Apostolu sira nia Istoria 11 - Biblia Tetun Dili

Pedro defende nia aan tanba nia sarani ema nebee laos Judeu

¹ Jesus nia apostolu sira ho sarani sira seluk iha provinsia Judeia rona dehan, ema nebee laos Judeu mos simu ona Maromak nia Liafuan.

² Bainhira Pedro baa too iha Jerusalém, iha ema sarani balu nebee sei kaer nafatin lisan sunat Judeu nian, foo sala ba nia,

³ dehan, “O bele brani baa tama iha ema nebee laos Judeu sira nia uma. I o haan ho hemu tan ho sira! La bele nunee, tan sira la moris tuir ita nia lisan sunat.”

⁴ Nunee Pedro konta buat nebee akontese ona, hosi huun too rohan dehan,

⁵ “Loron ida, hau halo hela orasaun iha sidade Jope, Nai Maromak hatudu hanesan mehi ida mai hau. Mosu buat ida hanesan lensol boot ida tuun hosi lalehan, nia rohan haat nee kesi metin hotu.

⁶ Bainhira hau fihir tama ba lensol laran, hau haree animal oi-oin. Iha animal ain haat, animal fuik, animal nebee dolar, ho manu fuik oi-oin. Sira nee hotu, ita ema Judeu la bele haan.

⁷ Hau mos rona lian ida haruka dehan, ‘Pedro, hamriik ona! Oho animal sira nee, i haan baa!’

⁸ Maibee hau hataan, ‘Lae, Nai! Hau nunka haan animal foer hanesan nee, nebee ami Judeu nia lei bandu.’

⁹ Maibee lian nee hatete fali, ‘Buat nebee Nai Maromak dehan bele haan ona, o la bele dehan la bele haan.’

¹⁰ Nee akontese dala tolu, mak foin lensol ho animal sira nee sae fali ba lalehan.

¹¹ Momentu nee kedas, ema mane nain tolu too iha uma. Sira mai hosi Sezareia buka hau.

¹² Nai Maromak nia Espiritu Santu foo hatene mai hau dehan, ‘O baa hamutuk ho sira. Keta laran rurua, maski sira nee laos ema Judeu.’ Depois ita nia irmaun nain neen nee mos akompanha hau ba Sezareia. I ami hotu baa tama iha Cornélio nia uma.

¹³ Nia konta ba ami dehan, nia haree Nai Maromak nia anju ida hamriik iha nia uma hodi hatete, ‘Haruka ema ba Jope bolu Simão Pedro.

¹⁴ Nia sei hatudu ba o, ho ema hotu iha o nia uma laran, oinsaa mak Nai Maromak bele salva imi.’

¹⁵ Nee mak hau komesa foo hatene Maromak nia Novidade Diak ba sira. Maibee hau foin hahuu nunee, Espiritu Santu tuun kedas ba sira, hanesan mos uluk Nia tuun mai ita.

¹⁶ Haree sira simu Espiritu Santu nunee, hau hanoin too Jesus nia Liafuan dehan, ‘Uluk João foo sarani ema hodi bee, maibee Nai Maromak sei foo Nia Espiritu Santu ba ema hodi domina sira.’

¹⁷ Nai Maromak rasik mak foo Nia Espiritu Santu ba sira nebee laos ema Judeu, hanesan loloos uluk Nia foo ona mai ita bainhira ita fiar ba Nai Jesus Kristu. Nunee imi hakarak atu hau kontra Nai Maromak ka, oinsaa?!”

¹⁸ Rona Pedro defende aan nunee, sira la foo tan sala ba nia. Sira komesa hahii Nai Maromak dehan, “Afinal Nai Maromak loke ona dalan ba ema nebee laos Judeu, atu sira bele husik sira nia sala, i tuir Nai Maromak nia hakarak, hodi moris nafatin ho Nia.”

Ema barak nebee laos Judeu fiar ba Jesus iha sidade Antiokia

¹⁹ Uluk, bainhira ema oho tiha Estevão, ema komesa halo terus mos sarani sira too sira halai namkari. Agora sira balu too ona iha provinsia Fenísia, balu too iha ilha Xipre, no sira balu tan halai baa dook too iha sidade Antiokia iha provinsia Síria. Maski sira foo sai nafatin Nai Jesus nia Novidade Diak iha fatin-fatin, maibee sira so foo sai deit ba ema Judeu.

²⁰ Maski nunee, iha mos ema sarani balu hosi ilha Xipre ho hosi sidade Sirene, nebee baa iha sidade Antiokia. Sira mos foo sai Nai Jesus nia Novidade Diak ba ema nebee laos Judeu.

²¹ Nai Maromak foo Nia kbiit ba sira, too ema barak teb-tebes fiar i tuir Nai Jesus.

^22-24 Bainhira sarani sira iha Jerusalém rona dehan ema iha Antiokia mos fiar ona ba Jesus, sira haruka ema ida naran Barnabé baa haree sira iha nebaa. Nia ema ida ke laran diak, i fiar teb-tebes ba Nai Maromak. Nai Maromak nia Espiritu Santu sempre domina nia. Too iha nebaa, nia haree Nai Maromak foo ona bensaun ba sira. Nunee nia laran haksolok. Nia mos husu boot para sira tuir nafatin Nai Jesus ho fuan-laran tomak. I ema barak tan komesa fiar ba Nai Jesus.

²⁵ Liu tiha nee, Barnabé baa iha sidade Tarsu buka Saulo.

²⁶ Bainhira nia hetan tiha Saulo, nia lori fila fali ba Antiokia. I sira nain rua hela hamutuk iha nebaa durante tinan ida tomak ho Nai Jesus nia povu. Loro-loron sira nain rua hanorin Nai Jesus nia Novidade Diak ba ema barak. (Iha sidade Antiokia, mak foin ema komesa foo naran ba sira nebee fiar ba Jesus, dehan ‘kristaun’.)

²⁷ Momentu sira nain rua sei iha Antiokia, iha profeta balu mai hosi Jerusalém.

²⁸ Ida naran Ágabu. Nai Maromak nia Espiritu foo hatene ba nia dehan, “Rai sei hamlaha boot iha mundu tomak.” (Buat nee sai duni iha tempu liurai Cláudio ukun Roma.)

²⁹ Rona nunee, ema sarani sira iha Antiokia koalia hamutuk atu haruka ajuda ba sarani sira iha provinsia Judeia. Sira ida-idak foo tuir buat nebee sira iha.

³⁰ Depois sira entrega oferta nee ba Barnabé ho Saulo hodi lori ba presbiteru sira iha igreja iha Jerusalém.