Apostolu sira nia Istoria 12 - Biblia Tetun Dili

Tiago mate i Pedro tama kadeia

¹ Iha tempu nee, liurai Erodes komesa halo terus Nai Jesus nia ema.

² Nia haruka ema oho Tiago (João nia maun) ho surik.

³ Bainhira Erodes haree katak Tiago nia mate nee halo ema boot Judeu sira haksolok, nia haruka kaer tan Pedro. Sira kaer nia natoon iha Festa Paun la Tau Fermentu.

⁴ Depois sira lori nia baa hatama iha kadeia, i entrega ba soldadu grupu haat hodi hein nia loron-kalan. Grupu ida-idak iha ema nain haat. Liurai Erodes hakarak hein too festa nee hotu, mak foin nia tesi Pedro nia lia iha ema barak nia oin.

⁵ Durante Pedro sei iha kadeia, Nai Jesus nia ema sira halo orasaun bebeik ho laran tomak, husu ba Nai Maromak atu tau matan ba Pedro.

Nai Maromak nia anju hasai Pedro hosi kadeia

⁶ Iha kalan molok Erodes atu tesi Pedro nia lia, Pedro toba dukur hela iha soldadu rua nia leet. Sira kesi nia ho korenti rua, i soldadu balu hein iha kadeia nia odamatan oin.

⁷ Derpenti deit, Nai Maromak nia anju ida mosu, i kuartu kadeia nee sai naroman nabilan tiha. Anju nee fanu Pedro i dehan, “Hadeer lalais!” Korenti namkore kedas hosi Pedro nia liman.

⁸ Depois anju hatete ba nia dehan, “Hatais o nia faru, i tau o nia sandalias.” Pedro hatais tiha hotu, anju nee haruka tan dehan, “Hatais o nia kazaku, hodi tuir hau!”

⁹ Pedro tuir anju nee sai hosi kuartu kadeia laran. Nia hanoin nee mehi ida. Afinal tebes duni.

¹⁰ Sira lao liu hosi soldadu ida, depois liu soldadu ida tan, mak foin too iha portaun odamatan besi nebee hodi baa sidade. Odamatan nee nakloke mesak i sira nain rua sai ba liur. Lao tuir dalan ba sidade, derpenti deit, anju nee lakon tiha, husik hela Pedro mesak.

¹¹ Nee mak Pedro foin hatene saida mak akontese. Nia dehan, “Loos duni! Maromak mak haruka Nia anju mai hasai hau hosi Erodes nia liman laran, ho buat aat hotu nebee mak ema Judeu sira atu halo mai hau.”

¹² Tuir mai, Pedro baa iha João Marcos nia inan Maria nia uma. Iha nebaa, ema barak halibur hamutuk halo hela orasaun, husu ba Nai Maromak tulun Pedro.

¹³ Pedro too iha uma nee, nia dere portaun. Feto ida naran Rode nebee serbisu iha uma nee, baa haree see mak dere odamatan nee.

¹⁴ Rona Pedro nia lian, nia hatene kedas. Tanba nia kontenti demais, nia la hanoin atu loke portaun, nia halai ba laran, hatete ba sira, “Pedro hamriik hela iha liur.”

¹⁵ Sira hataan, “O bulak karik!” Maibee Rode hatete nafatin, “Tebes! Nia iha liur nebaa.” I sira hataan fali, “Karik Pedro nia anju.”

¹⁶ Maibee Pedro dere portaun nafatin. Ikus mai, sira baa loke. Bainhira sira haree Pedro, sira hakfodak.

¹⁷ Pedro halo sinal ho liman para sira nonook. Depois nia konta oinsaa Nai Maromak hasai nia hosi kadeia. Nia haruka sira dehan, “Imi baa foo hatene buat hirak nee hotu ba Tiago ho irmaun sira seluk.” Depois Pedro sai baa fatin seluk.

¹⁸ Iha aban dadeer-saan, soldadu sira hakfodak no husu ba malu saida mak akontese ho Pedro.

¹⁹ Bainhira Erodes rona tiha asuntu nee, nia haruka ema baa buka Pedro tuun-sae, maibee sira la hetan. Entaun Erodes husu litik soldadu sira nebee hein Pedro nee. Hotu tiha, nia haruka oho tiha sira. Depois Erodes sai tiha hosi provinsia Judeia, baa hela iha sidade Sezareia.

Nai Maromak nia anju kastigu Erodes too mate

²⁰ Liurai Erodes hirus teb-tebes ema sira hosi sidade Tiru ho Sidon. Maibee sira presiza hahaan hosi liurai Erodes nia rain. Entaun sira haruka delegasaun ba Erodes hodi buka dame ho nia. Too iha nebaa, sira hetan apoiu hosi liurai nia funsionariu boot ida naran Blastu.

²¹ Sira marka loron ida para hasoru malu ho Erodes. Iha loron nee, Erodes hatais tiha hena liurai nian, i tuur iha nia kadeira ukun, hodi hatoo liafuan ba sira.

²² Sira komesa hahii nia dehan, “Nee laos ema nia lian. Nee Maromak nia lian!”

²³ Derepenti deit, Nai Maromak nia anju foo moras ida ba Erodes, tanba bainhira ema adora nia hanesan fali Nai Maromak nia simu deit. I ular haan nia isin too mate.

²⁴ Maibee ema hatutan Nai Maromak nia Liafuan ba ema barak liu tan. I sira nebee fiar ba Jesus amenta ba bebeik.

²⁵ Bainhira Barnabé ho Saulo lori tiha ona sarani Antiokia sira nia oferta ba Jerusalém, sira fila fali ba Antiokia, lori ho ema ida naran João, nebee ema bolu mos Marcos.