2 Timóteo 3 - Biblia Tetun Dili

Ema nia hahalok aat iha tempu ikus

¹ Timóteo, hanoin didiak. Iha tempu ikus, susar barak sei mosu.

² Ema sei hadomi deit sira nia aan rasik, i hadomi deit osan. Sira gaba aan, foti aan, hatete aat ema, kontra inan-aman, la hatene foo obrigadu, i la respeita Nai Maromak.

³ Sira la hadomi sira nia família, i lakohi foo perdaun no dame malu. Sira hatete aat ema, la domina aan, gosta halo violensia, i la gosta buat nebee diak.

⁴ Sira faan sira nia kolega ba ema aat, la hanoin naruk, i gaba aan dehan nia mak hatene buat hotu. Sira gosta liu goza moris duke moris tuir Maromak nia hakarak.

⁵ Iha ema nia oin sira hatudu jeitu hanesan ema nebee fiar ba Maromak. Maibee Maromak nia kbiit la iha sira nia fuan laran. La bele ransu ho ema sira hanesan nee.

⁶ Sira balu finji baa tama iha ema nia uma. Too iha uma laran, sira bosok feto balu nebee monu lalais ba lia falsu. Feto sira nee laran la hakmatek tanba sira halo sala barak ona, i sira sempre halo tuir sira nia hakarak aat oi-oin.

⁷ Feto sira nee gosta rona hela deit hanorin foun, maibee sira nunka komprende lia loos.

⁸ Uluk Janes ho Jambres kontra profeta Moisés. Hanesan nee mos mestri sira nee kontra lia hanorin nebee loos. Sira nia hanoin sai aat tiha ona, i sira nia fiar nee la metin.

⁹ Maibee la kleur, ema sei la fiar tan mestri falsu sira nee. Tanba ema hotu sei hatene dehan, sira beik-teen. Hanesan mos uluk akontese ba Janes ho Jambres.

Fiar amenta liu hosi lee Biblia no hetan terus

¹⁰ Timóteo, o akompanha ona hau nia moris tomak. O hatene hau nia hanorin, hau nia moris oinsaa, i hau nia objetivu saida. O haree ona hau nia fiar ba Jesus Kristu, hau nia pasensia, hau nia hadomi ba ema seluk, i oinsaa hau aguenta ho pasiensia iha terus laran.

¹¹ O mos hatene katak ema hanehan hau i halo terus hau. O hatene saida mak sira halo mai hau iha sidade Antiokia, Ikóniu ho Listra. Maibee Nai Jesus hasai ona hau hosi terus ho susar sira nee hotu.

¹² Loos duni, ema hotu nebee fiar ba Kristu Jesus i hakarak moris loos tuir Maromak nia hakarak, sei hetan terus.

¹³ Maibee ema aat ho ema bosok-teen sira sei sai aat ba bebeik. Sira bosok halo ema barak monu, afinal ema mos bosok sira.

¹⁴ Maibee o tenki kaer metin lia loos nebee o aprende tiha ona. O laran metin ona katak buat sira nee loos, i keta haluha ema nebee hanorin lia loos ba o nee.

¹⁵ Komesa o sei kiik, o hatene ona Livru Sagradu. Liu hosi Maromak nia liafuan, ita hatene katak, Maromak salva ita bainhira ita fiar ba Kristu Jesus.

¹⁶ Liafuan hotu-hotu iha Livru Sagradu, Nai Maromak rasik mak foo tutan ba ema hakerek. Liafuan sira nee serve hodi hanorin lia loos, hatudu ema nia sala, koriji ema, ho eduka ema para moris loos.

¹⁷ Nunee Nai Maromak halo kompletu Nia ema hodi halo buat hotu-hotu nebee diak.