2 Timóteo 2 - Biblia Tetun Dili

Ita tenki tuir Kristu hanesan soldadu diak ida

¹ Oan Timóteo mak hau hadomi, Kristu Jesus hatudu Nia grasa hodi foo forsa mai ita. Nunee, sai forti baa!

² Uluk hau hanorin iha ema barak nia oin, o mos iha. Buat nebee o rona hosi hau nee, o tenki foo tutan ba ema nebee o fiar, para sira mos bele hanorin fali ba ema seluk.

³ Nudar Kristu Jesus nia soldadu diak ida, o tenki prontu aguenta iha terus laran.

⁴ Soldadu nebee halo funu dadauk, nia la hanoin tan atu halo serbisu seluk. Tanba nia hakarak halo kontenti nia komandante.

⁵ Nunee mos, hanesan ho atleta ida. Nia la manaan prémiu se nia la tuir regulamentu jogu nee nian.

⁶ Haree mos ba toos nain. Nia serbisu mate aan, nunee nia mak tenki kontenti uluk ho kolheita hosi nia toos.

⁷ Hanoin didiak ezemplu hirak nee. I Nai Maromak sei halo o komprende buat sira nee hotu.

⁸ Hanoin bebeik kona ba Jesus Kristu, liurai David nia Jerasaun. Nia mate, maibee Nai Maromak halo Nia moris fali ona. Ida nee mak Novidade Diak nebee hau hanorin.

⁹ Tanba hau foo sai Novidade Diak nee mak hau hetan terus, too ema kesi tan hau ho korenti hanesan fali ema nebee halo krimi. Maibee Nai Maromak nia liafuan, ema ida la bele kesi.

¹⁰ Tanba nee hau prontu simu terus hotu-hotu, para ema sira nebee Maromak hili ona bele fiar ba Kristu Jesus i hetan salvasaun. I Nai Maromak sei foti aas sira too tinan ba tinan.

¹¹ Liafuan tuir mai loos duni; nee mak ita bele simu ho laran tomak: “Se ita mate hamutuk ho Kristu, ita mos sei moris fali hamutuk ho Nia.

¹² Se ita aguenta iha terus laran, ita mos sei kaer ukun hamutuk ho Nia. Se ita nega Nia, Nia mos sei nega ita.

¹³ Maski ita la foo laran ba Kristu, maibee Nia foo laran nafatin mai ita. Tanba Nia mak hanesan nee duni.”

Atan diak nebee Maromak simu

¹⁴ Foo hanoin bebeik ba sarani sira kona ba buat sira nee. Hatete ba sira hodi Nai Maromak nia naran, la bele istori malu kona ba liafuan. Hahalok hanesan nee la iha folin, i so halo susar deit ema nebee rona.

¹⁵ Hakaas aan serbisu didiak, para Nai Maromak bele rekonhese o nudar Nia atan diak ida. I hatene hanorin loloos Nai Maromak nia liafuan nebee loos. Nunee o sei la moe, tanba o serbisu ho diak.

¹⁶ Hadook aan hosi koalia la huun la dikin nebee kontra Nai Maromak nia liafuan. Tan ema nebee koalia hanesan nee sei dook ba bebeik hosi Maromak.

¹⁷ Sira nia liafuan hanesan kanek dodok nebee aumenta ba bebeik. Himeneu ho Filetu sira nia koalia hanesan nee loloos!

¹⁸ Sira nain rua hanorin dehan, ema sira nebee mate, moris fali ona. Nunee sira sees ona hosi lia loos, i estraga ema balu nia fiar.

¹⁹ Maibee Nai Maromak nia povu fiar metin nafatin, hanesan uma nia riin nebee la nakdoko. Iha riin nee hakerek dehan, “Maromak hatene Nia ema sira.” Hakerek mos katak, “See mak dehan nia tuir Nai Maromak, tenki fila kotuk ba buat aat.”

²⁰ Iha ema riku sira nia uma, iha sasaan oi-oin. Balu halo ho osan mean ka osan mutin. Iha mos balu halo hosi ai ka hosi rai. Sasaan diak, uma nain uza ba festa. Maibee sasaan nebee laduun diak, sira uza hodi tau foer.

²¹ Nunee mos ho ema. See mak hadook aan hosi buat nebee aat, nia hanesan sasaan diak sira nee, i Maromak sei uza nia ba serbisu nebee diak. Tanba nia laran moos ona, serve para nia nain bele uza, i prontu halo buat diak saida deit.

²² Timóteo, halai sees hosi buat aat nebee foin-sae sira balu gosta halo. Hakaas aan atu moris loos. Fiar nafatin ba Maromak, hadomi sarani sira i haree malu didiak. Ema sira nebee adora Maromak ho laran moos, sempre halo hanesan nee.

²³ Bainhira ema diskuti malu kona ba buat nebee la iha folin, o lalika tama iha laran. Tan so halo ema istori malu deit.

²⁴ Nai Maromak nia atan la bele istori malu, maibee tenki laran diak ba ema hotu, hatene hanorin ema, i pasiensia.

²⁵ Ema nebee kontra nia, nia tenki koriji ho laran maus, tanba dala ruma Maromak bele halo sira husik sira nia sala, i bele ajuda sira simu lia loos.

²⁶ Nunee sira nia hanoin bele sai loos fali, i sira bele halai sai hosi Satanás nia liman, nebee kaer tiha ona sira hodi obriga sira halo tuir nia hakarak.