2 Timóteo 4 - Biblia Tetun Dili

Timóteo tenki halao nia ministeriu ho diak too remata

¹ Kristu Jesus sei fila fali mai hosi lalehan hodi ukun hanesan liurai. I Nia sei foo justisa ba ema sira nebee sei moris ho sira nebee mate tiha ona. Nunee, iha Nai Maromak ho Kristu Jesus nia oin, hau haruka o

² foo sai Nai Maromak nia liafuan; iha tempu diak ka la diak, o tenki prontu. Koriji ema nebee halo sala, i bandu sira para la bele halo sala tan. Hametin ema nia laran. Halo buat sira nee hotu ho pasiensia, liu hosi hanorin Nai Maromak nia liafuan.

³ Tanba sei too iha tempu ida, ema lakoi rona ona hanorin nebee loos. Maibee sira sei tuir deit sira nia hakarak rasik, hodi rona mestri bara-barak nebee hanorin tuir sira nia hakarak.

⁴ Sira sei taka tilun ba ema nebee hanorin lia loos. Maibee sira see tilun fali hodi rona ai-knanoik nebee la iha folin.

⁵ Timóteo, o la bele nunee. O tenki domina aan iha buat hotu-hotu. Aguenta ho pasiensia iha terus laran. Baa foo sai Novidade Diak ba ema. Halao serbisu hotu-hotu nebee Nai Maromak tau ona iha o nia kabaas.

⁶ Kona ba hau nia aan, hau nia loron mate besik ona. Hau hanesan tua kopu ida nebee fakar ba altar leten hanesan oferta ida ba Maromak.

⁷ Hau remata jogu hotu ho diak. Hau halai taru too iha rohan. Hau kaer metin hau nia fiar ba Jesus Kristu too hau nia iis kotu.

⁸ Agora hau hein prémiu nebee Nai Jesus prepara ona ba ema nebee moris loos. Ita nia Nai nee mak juis loos. I too iha loron nebee Nia tesi lia, Nia sei foo prémiu nee mai hau. Laos mai hau deit, maibee Nia sei foo mos ba ema hotu nebee ho laran tomak hein hela Nia atu fila mai.

Paulo hatoo lia menon ikus

⁹ Timóteo, hakaas aan mai lalais haree hau.

¹⁰ Tan Demas husik tiha ona hau hodi baa iha sidade Tesalónika, tanba hadomi liu buat mundu nian. Kresente baa tiha ona provinsia Galasia, i Tito mos baa tiha ona rai Dalmásia.

¹¹ So Lucas deit mak sei hamutuk ho hau. O mai, lori ho Marcos, para nia bele ajuda hau halao hau nia ministeriu.

¹² Hau haruka ona Tíkiku baa iha sidade Efezu.

¹³ Bainhira o mai, lori ho hau nia faru manas nebee hau rai hela iha Karpu nia uma iha sidade Tróade. Lori mos hau nia livru sira, liu-liu livru sira nebee hakerek iha animal nia kulit.

¹⁴ Alexandre, badaen riti ida, halo ona buat aat barak mai hau. Maromak sei kastigu nia tuir nia hahalok.

¹⁵ O tenki kuidadu ho ema nee, tanba nia kontra makaas ita nia hanorin.

¹⁶ Bainhira hau primeira vés hamriik iha juis nia oin hodi defende hau nia aan, la iha ema ida mak ajuda defende hau. Sira hotu husik hela hau. Husu boot, Maromak la foo sala ba sira.

¹⁷ Bele nunee mos, Nai Jesus hamriik iha hau nia sorin hodi foo forsa mai hau, para hau bele foo sai Novidade Diak hotu. Nunee sira nebee laos ema Judeu mos bele rona. I Maromak mos hasai hau hosi liaun nia ibun.

¹⁸ Nai Maromak sei hasai hau hosi buat aat hotu. I Nia sei lori hau ho diak tama ba reinu lalehan nia. Mai ita hotu-hotu foo gloria ba Nai Maromak too tinan ba tinan. Amen.

Paulo taka nia surat

¹⁹ Hatoo kumprimentus ba Priscila ho nia kaben Akila. Nunee mos ba Onesiforu nia uma kain.

²⁰ Erastu hela nafatin iha sidade Korintu. Hau husik hela tiha Trófimu iha sidade Miletu, tanba nia moras.

²¹ Hakaas aan mai too iha nee molok tempu malirin. Eubulu, Pudente, Lino, Cláudia, ho sarani sira seluk haruka kumprimentus ba o.

²² Nai Jesus nia Espiritu hamutuk ho o nafatin, i Maromak hatudu Nia grasa ba imi hotu. Hosi hau, Paulo