gaio ho Aristarku, nebee uluk akompanha Paulo hosi Masedónia.

³⁰ Paulo hakarak baa koalia ho ema sira nebee halo rungu-ranga nee, maibee sarani sira la husik sira baa.

³¹ Nai ulun balu hosi provinsia Ázia nian, Paulo nia belun. Sira haruka ema baa husu boot ba Paulo atu nia la bele tama ba iha nebaa, tanba nia bele hetan susar.

³² Iha estádiun laran, ema hotu rungu-ranga. Iha balu hakilar oin ida. Iha balu tan hakilar oin seluk. Afinal ema barak la hatene tanba saa mak sira halibur malu iha nebaa.

³³ Ema Judeu balu dudu ema ida naran Alexandre ba iha povu nia oin para koalia. Ema balu mos hatete ba nia saida mak nia tenki koalia. Depois Alexandre foti liman husu para sira nonook, i nia komesa esplika katak, laos sira Judeu mak halo problema nee.

³⁴ Maibee bainhira povu hatene katak nia ema Judeu, sira hakilar makaas liu tan dehan, “Viva Ártemis! Ártemis mak boot! Ita ema Efezu adora nia!” Sira hakilar-hakilar nunee too oras rua.

^35-36 Tuir mai, funsionariu boot ida iha sidade Efezu konsege halo ema barak nee hakmatek. Nia hatete, “Maluk sira iha sidade Efezu. Ema hotu hatene katak maromak boot Ártemis nia estatua monu tuun hosi lalehan mai iha ita ema Efezu nia leet, i ita mak hein nia uma lulik. La iha ema ida bele nega buat sira nee. Nusaa mak imi hakilar nunee? Husik ema bosok-teen sira tuir sira nia hakarak baa, maibee imi keta halo nar-naran.

³⁷ Imi lori ema nain rua nee mai, hanesan ke sira halo buat aat ruma. Afinal sira la naok buat ida hosi Ártemis nia uma lulik. Sira mos la koalia aat ita nia maromak Ártemis. Nunee imi atu foo sala saida ba sira?

³⁸ Ita iha tribunal. Juis sira mos hein hela. Nunee, se Demétriu sira hakarak baa kesar, sira tenki tuir lei, para lori kazu nee ba tribunal.

³⁹ I se iha asuntu seluk mak sira hakarak foti mos, husik sira baa rezolve ho tesi lia nain sira.

⁴⁰ Keta halo be governu Roma foo sala mai ita, tanba ita halo rungu-ranga nunee. Se sira hakarak buka hatene lia nee nia huun ho tutun, ita atu hataan oinsaa? Tanba problema nee nia huun ho tutun la iha.”

⁴¹ Koalia hotu nunee, ema boot nee haruka sira fahe malu tiha, i sira mos namkari.