Apostolu sira nia Istoria 18 - Biblia Tetun Dili

Paulo serbisu hamutuk ho Akila ho Priscila

¹ Nee liu tiha, Paulo husik tiha sidade Atenas hodi baa iha sidade Korintu.

² Iha nebaa, nia hasoru malu ho ema Judeu ida naran Akila hosi provinsia Pontu, ho nia kaben Priscila. Sira nain rua foin mai hosi provinsia Itália. Sira sai hosi nebaa tanba liurai boot Cláudio haruka ema Judeu sira hotu-hotu sai hosi sidade Roma. Paulo baa vizita sira,

³ depois hela ho sira, i serbisu hamutuk ho sira, tanba sira nia serbisu halo tenda hosi animal nia kulit, hanesan mos Paulo nian.

⁴ Sabdu-Sabdu, iha ema Judeu sira nia loron hodi adora Maromak hamutuk, Paulo baa tama iha sira nia uma kreda hodi koalia ho ema Judeu ho mos ema Gregu atu dada sira fiar ba Nai Jesus.

⁵ Bainhira Silas ho Timóteo mai hosi provinsia Masedónia, Paulo husik tiha nia serbisu halo tenda. Loron-kalan nia fadigadu foo sai ba ema Judeu sira dehan, Ema ida nebee Nai Maromak hili ona nee mak Jesus.”

⁶ Maibee ema Judeu balu kontra bebeik ho hatete aat nia. Entaun Paulo baku rai uut hosi nia hena, hanesan sinal katak, nia la interese tan ho sira ona. Nia dehan, “Imi mak sei lori todan no responsabiliza ba imi nia raan rasik. Hau la iha tan responsabilidade ona ba imi ema Judeu. Agora hau atu baa foo sai Novidade Diak ba ema sira nebee laos Judeu.”

⁷ Depois Paulo husik tiha sira, i baa tama iha ema ida naran Tísiu Justu nia uma. Nia laos ema Judeu, maibee nia hamtauk ba Nai Maromak. Nia hela iha uma kreda nia sorin.

⁸ La kleur, Krispu, nebee lider iha uma kreda nee, ho ema hotu iha nia uma laran, fiar ba Nai Jesus. Nunee mos ema Korintu barak tan nebee rona Paulo nia koalia, komesa fiar ba Jesus. Depois sira hotu simu sarani.

⁹ Iha kalan ida, Nai Maromak hatete ba Paulo hanesan mehi ida dehan, “Paulo, o keta tauk! O tenki foo sai nafatin Hau nia Novidade Diak. La bele para!

¹⁰ Hau hamutuk ho o. La iha ema ida bele halo aat ba o, tan iha sidade nee, Hau nia ema barak.”

¹¹ Nunee Paulo hela tinan ida ho balu iha sidade Korintu hodi hanorin Maromak nia Liafuan.

¹² Momentu Gálio sai governador iha provinsia Akaia, ema Judeu balu hamutuk kontra Paulo, i lori nia baa kesar ba governador iha tribunal.

¹³ Sira foo sala ba Paulo dehan, “Ema ida nee dada povu baa tuir relijiaun foun, nebee governu Roma la rekonhese.”

¹⁴ Maibee bainhira Paulo foin atu hataan, governador tesi kedas nia koalia. Nia hatete ba ema sira nebee halo lia ho Paulo dehan, “Imi ema Judeu, rona mai! Se imi lori ema nebee halo aat ruma ka krime todan ruma, hau prontu rona imi nia lian.

¹⁵ Maibee problema nebee imi lori mai nee, imi nia problema uma laran. Imi so diskuti deit kona ba lei relijiaun Judeu nian, ho liafuan, ho naran. Problema nee, imi mak tenki rezolve rasik.”

¹⁶ I governador Gálio duni sira sai hosi tribunal.

¹⁷ Ema lubuk boot nebee halibur malu hela kaer tiha ema ida naran Sóstenes. Nia mak toma konta uma kreda ema Judeu sira nian. Sira lori nia tama ba tribunal i baku nia iha governador nia oin. Maibee governador la interese.

Paulo baa fali iha sidade Antiokia iha provinsia Síria

^18-19 Liu tiha nee, Paulo sei hela kleur ituan iha Korintu. Depois nia despede sarani sira hodi baa iha sidade ida naran Senkreia, hamutuk ho Priscila ho Akila. Paulo koi tiha nia fuuk hanesan sinal katak, buat nebee uluk nia promete ba Maromak, agora nia kumpri ona. Hosi fatin nee sira sae roo nebee atu baa provinsia Síria, too iha sidade Efezu. Sira tuun hosi roo, Paulo husik hela nia kolega nain rua nee. Nia baa tama iha ema Judeu sira nia uma kreda, hodi diskuti ho sira.

²⁰ Sira husu ba Paulo atu hela kleur ituan ho sira, maibee nia la hataan.

²¹ Depois nia despede sira hodi dehan, “Se Maromak hakarak, hau sei mai vizita fali imi.” I nia mos sae roo hodi baa ona.

²² Depois too iha sidade Sezareia, nia mos tuun. I nia lao sae ba Jerusalém, vizita Nai Jesus nia povu iha nebaa. Depois nia fila fali ba iha sidade Antiokia.

²³ Paulo hela lai iha nebaa, foin nia baa lao lemo provinsia Galasia ho provinsia Frígia, hodi hametin liu tan sarani sira nia fiar.

Apolo koalia kona ba Jesus iha sidade Efezu ho sidade Korintu

²⁴ Iha tempu nee, ema Judeu ida hosi sidade Alexandria iha rai Ejitu foin too iha sidade Efezu. Nia naran Apolo. Nia matenek koalia i hatene didiak Sagrada Eskritura.

²⁵ Nia hatene ona kona ba Jesus nia Dalan, i nia badinas teb-tebes konta fila fali ba ema seluk. Saida mak nia foo sai nee, loos duni. Maibee nia seidauk komprende buat hotu-hotu kona ba Jesus. Nia so hatene deit dehan João sarani ema hanesan sinal ida katak sira husik ona sira nia sala.

²⁶ Iha loron ida, nia koalia ho brani iha ema Judeu sira nia uma kreda. Priscila ho Akila mos rona hela nia hanorin. Entaun sira konvida Apolo baa iha sira nia uma, hodi esplika didiak ba nia kona ba Maromak nia Dalan.

²⁷ Tuir mai, Apolo desidi atu baa provinsia Akaia. Sarani sira iha Efezu konkorda ho nia planu nee. Entaun sira hakerek karta ida, foo ba ema sira nebee fiar ona ba Jesus iha nebaa, husu ba sira atu simu Apolo ho diak. Too iha Akaia, nia ajuda teb-tebes sira nebee fiar ona ba Jesus. Tanba Nai Maromak hatudu Nia grasa ba nia.

²⁸ Apolo debate ho ema Judeu sira, iha ema barak nia oin, maibee la iha ema ida manaan nia. I liu hosi Sagrada Eskritura nia hatudu ba sira katak, Ema ida nebee Maromak hili ona nee, mak Jesus.