Apostolu sira nia Istoria 17 - Biblia Tetun Dili

Paulo sira baa iha sidade Tesalónika

¹ Liu tiha nee, Paulo ho Silas kontinua sira nia viajen liu hosi sidade Anfípolis ho Apolónia, too iha sidade Tesalónika. Iha sidade nee, iha uma kreda ema Judeu sira nian.

² Durante loron Sabadu tolu tutuir malu, Paulo baa tama iha uma kreda nee, hanesan baibain. Nia lee Nai Maromak nia Liafuan i diskuti ho ema sira iha nebaa,

³ hodi hatudu katak, Ema ida nebee Nai Maromak hili ona nee, sei hetan terus barak, i sei mate, depois sei moris fila fali. Nia hatete, “Ema nee mak Jesus.”

⁴ Ema barak fiar ba Nai Jesus, i tuir Paulo ho Silas. Sira nee mak ema Judeu balu, mane Gregu barak nebee hamtauk ona Nai Maromak, ho mos senhora balu nebee iha pozisaun aas.

⁵ Maibee ema Judeu nia boot sira laran moras Paulo ho Silas. Entaun sira tau lia ba ema vadiu iha merkadu, hodi halo rungu-ranga. Sira baa asalta Jason nia uma hodi buka Paulo ho Silas. Sira atu rasta sai sira nain rua ba povu hodi foo justisa.

⁶ Maibee sira buka la hetan. Nunee sira kaer fali Jason ho ema sarani balu hodi rasta ba iha tribunal. Sira hakilar dehan, “Ema sira nebee halo rungu-ranga iha mundu tomak, agora mos tama ona iha ita nia sidade. I Jason simu tiha ona sira iha nia uma.

⁷ Ema sira nee hotu kontra lei Roma nian, tanba sira lakohi rekonhese liurai boot, César. Sira rekonhese deit sira nia Liurai Boot ida, naran Jesus.”

⁸ Rona nunee, tesi lia nain sira ho povu iha sidade nee konfuzaun boot.

⁹ I tesi lia nain sira haruka Jason ho sarani sira selu osan hodi foo garantia katak problema nee sei la mosu tan. Depois foin husik sira baa.

Paulo sira baa iha sidade Bereia

¹⁰ Iha kalan nee kedas, ema sarani sira iha sidade Tesalónika, haruka Paulo ho Silas baa iha sidade ida naran Bereia. Too iha nebaa, sira baa tama iha uma kreda ema Judeu sira nian hodi hanorin.

¹¹ Ema Judeu sira iha Bereia la hanesan ho sira iha Tesalónika. Sira laran nakloke atu rona Novidade Diak kona ba Nai Jesus. Nee mak loro-loron sira lee Maromak nia Liafuan hodi buka hatene liafuan sira nebee Paulo ho Silas foo sai nee loos ka lae.

¹² Tanba nee, ema Judeu barak fiar ba Jesus. Nunee mos ema mane Gregu barak, ho senhora Gregu balu nebee iha pozisaun aas.

¹³ Maibee bainhira ema Judeu sira iha Tesalónika rona dehan Paulo sira hanorin Maromak nia Liafuan iha Bereia, sira baa tau lia ba ema sira iha nebaa hodi kontra Paulo sira.

¹⁴ Nee mak ema sarani sira iha Bereia lori kedas Paulo ba iha tasi ibun. Maibee Silas ho Timóteo hela nafatin iha Bereia.

¹⁵ Sarani sira akompanha Paulo too iha sidade ida naran Atenas, depois fila fali ba Bereia. Sira tatoli lia ida hosi Paulo atu Silas ho Timóteo baa lalais hasoru nia.

Paulo debate ho matenek nain sira iha sidade Atenas

¹⁶ Bainhira Paulo sei hein hela Silas ho Timóteo iha Atenas, nia laran susar teb-tebes, tanba nia haree estatua nebee ema adora hanesan idulu nakonu iha fatin hotu.

¹⁷ Maibee iha sidade nee, iha mos ema Judeu, ho ema laos Judeu balu mak hamtauk ba Nai Maromak. Paulo baa tama iha sira nia uma kreda, hodi diskuti ho sira. Loro-loron, nia mos baa iha merkadu hodi koalia ho ema see deit mak iha nebaa.

¹⁸ Paulo mos debate ho matenek nain sira hosi grupu rua, grupu ida naran Epikurus i ida naran Stoa. Bainhira nia koalia kona ba Jesus dehan Nia moris fali ona hosi mate, iha ema balu dehan, “Keta baa rona ema regador nee!” Balu tan hatete, “Nia hakarak obriga ita adora ema rai seluk nia maromak.”

^19-21 Ema Atenas sira, ho ema estranjeiru sira nebee hela iha sidade nee, kuandu rona hanorin foun ka ideia foun ruma, ema matenek sira baibain halibur hamutuk iha foho kiik ida naran Areopagus hodi troka ideia kona ba buat foun nee. Entaun sira lori Paulo ba iha nebaa, i sira husu ba nia, “Esplika lai mai ami hanorin foun nee, para ami bele komprende loloos. Tanba buat nebee senhor koalia nee, ami foin rona.”

²² Entaun Paulo hamriik iha ema matenek nain sira nia oin hodi hataan nunee, “Ema Atenas sira, hau lao lemo-lemo ona iha imi nia sidade nee, hau haree imi badinas adora imi nia maromak.

²³ Tanba bainhira hau haree didiak ba fatin bar-barak hodi imi adora lulik, hau mos haree imi nia altar ida hakerek dehan, ‘Fatin hamulak ba maromak ida nebee ita la hatene.’ Nee hatudu katak, imi adora ona ba Nai Maromak, maibee imi seidauk hatene Nia. I Nai Maromak nee mak agora hau atu foo hatene ba imi.

²⁴ Nia mak halo lalehan ho rai, ho buat hotu-hotu iha mundu nee. Nia mak Liurai nebee ukun lalehan ho rai. Nunee Nia la hela iha uma lulik nebee ema mak halo.

²⁵ Nia mak foo iis, ho foo moris ba ita ema. Nia mak foo ba ita buat hotu-hotu nebee ita presiza. Maibee Nia rasik la presiza ajuda ida hosi ita ema.

²⁶ Hosi ema ida, Nia halo nasaun hotu-hotu iha mundu tomak. Nia haketak nasaun sira, ida-idak ho nia rain. Nia desidi antes tiha ona, tempu nebee mak nasaun ida-idak atu sai boot, ka atu monu.

²⁷ Nia halo nunee, tan Nia hakarak atu ema hotu buka hatene Nia. Se sira hakaas aan, karik sira bele hetan Nia. Afinal Nia la dook hosi ita.

²⁸ Iha ema koalia ona dehan, ‘Ita moris iha mundu, tanba Nia. Ita iha, tanba Nia.’ Imi nia matenek nain ida mos hakerek poezia dehan, ‘Ita hotu-hotu nia oan.’

²⁹ Nee loos duni. Ita nee hotu Nai Maromak nia oan. Nee duni, keta hanoin dehan Nai Maromak nee hanesan estatua nebee ema badaen halo ho osan mean, ka osan mutin, ka fatuk, tuir sira nia hanoin.

³⁰ Uluk ema halo buat sira nee tanba seidauk komprende. Nee mak Nai Maromak foo perdaun ba sira. Maibee agora, Nia lakohi atu ita moris tan nunee. Nee mak Nia foo orden dehan, ema hotu-hotu tenki husik ona lulik, i tuir deit Nai Maromak.

³¹ Nia marka ona loron ida, hodi halo justisa ba ema hotu-hotu iha mundu tomak. I Nia hili ona Ema ida sai Juis, hodi tesi lia loloos. Ita hatene katak Juis nee mak Jesus. Tanba Nia mate tiha ona, maibee Nai Maromak halo Nia moris fali.”

³² Bainhira sira rona Paulo dehan, ema mate ida moris fila fali, balu goza nia. Maibee iha ema balu hatete ba Paulo, “Loron seluk ami sei hakarak rona tan kona ba buat nee.”

³³ Depois Paulo sai hosi enkontru nee.

³⁴ Sira balu tuir Paulo, i fiar ona Nai Jesus. Hosi sira nee iha matenek nain ida naran Dionísio, ho mos feto ida naran Dámaris, ho ema seluk tan.